Unicode
" Happy Birthday ကောင်း "
အသံတိုးတိုးနှင့်အတူ ပါးပေါ်ကိုကျရောက်လာသည့် အနမ်းနွေးနွေးကြောင့် ကောင်း၏မျက်လုံးများမှာဖျတ်ခနဲပွင့်သွားပြီး ဘေးဘက်တွင်ထားထားသည့်ဖုန်းကိုယူကြည့်မိ၏ ။ နေ့သစ်တစ်ခုဆီသို့ကူးပြောင်းစအချိန်တွင် ပထမဆုံးကြားလိုက်ရသည့် မွေးနေ့ဆုတောင်းစကားမှာ ရိုးရိုးရှင်းရှင်းဖြစ်နေခဲ့သော်လည်း ထိုဆုတောင်းစကား၏ပိုင်ရှင်မှာ သန့်ဖြစ်နေသည့်အခါ ဝမ်းသာစိတ်မှာလှိုက်ခနဲ ။ စောစောအိပ်ချင်သည်ဆိုပြီး အိပ်ရာထဲကိုဝင်သွားခဲ့သည့် သန့်က သူ့မွေးနေ့ကို သတိတရဆုတောင်းပေးလာပြီး နူးညံ့သိမ်မွေ့လှသောအနမ်းကိုလည်း လက်ဆောင်ပေးသေး၏ ။
ဖုန်းမီးကိုဖွင့်၍ သန့်နှင့်သူ၏ကြားရှိနေရာတွင်ထားလိုက်ပြီးမှ ဘေးဘက်ရှိ သန့်၏မျက်နှာကိုကြည့်လိုက်တော့ ပက်လက်အနေအထားဖြင့် မျက်လုံးပိတ်ကျသွားအောင်ပြုံးပြလာသည့်အတွက် အသည်းတယားယားဖြစ်သွားပြီး ပါးပြင်လေးကိုဖွဖွလိမ်ဆွဲမိ၏ ။ ချစ်သူများဖြစ်သွားကြသော်လည်း သူတို့နှစ်ယောက်၏အနေအထားမှာ ထူးထူးဆန်းဆန်းပြောင်းလဲသွားခြင်းမျိုး မရှိပေ ။
" မွေးနေ့ဆုတောင်းပေးဖို့ အိပ်ဟန်ဆောင်နေတာပေါ့...ဟုတ်လား "
" အင်း "
" အိပ်ရေးပျက်ခံလို့ကွာ ၊ မနက်မှ ဆုတောင်းပေးလဲရတာကို "
" ငါ့ကောင်လေးကို သူများထက်ဦးအောင် ဆုတောင်းစကားပြောပေးချင်လို့ပါ "
ဘာမှမဟုတ်သည့်စကားလေးဖြစ်သော်လည်း ထိုစကားက ကောင်းအတွက်တော့ ပျားရည်လေးလိုချိုချိုမြိန်မြိန် ။ အိမ်မှာသာဆိုလျှင် သန့်ကို အားရပါးရဖက်၍ စကားများများပြောမိနိုင်သော်လည်း သူများအိမ်သို့ဧည့်သည်လာလုပ်နေရသဖြင့် ကြည်နူးစိတ်ကိုထိန်းချုပ်ပြီး နှုတ်ခမ်းကိုက်၍သာပြုံးနေရတော့သည် ။
" ငါ့ကောင်လေးဟုတ်လား "
" အင်းပေါ့...ငါ့ကောင်လေးမဟုတ်လို့ ဘယ်သူ့ကောင်လေးဖြစ်ရမှာလဲ ၊ ကောင်းသုတကျော်က သန့်မင်းဉာဏ်ရဲ့ကောင်လေး "
YOU ARE READING
သံယောဇဉ်မြစ်ကို လွှမ်းခြုံထားတဲ့ မေတ္တာတိမ်စိုင် (Complete)
Romanceဒီဘဝတွင်တော့ သန့်မင်းဉာဏ်မှလွဲပြီး ဘယ်သူ့ကိုမှ မချစ်နိုင်ပါ... (ကောင်းသုတကျော်) ဒီဘဝတြင္ေတာ့ သန့္မင္းဉာဏ္မွလြဲၿပီး ဘယ္သူ႕ကိုမွ မခ်စ္နိုင္ပါ... (ေကာင္းသုတေက်ာ္) 25/11/2022-----30/6/2023