يمكن كنت مفكرني ببالغ لما قول مافيي عيش بلاك و تقول انو انا هيك هيك عايشة بعيد او يمكن حتى تقول انا قبل كنت عايشة بلاك و شو تغير لما عرفتك. القرب يلي بيني و بينك ما بعمري وصلتلو مع حدا، ما كنت متخيلة بفترة قصيرة ممكن صير هلقد قريبة من شخص و شب بالاخص. بدك تعرف شو يعني مافيي عيش بلاك؟ يعني بس اتذكرك بزعل و ببكي لأنو بشتقلك و يعني بس انبسط بدي ياك حدي و بس ازعل بدي ياك حدي بدي خبرك بدي تكون معي و تعرف اول شخص، يعني لما تكون بعيد اعطل همك و خاف عليك فكر بتفاصيل نهارك.. شو عم يعمل؟ عم ياكل، عم يشرب؟ مرتاح؟ يعني حس بفراغ و وحدة لو كنت بين ١٠٠ شخص لأن انت ناقصني. يعني اتقبل كلشي سيء اصبر لأنو وجودك معي مهم بحياتي كتير.. يعني قد ما انبسطت بحس ناقصني انت حتى يكمل كلشي معي، و بس ازعل اشتهي عبطة منك كرمال ارتاح. يعني مافي حدا بالدني قادر يعبي مطرحك لو شو ما صار.. يعني انك اهم شخص عندي و وجودك بيغنيني عن كتير عالم لأنو لقيت فيك الرفيق و الاخ و الحبيب، بوجودك بحياتي ما كنت بحاجة لبنت حدي ولا لرفقا ولا شباب يعطوني اهتمام، حتى لو الاهتمام منك مش متل ما انا بحب ولا بعمري فكرت الجأ لحدا غيرك. بس امشي بالمنطقة بتذكرك، بس شوف شب في لمحة منك بتذكرك، بس فوت البوم صور بتذكرك، بس نام و بس فيق و بس اصفن و بنص افكاري بتذكرك. انت عايش ببالي و عايش بقلبي كمان. مبارح طلعلي فيديو لمراد و تذكرت لما صرت تحضر وادي الذئاب من الفيس بوك يلي الي و شفت كتير اشيا بتذكرني فيك بضحك شوي بعدين بزعل. انا مش قد الفراق و انا شخص ضعيف بهل الامور، بعرف غلط و عم حاول ساعد حالي. بتعرف ما الي قلب ارجع شم ريحتك؟ بحس اذا بس المح القنينة رح موت بكي، اي انا ببكي على كلشي بس مش يعني انا ولد. انا هيك بعبر عن زعلي لو ما انت مهم ما ببكي هلقد عليك.. مبارح كنت قاعدة عم فكر انو سبحان الله من بين كل العالم بالدني و كل العالم يلي قريبة و هيك، ليش انا حبيتك انت بالذات؟ ليش اتعلقت فيك هلقد و تمسكت فيك و حبيتك؟؟ ليش انت؟ ليش كل هيدا و انا اصلاً ما لقيت الاهتمام و الشي يلي بدي ياه معك؟ مش عم قول انك ما بتهتم بس انت ما بتعبر و عندك هيك اشيا مش مهمة و مش وقتا.. ليش انت فتت على قلبي و ما عم تطلع منو؟ شو هل صدفة يلي جمعت بيني و بينك حتى نصير قراب هلقد و نحن كتيررر بعاد عن بعض و كتير منختلف عن بعض! قريت اليوم الصبح انو في عالم اول كل العالم عاشت في قبل ما تجي على الدني و بعدين جينا على الدني و بأول عالم كنا نلتقى بكتيرر اشخاص فبالحياة هيدي ممكن نحس حالنا منعرف شخص من زمان و نكون عنجد كنا نعرف بعض قبل.. معقول انا وياك كنا منعرف بعض هونيك؟ انت ما بتحس حالك كأنك بتعرفني من زمان؟ مستحيل انا كون بنت عادية بالنسبة الك، كلشي بيناتنا غيرررر. انا مابدي تفكر انو عايشة حياتي عادي بلاك و مبسوطة و ملتهية انا عنجد كل ثانية مشتاقتلك و بفكر فيك و بدعيلك و بزعل عليك و بحنلك و بتذكرك و بتذكر كلشي بيخصك و بقعد بقرا محادثات قديمة و بين بضحك و ببكي بنفس الوقت على ذكرياتنا. انت كلشي بالنسبة الي انت اهم شخص عندي انا مغرومة فيك انا بلاك ضايعة و مش مرتاحة و بدي ياك حدي بدي ياك مرتاح و ما بدي يكون ناقصك شي. انت فتت على حياتي غيرتلي كلشي نسيتني كلشي و حببتني فيك اكتر ما انا كنت عم حبك. انت هدية من الله مافيي اخسرك بكون خسرت اهم شي بحياتي و مابدي عيش هيك خسارة انا ما بتحمل انا بموووت بلاك. اليوم شفت مياو بالطريق تذكرتك و كيف كنت دايمًا صورلك و قلك بيشبهوك.. عم تصدق كلشي بكتبو؟ عم تحس فيي؟ حاسس فيي شو مشتقتلك؟ حاسس بحبي الك؟ مين غيري بينطر حدا مش حبيبو هلقد؟ مين غيري بينطر بنص هيك مشاكل؟ مين غيري بيهتم فيك هيك و بيخاف عليك و بيدعيلك؟ شفت بعينك كلشي؟ هيدا يلي انت مرة سألتني عنو، اول ما بلشنا نحكي واتس اب (حيصير سنتين بعد شهر) انت سألتني شو ممكن اعمل كرمالك و كيف ممكن اثبت حبي الك.. هيدا مش كافي؟ ولا مرة حسيت انو انا هدية من الله الك و بستاهل كون حبيبتك على كلشي حسيتو تجاهك و تصرفاتي معك و حبي الك و صبري و كل التفاصيل الباقية ؟ ولا مرة حسيت حالك كتيرر محظوظ؟ ولا مرة حسيت انا احلى شي بحياتك؟ انا خليتك تعترف مرة بس ياريت لو انت يلي بتحكي لوحدك.. كتير بحب اعرف هيك تفاصيل. انا بعرف كلشي تغير هلق ما عاد فيي احلم كتير معك و بمستقبلنا و مصيرنا سوا، تركت الموضوع على الله. ما عندي مشكلة يصير كلشي بدي ياه بالجنة بدل الحياة، بدي ياك كيف ما كان المهم تصير الي. اصلاً هي الحياة مؤقتة هونيك اهم، ما تنسى انت قلت رح تتزوجني بالجنة. أوقات بخاف تنساني يمكن تلتهي عني.. لازم ظل ببالك، اقل شي تجازيني في. ما لازم تنساني و اطلع من بالك ولا شوي. يا ريت في شي يخليني اعرف لما تفكر فيي و شو تفكر.. على الاقل بعرف كيف بتفكر و شو بتتذكر فيي و شو الشي يلي فيي تارك اثر فيك و ما فيك تنساه.. كتير بحب هيك اشيا انا. بتمنى تكون تفاصيل انا ما بعرفها شي يكون كتير عميق مش سطحي، بحب تتعمق بتفاصيلي. بعرف انك بتحب كلشي فيي و بتركز على كتير اشيا و انا بحب كلشي فيك كمان. انت بعيوني كامل مكمل و perfect ما ناقصك شي بحبك كلك بكل حالاتك. الله يخليلي ياك و يحفظك. المفروض حنبلش بالليالي العشر الأخيرة من رمضان، رح ادعيلك كل يوم تفرج عليك و انت كمان صلي و ادعي لالله يستجاب الي و الك و ينحل كلشي و بركي شي نهار بقدر عبرلك عن حبي وج لوج، و بهيك حالة اذا رجعتلي و مافي مشاكل ما رح تخلص مني، رح ظل حدك اكتر من قبل مستحيل اتخلى عنك طول العمر. و هيك بيبطل في حجج و يتكون شفت انو انا اكتر بنت مناسبة الك و بحبك و بستاهل كون معك و تعطيني حقي بكل شي ما قدرت تعطيني ياه قبل. تصبح على خير حياتي.
