ကမ်းကုန်အောင်အလိုလိုက်ခံထားရသည့် အမျိုးသားဇနီးသည် [ဘာသာပြန်]

19.2

U••

အန်တီချင်က နွားနို့ခွက်ဖြင့် အပေါ်ထပ်သို့တက်သွားကာ ချန်းနင်၏လက်ဘေး၌ထိုသောက်စရာကိုချပေးထားလိုက်၏။

"ချန်းနင်... မင်းညလုံးပေါက်နေတာများနေပြီ မင်းခန္ဓာကိုယ်ကအဲ့ဒဏ်တွေအကုန်ခံနိုင်မှာမဟုတ်ဘူးနော်"

"ကျွန်တော်နားလည်ပါတယ်အန်တီချင်... ဒါကမကြာခင်ပြီးတော့မှာပါ တစ်ညပြီးတာနဲ့ကျွန်တော့်အလုပ်လဲပြီးပြီ"

အန်တီချင်ကထပ်မံ၍နားပူနားဆာလုပ်လာပြန်သည်။

"ဆိုးသွမ်းတဲ့ကလေး.. အလုပ်နဲ့ပက်သက်လာရင်မင်းကဘယ်လိုတောင်ဂရုမစိုက်တတ်တော့တာလဲ မင်းကျန်းမာရေးကပိုအရေးကြီးတယ်... မြန်မြန်... နွားနို့ကိုသောက်လိုက်"

"ကောင်းပါပြီဗျာ ကျွန်တော်ခဏနေရင်သောက်ပါ့မယ်... အန်တီလည်းနားတော့ ကျွန်တော်ခဏနေပြီးတော့မှာ"

အန်တီချင်ကချန်းနင်ကို နို့သောက်၍စောစောအနားယူရန်မှာပြီးသည့်နောက် သူမကသန်းဝေကာ သူမအခန်းသို့ပြန်သွားတော့သည်။ အသက်ကကြီးပြီမို့ အချိန်ကြာကြာနိုးနေဖို့က သူမအတွက်အခက်အခဲဖြစ်လာခဲ့ချေပြီ။

အန်တီချင်၏နားပူနားဆာလုပ်မှုများကိုပြန်တွေးမိတော့ ချန်းနင်၏နှလုံးသားကနွေးထွေးသွားရသည်။ ဂရုစိုက်ပေး၍ ချစ်ပေးသည့်တစ်စုံတစ်ယောက်ရှိသည်က အတော်လေးခံစားလို့ကောင်းလှ၏။ တစ်စုံတစ်ယောက်၏ပုံရိပ်က ချန်းနင်၏အတွေးထဲဖျက်ခနဲပေါ်လာလျက်။ ထိုလူသားကလည်း သူ့အပေါ်ညှင်သာ၍ဂရုစိုက်ပေသည်။ ထိုသူကဖုန်းခေါ်ရင်းဖြင့် အထပ်အခါခါအမြဲသတိပေးတတ်၏။ ထိုလူ့အကြောင်းအတွေးကတင် ချန်းနင်၏နှလုံးသားအား ချိုမြိန်မှုများဖြင့်ပြည့်နှက်သွားစေသည်။ သူကထိုလူသားနဲ့သူ့ဘဝကိုကုန်ဆုံးရန်အတွက် ရက်၂၀ နီးနီးသာလိုတော့သည်။ အမှန်တိုင်းပြောရရင်တော့ သူလည်းထိုအချိန်ကိုမြန်မြန်ရောက်စေချင်လှပြီပင်။

သူ၏ရှက်ဖွယ်ကောင်းသောအတွေးများကြောင့် လန့်သွားသည့်ချန်းနင်က ခေါင်းကိုခါယမ်းလိုက်ရင်း အလုပ်ကိုသာတစ်ဖန်အာရုံပြန်စိုက်လိုက်တော့သည်။ ထို့နောက်တွင်မူ သူက ပုံမှန်အတိုင်းနွားနို့သောက်ဖို့ခွက်ကိုယူလိုက်လေ၏။ တစ်ငုံအပြည့်သောက်လိုက်ပြီးသည့်နောက်ခွက်ကိုဘေးချကာ လက်ထဲမှအလုပ်ကိုဆက်လုပ်တော့သည်။