အိုမီဂါအဖြစ် ကူးပြောင်းပြီးနောက် ပွဲဆူသွားရပြီ ( BL ) (Completed)

128

Chapter 128

ညနေပိုင်းတွင်ကျင်းပမည့် သတင်းစာရှင်းလင်းပွဲတွင် ဒုတိယမင်းသား၏ပုံကို ဖော်ထုတ်မည့်အကြောင်းနှင့် ပတ်သက်၍ ကွန်ယက်ပေါ်တွင် ကြီးမားသော ဆွေးနွေးမှုများ ဖြစ်ပေါ်လျက်ရှ်သည်။ Hot searchတစ်ခုလုံးတွင်လည်း ဤကိစ္စများဖြင့်သာ ဖုံးလွှမ်းနေသည်။

ဆက်ခံသူက ပထမမင်းသား သို့မဟုတ် ဒုတိယမင်းသားသာဖြစ်မည်ဟု အားလုံးက ခန့်မှန်းနေကြသည်။

အကြီးဆုံးမင်းသားလော့ယီက ငယ်ရွယ်စဉ် ကလေးဘဝတည်းက ပစားပေးခံသူဖြစ်သည်။ သူက အင်ပါယာကြယ်မြို့တော်တွင် ကြီးပြင်းခဲ့ပြီး ပညာတတ်တစ်ယောက်ဖြစ်သည်။ နိုအာစစ်တက္ကသိုလ်မှ ဘွဲ့ရပြီးသည့်နောက်တွင် တပ်ထဲတွင်လည်း အောင်မြင်မှုအချို့ ရပြီးသူဖြစ်သည်။ ထိုမျှသာမက ဖယ်ရိုမုန်းကိုက်ညီမှု ၉၀%ရှိသည့် ပါတနာလည်းရှိသည်။

ဆန့်ကျင့်ဘက်အားဖြင့် ဒုတိယမင်းသားမှာမူ ကလေးဘဝတည်းက စွန့်ပစ်ကြယ်သို့ နှစ်ထုတ်ခံခဲ့ရသည်။ သူ၏ အထောက်အထားနှင့် မည်သည့်နေရာတွင် နေထိုင်သည်ကို မသိကြသည့်အပြင် သူ့ထံတွင် တော်ဝင်မိသားစုသွေး ပါနေသည်မှလွဲ၍ ဘာမှမရှိပေ။

သို့ဖြစ်၍ လူအများစုက လျှို့ဝှက်ဆန်းကြယ်သော ဒုတိယမင်းသားနှင့်ပတ်သက်၍ အကောင်းမြင်စိတ်မရှိကြပေ။

ညနေဘက်တွင် တော်ဝင်မိသားစုက ခမ်းနားသည့် သတင်းစာရှင်းလင်းပွဲကျင်းပရန် ပြင်ဆင်နေကြသည်။

ဤသတင်းစာရှင်းလင်းပွဲကို တော်ဝင်နန်းတော်၏ ရွှေရောင်ညီလာခံခန်းမတွင် ကျင်းပမည်ဖြစ်သည်။

နန်းတော်၏ ဝတ်ရုံရှည်များထားသည့်အခန်းတွင် လော့ဝမ်ချွမ်းက ဝတ်စုံရွေးနေသည်။

ထိုကဲ့သို့ ခမ်းနားကြီးကျယ်သော အဝတ်အစားများ ဝတ်ရသည်ကို သူ သဘောမကျသော်လည်း စိတ်ရှည်လက်ရှည်ဖြင့် တိတ်တိတ်ဆိတ်ဆိတ်သာ ရွေးချယ်နေ‌သည်။ အဘယ့်ကြောင့်ဆိုသော် ကင်မရာရှေ့တွင် သူက ဒုတိယမင်းသားဖြစ်ကြောင်း ဖော်ထုတ်တော့မည်ဖြစ်ပြီး သူ့ပုံကိုလည်း ယွမ်ရှင်းကျဲက မြင်တွေ့မည် ဖြစ်သောကြောင့်ပင်။