Unicode
တို့ဟူး ၊ ကြက်သွန် ၊ ပြောင်းဖူး ၊ အာလူး ၊ မြင်းခွာရွက်များကိုကြော်ထားသည့် အကြော်စုံပူပူနွေးနွေးများမှာ ခပ်လတ်လတ်စတီးလင်ပန်းနှင့်အပြည့် ။ ထိုအကြော်များနှင့်တို့စားရန်အတွက်လုပ်ထားသော အချဉ်မှာလည်း ရန်ကုန်ရှိအကြော်ဆိုင်များတွင်သုံးသည့် အနီရောင်အချဉ်မျိုးမဟုတ်ဘဲ မန်ကျည်းသီးအမှည့်ကို ရေနွေးနှင့်စိမ်ပြီးမှလုပ်သည့် အချဉ်ဖြစ်ကာ ဂျင်း ၊ ကြက်သွန်ဖြူများလည်းပါသဖြင့် မွှေးကြိုင်လှလေသည် ။
ပုလဲ တို့ဟူးကြော်တစ်ခုကို အချဉ်နှင့်မတို့ဘဲ သည်အတိုင်းစားကြည့်ပြီးနောက် လက်မကိုပါထောင်လိုက်မိသည် ။
" ဟဲ့...နင်တို့တွေ တို့ဟူးကြော်ကိုလဲစားကြည့်အုံး ၊ အရသာကတော့ရှယ်ပဲ...သိလား ၊ အချဉ်နဲ့အစိမ့်အရသာကို ရောထားတာမျိုးဟ "
ပုလဲ၏စကားကြောင့် သန့် စားလက်စပြောင်းဖူးကြော်ကို ကောင်း၏လက်ထဲထည့်ပေးလိုက်ပြီးမှ တို့ဟူးကြော်တစ်ခုကိုယူကာ စားကြည့်မိတော့ ပုလဲပြောသလိုမျိုး အရသာတော်တော်ကောင်းနေ၏ ။
နံနက်ကလည်း ပျဉ်းမနားမြို့ထဲကိုသွားပြီး နာမည်ကြီးနေသည့်တို့ဟူးသုပ်ကို သူတို့အုပ်စု အဝအပြဲစားခဲ့ကြသေးသည် ။ ရန်ကုန်ရှိတို့ဟူးမှာ ခပ်ပျော့ပျော့ပုံစံမျိုးဖြစ်ပြီး သည်ကတို့ဟူးကတော့ ခပ်မာမာဖြစ်ကာ အရသာကလည်းပိုကောင်းနေခဲ့၏ ။
" ကောင်းလား သန့် "
" အင်း... ကောင်းတယ် ၊ မင်းလဲစားကြည့်ပါလား "
" လက်ထဲကဟာကုန်မှ စားကြည့်လိုက်မယ် "
" အင်း...အင်း ၊ ဒီအတိုင်းမစားနဲ့နော် ကောင်း ၊ အချဉ်လေးနဲ့တို့စားချေ "
" အင်းပါ "
" အဟွတ်...အဟွတ်...အဟမ်း "
အဖြစ်သည်းနေကြသည့် ထိုနှစ်ယောက်ကြောင့် ပုလဲ အသံအကျယ်ကြီးဖြင့်ချောင်းဆ်ိုးလိုက်တော့ ယုယက ပုလဲ၏နောက်ကျောကိုဖွဖွပုတ်ပေးရင်း သဘောတကျရယ်မောလေသည် ။ သန့်နှင့်ကောင်းကလည်း အချင်းချင်းစကားပြောနေခြင်းကိုရပ်၍ အကဲခတ်လိုက်ပြီးနောက် ရယ်ကျဲကျဲဖြစ်နေသည့်ပုလဲ၏မျက်နှာထားကြောင့် တကယ်ချောင်းဆိုးနေခြင်းမဟုတ်ဘဲ ဟန်လုပ်၍ချောင်းဆိုးနေခြင်းဖြစ်ကြောင်း သိရှိသွား၏ ။
YOU ARE READING
သံယောဇဉ်မြစ်ကို လွှမ်းခြုံထားတဲ့ မေတ္တာတိမ်စိုင် (Complete)
Romanceဒီဘဝတွင်တော့ သန့်မင်းဉာဏ်မှလွဲပြီး ဘယ်သူ့ကိုမှ မချစ်နိုင်ပါ... (ကောင်းသုတကျော်) ဒီဘဝတြင္ေတာ့ သန့္မင္းဉာဏ္မွလြဲၿပီး ဘယ္သူ႕ကိုမွ မခ်စ္နိုင္ပါ... (ေကာင္းသုတေက်ာ္) 25/11/2022-----30/6/2023
