باشر بالركض خلفها وهو يصيح عليها:
- يا اسينات استني
- آنسة اسينات لو سمحت
قالتها بضيق وقلة صبر مبالغ به، ليسألها حبيب يستفسر عن حالتها بتعجب:
- إيه اللي حصل؟ ما احنا في الصبح كنا زي السمن على العسل
أشاحت وجهها وهي تقول بتبرم:
- واهو دلوقتي بقينا زي التوم والبصل
ضحك في داخله وهو يفكر بطريقة لجعلها تغتاظ وتغضب فقال بهدوء مصطنع:
- مالك يا اسينات متعصبة على إيه؟
عقدت حاجبيها وهي تقول بحنق:
- قولتلك آنسة
حينها تجهمت ملامحه قبل أن يمنعها من المغادرة وهو يدقق في عينيها بقسوة ليقول بصوت غريب:
- طيب يا ستي متعصبة على إيه يا آنسة اسينات ممكن اعرف؟
رفعت أسينات حاجبيها وأخفضتهما للحظة ثم همست:
- اقدر اعرف ليه بتتكلم عني قدام الناس؟
أخذ حبيب وقته كاملًا في التحديق بها ورموش عينيه تغلق وتفتح عدة مرات إلى أن قال بعدم فهم:
- مين اللي قالك الكلام الأهبل ده؟ أنا مستحيل اجيب سيرتك قدام مخلوق
رمقته نظرات غير قابلة للتصديق وهي تتفوه بسخرية:
- لا والله
تعجب بكثرة من نظراتها المريبة وقام بطرح سؤاله:
- تعرفي عني الكدب؟
قالت بعدم إهتمام:
- انت ادرى بنفسك
دارت بجسدها مُهيأة للإبتعاد عنه ليعطلها عن إكمال سيرها واستطرد بهدوء لا يخلو من القسوة:
- استني يا اسينات فهميني مين اللي ضحك عليكي وقالك اني بجيب سيرتك؟
هتفت بغل قبل أن تتمالك من تمالك نفسها:
- ضحى اللي قالتلي يا دكتور .. بقى أنا قاسية وعصبية وانسانة مبعثرة، أنا جملة نكرة يا دكتور البهايم
لوى فمه وأطلق مسبة على الصغيرة ثم طلب بلباقة:
- وانتِ بتصدقي كلام البت ضحى؟ دي أربع سنين بتقول أي حاجة تيجي في بالها وتزود عليه الكدب، اسمعيني وأنا هفهمك كل حاجة
رفض طلبه بنبرة أكثر قسوة:
- مش عايزة افهم منك حاجة هتبرر إيه؟ انت انسان كداب وبتجيب سيرتي قدام الناس
تقدمت وخطت بقدميها للأمام لكنه أعاقها وهو يقف أمامها:
- استني أنا ماخلصتش كلامي
- آنسة اسينات وماتنساش نفسك وانت بتكلمني يا دكتور البهايم
اسودت عيناه وقتمت بشرته ولم يشعر إلا ونار تحرق صدره وهو يمسك رسغها ويقول بلهجة غليظة جافة:
- اسمعي يا اسينات ومش يا آنسة اسينات
قاطعته وهي تجذب يدها لكنها لم تستطع فصاحت بحدة:
- سيب إيدي انت ازاي تمسكها هتكسرها!
لم يتركه بل هزها إليه رافعًا ذراعها للأعلى وتابع بنبرته الغاضبة:
- بقولك اسمعيني يا اسينات ومش يا آنسة اسينات .. أنا ماقبلش إنك تقولي عليا كداب ولا بجيب سيرتك قدام حد، انتِ مش مدياني فرصة افهمك، أنا ماجبتش اسمك بحرف واحد، انا ممكن اشتم، اتخانق، اعمل أي حاجة تخطر في بالك لكن اجيب سيرة بنت قدام حد، دي كلمة ماعرفهاش وماتعلمتهاش في حياتي .. فاكرها حياتي يا اسينات ومش يا آنسة اسينات
YOU ARE READING
زمهرير لهب الصحراء
Romanceسنبرم مبارزة على حلبة الهوى ومن يربح الهيجاء يحق له أن يظفر بقلب الآخر. بقلم/ فاطمة الزهراء عرفات
