ကမ်းကုန်အောင်အလိုလိုက်ခံထားရသည့် အမျိုးသားဇနီးသည် [ဘာသာပြန်]

14

U••

[ရှန်သခင်လေး၏ကြင်နာမှုနှင့်ချုပ်ခြယ်မှုများ]

ဟယ့်ချန်းနင်ကခေါင်းကိုငုံ့ရင်း ပြတင်းပေါက်ကုန်းပတ်ကိုမှီလိုက်မိသည်။ သူနေမထိထိုင်မသာဖြစ်လှပါသည်။ သူကယောက်ျားနှစ်ယောက်လက်ထပ်သည်ကိုမကန့်ကွက်သော်လည်း ၎င်းကသူကိုယ်တိုင်မပါဝင်နေသည့်အနေအထားမျိူး၌ဆိုလိုခြင်းဖြစ်သည်။ အခုကေတာ့သူက ပြန်မလှည့်နိုင်တော့သည့်အနေအထားသို့ရောက်လာခဲ့ချေပြီ။ သူမည်သို့လုပ်ရမည်နည်း? သူအမှန်တကယ်ပဲ ရှန်ယွီရှန်းနှင့် လင်မယားအရာမြောက်ရတော့မည်လား?

သို့သော်လည်း သူတို့နှစ်ယောက်လုံးကယောက်ျားလေးများဖြစ်သည်မို့ မည်သို့အတူနေထိုင်ကြမည်နည်း? ၎င်းကတစ်နှစ်တည်းသာဖြစ်သော်လည်း ရှန်ယွီရှန်း၏တောင်းဆိုမှုကသူ့အတွက်များလွန်းပါသည်။ တခြားယောက်ျားတစ်ယောက်နှင့် နှီးနှောရမည်ဟူသောအတွေးက ချန်းနင်အားအဆုံးမရှိစိတ်ပျက်စေ၏။

လူငယ်လေး၏စိတ်ပျက်မှုနှင့်ရုန်းကန်လိုမှုများကိုခံစားရသော်လည်း ရှန်ယွီရှန်းအလျော့ပေးဖို့စိတ်မကူးမိပေ။ တကယ်တမ်း လူနှစ်ယောက်အတူရှိလာသည့်အခါတွင်မူ တစ်ချို့သောအရာများကရှောင်ရှားဖို့ခက်ခဲလှ၏။ ထို့ကြောင့်လည်း သူက သူတို့နှစ်ယောက်လက်ထပ်ပြီးသည့်အခါမှ ဆက်ဆံရေးကိုထိခိုက်စေမည့်ကိစ္စများဖြစ်လာစေမည့်အစား ချန်းနင်ကိုအချိန်ကိုဖြည်းဖြည်းချင်းအသုံးပြု၍ စိတ်ပိုင်းဆိုင်ရာပြင်ဆင်သွားစေဖို့ရွေးချယ်လိုက်ရခြင်းပင်။

ရှန်ယွီရှန်းက ပြင်းထန်သောစိတ်ရှိ၍ ချုပ်ခြယ်တတ်သည်။ သူကချန်းနင်သူ့ကိုငြင်းဆန်ဖို့မည်သည့်အကြောင်းပြချက်ကိုမှ ခွင့်ပြုမည်မဟုတ်ချေ။ သူတို့ဆက်ဆံရေးကိုကြာရှည်တည်မြဲစေနိုင်မည့် တစ်ခုတည်းသောနည်းလမ်းက သူ့စိတ်သူပြင်ဆင်၍လက်ခံစေလိုက်ခြင်းပင်ဖြစ်သည်။ သူကချန်းနင်နှင့်တစ်နှစ်တည်းသာလက်ထပ်ဖို့အစီအစဉ်မရှိပေ။ ကတိပေးလိုက်သည့် တစ်ခုတည်းသောအကြောင်းအရင်းက သူနှင့်အတူအချိန်ကုန်ဆုံးသည့်အခါ၌ ချန်းနင်ရှက်ရွံ့သလိုမခံစားရစေရန်သာဖြစ်သည်။