Unicode
မတ်လထဲကိုဝင်ရောက်လာသည်နှင့် ရန်ကုန်မြို့၏ရာသီဥတုမှာ သိသိသာသာခြောက်သွေ့ပြီးပူပြင်းလာပြီဖြစ်၏ ။ ပူပြင်းသောရာသီဥတုကြောင့် အပူကြောက်သောသူများမှာလည်း တညည်းညည်းတညူညူ ။
" ပူလိုက်တာ...ပူလိုက်တာ "
သန့်က ထိုစကားကိုရိုးရိုးပြောခြင်းမဟုတ်ဘဲ
လေပူများကိုမှုတ်ထုတ်ရင်း ရှုံ့မဲ့သောမျက်နှာထားဖြင့် ပြောလာခြင်းဖြစ်၏ ။ ပန်ကာဖွင့်ထားသော်လည်း သန့်၏မျက်နှာထက်တွင် ချွေးအချို့ထွက်နေခဲ့လေသည် ။ ထို့နောက် သန့်က ခန္ဓာကိုယ်ကိုဟ်ိုလှုပ်သည်လှုပ်ဖြင့် အာရုံများကိုလည်းစာဆီတွင်မထားဘဲ နေရာအနှံ့သို့ပို့လွှတ်နေ၏ ။သူကသာ ဂနာမငြိမ်ဖြစ်နေသော်လည်း ကောင်းကတော့ ရှိသမျှအာရုံများကို စာထဲတွင်သာအပြည့်အဝပုံအပ်ထား၏ ။ ကောင်း၏ဖြူသောမျက်နှာတွင် ညိုသောမျက်ကွင်းများမှာ သိသိသာသာ ။ နဂိုပိန်သော်လည်း ယခုလိုမျိုးစာမေးပွဲကာလတွင် ကောင်း၏ခန္ဓာကိုယ်မှာ ပို၍ပင်ပိန်သွားလေသည် ။
" ကောင်း "
ကောင်းက သူ့ကို မျက်လုံးအကြည့်ဖြင့်သာ တုံ့ပြန်လာ၏ ။
" စာတွေကရပြီးသားမို့လား ၊ အများကြီးမကြိုးစားလဲ မင်း အောင်ပါတယ်ကွာ... အေးဆေး...အေးဆေး "
လက်ထဲရှိခဲသားဘောပင်ကို စာအုပ်ပေါ်ချလိုက်ပြီးမှ သန့်၏မျက်နှာကို တည့်တည့်ကြည့်လိုက်တော့ ရှိသမျှသွားများပေါ်အောင်ပြုံးရင်း မျက်နှာချိုသွေးပြလာသည့် သန့်ကြောင့် ပြောမည့်စကားများပင် မေ့တေ့တေ့ ။ အဆူခံရတော့မည်ကိုသိနေဟန်ဖြင့် သန့်က နောက်ဖေးဘက်ကိုလက်ညှိုးထိုးပြီး
" ရှူးပေါက်ချင်လို့ "
ဆိုသည့်စကားနှင့်အတူ ထိုင်နေရာမှ ကပျာကယာထကာ နောက်ဘက်သို့အမြန်အဆန်သွားလေ၏ ။
စာလုပ်နေသည်မှာ အချိန်အားဖြင့်တစ်နာရီကျော်သာရှိသေးသော်လည်း သန့်ကတော့ ရှူးပေါက်ဦးမည် ၊ ရေသောက်ဦးမည်ဆိုသော အကြောင်းပြချက်မျိုးစုံဖြင့် အကြောင်းမရှိအကြောင်းရှာနေသည်မှာ အကြိမ်ရေမနည်းတော့ပေ ။
YOU ARE READING
သံယောဇဉ်မြစ်ကို လွှမ်းခြုံထားတဲ့ မေတ္တာတိမ်စိုင် (Complete)
Romanceဒီဘဝတွင်တော့ သန့်မင်းဉာဏ်မှလွဲပြီး ဘယ်သူ့ကိုမှ မချစ်နိုင်ပါ... (ကောင်းသုတကျော်) ဒီဘဝတြင္ေတာ့ သန့္မင္းဉာဏ္မွလြဲၿပီး ဘယ္သူ႕ကိုမွ မခ်စ္နိုင္ပါ... (ေကာင္းသုတေက်ာ္) 25/11/2022-----30/6/2023