زمهرير لهب الصحراء

الفصل العشرون

أخرجت السيدة خضرة من حقيبتها قطع ملابس ووضعتها أمام الساحرة، ثم استأنفت قائلة:
- بنتي متجوزة ولسه ماخلفتش وحماتها الله يسم بدنها في الراحة والجاية تلسن عليها بالكلام إنها معيوبة وجوزها هو اللي سليم، أنا عايزاكي تعمليلي عمل لجوزها مايسبهاش ابدًا ويفضل ماسك فيها بأيده وسنانه ولو تعرفي تتعاملي مع الأسياد يخلوها تحمل يبقى كتر خيرك ....... وده قطر بنتي وجوزها

- اللي بتقوليه ده جهل وتخلف، عفاريت إيه اللي تخليني احمل؟ يلا بينا نمشي من هنا

لم تتحمل خضرة سباب وشتيمة ابنتها للقوة الخفية مخافة أن يرتكب بها شيء بسبب جهلها وعدم تعليمها فالجهل مصيبة خاصة عند انخفاض المعرفة ومدى خطأ المعتقدات بما يتعلق بموضوع معين، أي أنه نوع من أنواع الخداع الذاتي، فنطقت بلهفة:
- بس ماتقوليش كده أحسن يسخطوكي قردة منسنسة .. ماتتكلميش خالص اقفلي بؤك واياكي تنطقي بحرف واحد

عبست العجوز ورفعت نظرها إليها محدقة بهما، ها قد عدنا للنظرات ذات الألف معنى ومتى ستنتهي بادرت العجوز لتقول:
- ماتخفيش أنا مش هأذيكي انتِ وجوزك

- مش قولتلك إنها ست كويسة وغرضها مساعدة الناس

ألقت خضرة جملتها بإعتزاز وفخر وبدأت تقص عليها ما حدث وما يجب أن تفعله، غادرت رئيفة بصحبة والدتها وشعور اللوم والتعنيف يلازمها

ـــــــــــــــــــــــــــــــــــ

- كنتي فين؟؟

أخذتها رجفة من خوف واضطربت اضطرابًا شديدًا من مبرة صوته الغاضبة فحاولت التحكم في هلعها وأردفت تقول:
- بعد خرجت من المدرسة روحت اطمن على ماما وكانت تعبانة اضطريت اقعد معاها

أومأ أنور رأسه دون أن يرد ونظر لها كانت مرتبكة للغاية كطفلة منطوية حتى أن أصابع قدميها متكورة داخل حذائها ثم تذكرت شيء وسألته:
- هحضرلك الغدا مش هتأخر و..

منعها من استئناف طلبها بلهجة فاترة:
- كلت عند أمي

برقت بعينيها وقد غفلت حينما تكلمت بصوت غاضب مرتفع:
- ليه يا أنور ما احنا متفقين اننا هناكل مع بعض!

قذف عليها نظرات غاضبة ولكنه تمالك نفسه قائلًا باستعداد عقله لاتخاذ منحى معين استجابة لدافعه الناقم:
- ده لما تكوني موجودة في البيت، إنما دلوقتي الساعة أربعة العصر وأنا مش هقعد مستني جنابك تأكليني .. يعني حقي أنا اللي زعل مش انتِ

عضت رئيفة على الشفة السفلية وأحتضنته من ظهره هامسة في أُذُنه:
- أنا مش قد زعلك يا أنور حقك عليا، ماما كانت تعبانة وماقدرتش اسيبها لوحدها لحد ماجات إيمان تاخد بالها منها

ـــــــــــــــــــــــــــــــــــ

بالطلاسم والرموز والحروف المقطعة والارقام والمربعات والدوائر والكلمات الغير معروفة والاستغاثات بالشياطين استطاعت العجوز صنع سحر وظلت تردد كلمات غير مفهومة وثد تملك منها الشيطان وأصبحت تعمل بأمر من سيطرته