အိုမီဂါအဖြစ် ကူးပြောင်းပြီးနောက် ပွဲဆူသွားရပြီ ( BL ) (Completed)

133

Chapter 133

လော့ဝမ်ချွမ်းက အမြဲတမ်းတသီးတသန့်နေတတ်ပြီး ဂုဏ်သိက္ခာရှိသူတစ်ယောက်ဖြစ်သည်။ သူက စွန့်ပစ်ကြယ်မှ လာသူတစ်ယောက်ဖြစ်သော်လည်း စွန့်ပစ်ကြယ်မှကျောင်းသားများနှင့် နှိုင်းယှဉ်၍ပင်မရချေ။

ယွမ်ရှင်းကျဲ ဝတ္တုကို ဆက်ဖတ်လိုက်သည်။

[ လော့ဝမ်ချွမ်း၏ဘဝက ကံဆိုးမိုးမှောင်ကျရန်သာ ကံကြမ္မာဖန်လာပုံရသည်။ သူက ဆာလောင်ခြင်း၊ လုပ်ကြံခံရခြင်းနှင့် ခိုးဆိုးလုယက်မှုများကို ကြုံတွေ့ခဲ့ရသည်။ အမှောင်ဖုံးနေသည့် ပတ်ဝန်းကျင်တွင်သာ ကြီးပြင်းခဲ့ရသော်လည်း အသက်ခုနစ်နှစ်မတိုင်မီ သင်ကြားခဲ့ရသော ကျင့်ဝတ်များဖြင့်သာ အပေါ်ယံတွင် နေထိုင်ခဲ့သည်။ သို့ရာတွင် အမှန်တကယ်၌ လော့ဝမ်ချွမ်းက သွေးဆာနေသည့်သားရဲတစ်ကောင်ဖြစ်ကြောင်းကို ဖုံးကွယ်ထားခြင်းဖြစ်သည်။ ]

ထိုစကားလုံးများက လော့ဝမ်ချွမ်းအပေါ် ယွမ်ရှင်းကျဲ၏ ထင်မြင်ချက်များနှင့် ကိုက်ညီသည်။

လော့ဝမ်ချွမ်းကို ရှင်းဟိုင်းတက္ကသိုလ်ပြိုင်ပွဲတွင် ယွမ်ရှင်းကျဲ ပထမဆုံးအကြိမ် တွေ့ခဲ့စဉ်က လော့ဝမ်ချွမ်းတွင် ဝိရောဓိဖြစ်မှုများဖြင့် ပြည့်နေသည်ဟု ခံစားခဲ့ရသည်။

၎င်းကို သူ၏တိုက်ခိုက်သည့်ပုံစံက သက်သေပြနေသည်။

လော့ဝမ်ချွမ်းက သူ့ပြိုင်ဘက်များကို တန်ပြန်တိုက်ခိုက်ခွင့် မပေးပေ။ သူ့လှုပ်ရှားမှုများက သေလုနီးပါး ထိခိုက်ဒဏ်ရာရစေသော်လည်း ပြိုင်ပွဲပြီးသည်နှင့် ပြိုင်ဘက်ကို ယဉ်ကျေးစွာသာ ‌ဦးညွတ်ပြီး ထွက်သွားလေ့ရှိသည်။

[ ဤသို့ဖြင့် သူက အခြားလူများနှင့် ချစ်ကျွမ်းဝင်ရန် အခွင့်အရေး မရှိခဲ့သည့်အပြင် ဘုရားသခင်ကလည်း သူ့ကို ချစ်သူရွေးချယ်ခွင့်မရအောင် ပြုလုပ်ထားသည်။ လော့ဝမ်ချွမ်းက အိုမီဂါဖယ်ရိုမုန်းများနှင့် ဓာတ်မတည့်သည့်ရောဂါရှိပြီး သူနှင့်ကိုက်ညီမှုမြင့်သော အိုမီဂါကိုလည်း ရှာမတွေ့နိုင်ခဲ့၍ သူ့ရင်ထဲတွင် မုန်းတီးမှုများ ပိုမိုများပြားလာသည်။ ကံကြမ္မာကို မုန်းတီးခြင်း၊ ဘုရင်ကို မုန်းတီးခြင်းနှင့် သူ့ရန်သူများကို မုန်းတီးခြင်းတို့ဖြစ်သည်။ ]