من شوي مدري شو خطرلي اقرا محادثاتنا القديمة ما قدرت كفي رح موت من البكي و مش شايفة قدامي عم حاول هدي حالي و اسكت بس مش قادرة قلبي عم يحترق من جوا انا مش مرتاحة و تعبانة كتير بدي معجزة من عند الله ينحل كلشي و ترجعلي. كنت عم اقرا اول فترة حكينا فيها على الواتس اب و شفت كيف كما نحكي كتير و ملهوفين على بعض و كيف كنت تهتم فيي و تخاف عليي تحكيني كل وقت و تشاركني تفاصيل نهارك كلو و كيف كنا نتخانق و تحاول تراضيني هلق حسيت عنجد انك كنت عم تحاول معي متل ما انا كنت عم حاول معك و في كتير مشاعر، كانت بنت اختي تحسدني عليك تقلي شو ماعندو حياة كل وقت بيحكيكي و انا ما كنت حاسة بهل نعمة الا لبعد فترة ياريت توقف الزمن بهل فترة و بقينا نفس الشي. انت كنت متل ما بدي بالضبط شو ما اطلب تعمل و تتطول بالك معي و نحكي مكالمات كتير و بعدين بس صرنا ٢٠٢٣ تغير كلشي صرت تلتهي دايماً و ما نحكي كتير كنت ازعل و اشتاق و ابكي اول فترة بعدين عطيتك مساحتك الخاصة و قلت يمكن ما بيحب او ما قادر يكون متل قبل سكتت و بعدين مرتين بالسنة نفتح موضوع علاقتنا و المشاعر من وقتا انتزع كلشيييي كلشي و غيرت بحالي بدل م انت تحاول تحكيني اكتر صرت اتقبل اشيا ما بحبا بس كرمال حافظ عليك و سكتت عن موضوع علاقتنا كرمالك بوقت انا كنت عم موت حتى صير حبيبتك. بالوقت يلي اعترفت في بحبك تصرفت معي كأنك ما بتحبني و فترة الاعجاب كان كلشي غير و احلى ما بعرف شو تغير ما بعرف ليش هملتني فترة ما بعرف ليش لما بلشنا نرجع متل اول فترة هل مرة الظروف فرقتنا و انا قلبي مش مرتاح لأنو بس قربت اوصل للشي يلي بدي ياه رجعت للصفر و يمكن لتحت الصفر كمان بلحظة انهدم كلشي و انا يمكن غبية كنت عايشة بوهم و انا كسرت قلبي بإيدي لما صرت اتأمل اشيا مستحيلة. انا كنت بستاهل حكي حلو و اهتمام و مكالمات و وقتك و حبك و مشاعرك و كلمة "بحبك" كنت بستاهل و بستحق كل هيدا بدون ما اطلب او حس حالي غلط بدون ما يكون في title بدون ما انجبر اتأقلم بشي ما بدي ياه بس كرمال ما اخسرك. اخر مرة شفتك كان كلشي غير و حلو كتيررر بعيد عن تضيع الوقت كنا عم نحكي (انا كنت عم احكي و من قلبي) و كنا مبسوطين و تقربنا اكتر و عملنا ذكريات حلوة و صرت استغرب انك صرت تحكيني شوي احسن من قبل قمت انا الهبلة عطيتك "مساحة" كرمال ما تزهق مني و تفكر بحكي كتير روحت على حالي وقت معك و صار الي صار و بعدنا عن بعض. والله تجي ايام اجبر حالي اكتب جواب بسيط حتى ما زهقك، ابكي على السكت و ما حسسك زعلت حتى ما تنجبر تراضيني (هيدا اذا حاولت لأنو اخر فترة بطلت)، عصب و اجبر حالي روق كرمال ما تكبر مشكلة ، كون مشتهية افتح موضوع بس خبي لأنو بتغيب فجأة و بتروح بدك تنام او عندك شي... مش انت كنت دايمًا انت و راجع على بيتك تدقلي و نحكي؟ ليش وقفت؟ لما شفت اخر مرة ما صدقت عيوني على كلشي صار معنا و كيف كان يوم حلو و انا كنت طايرة من الفرحة لأنك جيت كرمالي و في عاصفة و ظليت معي و غنجتني كتيررر و بتشكرك على هل النهار الحلو. اوقات بس شوف شي الحلو ما صدق و فكر رح يروح بسرعة. قلتلك قبل انت ان قبلت او لا انا كل هل فترة كنت حبيبتك ولا نهار كنت شخص عادي بس انت ما بتعرف تفكر منيح على اساس انو هيك عم تحميني صح؟ شوف شو عم يصير هلق، شو تغير؟ مفكر انو مش زعلانة على فراقك؟ والله ما بعرف شو قول انا تذكرت اشياء حلوووة كتير ياريت ترجع ياريت بجي يوم نعمل ذكريات احلى ياريت يجي يوم شوف العوض منك انت مش من حدا تاني، ياريت انت ترتاح و ترجع و تتصرف معي متل ما انا بستحق من اول الطريق. شو استفدت لما خبيت مشاعرك بقبلك؟ شو استفدت لما وهمتني انو ما بدك ياني؟ شو استفدت لما ما عبرتلي منيح و ما عطيتني حقي؟ ما بعرف ليش هيك الانسان بيضمن وجود اشيا معينة او بيغض النظر عنه بحجة في اشيا اهم و بعدين بس يفوت الاوان و يحس شو صار بيندم بس ماعاد قادر يعمل شي. الطفلة يلي جواتي كانت عم تضحك من كل قلبا معك، هلق ضايعة بلاك. المشكلة انو صرت عم خاف على حالي كتير من هل علاقة و من مصيرنا و مصيرك و كل التفاصيل، عم خاف اغرق اكتر عم خاف ما تقدر ترجعلي عم خاف يصرلك شي عم خاف انأذى عم خاف "انخرط" معك متل ما انت كنت تقول. يمكن هيدا الحكي كلو من حرقة قلبي و لأن ماعندي حدا يسمعلي اخر هل ليل و بدي ياك تقرا و تحس فيي انا شو تعبت معك و ما وصلت لشي و بتمنى بتمنى من كل قلبي تكون على الاقل حاسس فيي او مشتقلي او عم تحاول تفهمني. والله بعرف موقفك صعب و ما بينحسد عليه و قلبي و روحي و عقلي معك و خايفة عليك و عم ادعيلك بس انا كمان بشر و عندي مشاعر و بتعب و بزعل و خاصةً على زعلك انت، اوعى تفكر ناطرة منك تخبرني حتى حس فيك. انا دايمًا بحس فيك و بعرف صعوبة كلشي عم تمرق في و بعذرك و يمكن حتى حقك ما تهتم فيي ولا تقرا كلشي عم اكتبو بما انو في شي اهم. بس بدي تعرف انو انا ما ببالغ بمشاعري و ما بطلب شي مش من حقي و بدي ياك تفهمني و تحس فيي انا عنجد زعلانة تعبانة متضايقة و كلشييي. ما عم افهم شي من هل دني ولا عم افهم حكمة الله من تعارفنا و تعلقي و حبي فيك و لا عم افهم شو عبرة كلشي صار ولا عم افهم ليش بيهمك تقرا جرايد كل يوم مع كلشي عم يصير معك ولا عم افهم شي حاسة حالي ضايعة و مافي حدا يساعدني. بشو بدي ادعيلك اكتر من هيك؟ ما ظل دعاء ما دعيت في ولا ظل نذر ما نذرتو حتوصل معي ادعي ربي ياخذ سعادتي و حظي و رزقي و كلشي مني و يعطيك ياهن الك حتى شوووي بس شوي ارتاح انو انت منيح و مابدي شي تاني من الله. اوف شو شتقتلك شتقت لصوتك لحكيك لمزحك لشكلك لكلماتك و الاشيا يلي كنت تبعتا و شتقت لحنيتك و اهتمامك و سؤالك عني و كلشي حلو كنت تعطيني ياه. انا متل الطفل يلي لأول مرة لاقه سعادتو و انبسط كتير و تعود على اشيا حلوة و فجأة رجع متل قبل انهمل و ظل وحيد طبيعي كون مصدومة و زعلانة و عك خبص و طبيعي يجي ايام انهار مافيي ظل قوية او مثل انو انا قوية بالنهاية بتعب. ما بدي تزعل مني بترجاك و ما قصدي شي بهل مواضيع انا عنجد بحبك وانت بتعنيلي و مش مشكلة كلشي صار المهم تكون بخير والله عادي اذا شفتك مرتاح بنسى كل همومي و زعلي و بنسى كل احلامي.. يارب ينحل كلشي قبل رمضان لأنو انا تعبت و اكيد انت تعبان اكتر مني الله يقويك و بعطيك الصبر و يبارك فيك. كنت حابة اسمع كلمة بحبك بصوتك او لما جيت اخر مرة ياريت قلتلي ياها انت و عم تطلع بعيوني ياريت ما حرمتني من هل كلمة ياريت اهتميت فيي اكتر ياريت سمعتلي اكتر ياريت كتيرررر اشياااا. ادعيلي الله يصبرني ادعي الله يفرجها عليك ادعي ينحل كلشي ادعي كرمالك و كرمالي كمان اولاً لأنو بخاف عليك و اذا بيصيرلك شي بعيد الشر انا بموت و ثانيًا لأنو انا ناطرتك و بحبك و مشتاقتلك يعني بيهمني ترجعلي حتى لو رجعنا لل٠ يمكن فينا نتطور و نتقرب من اول و جديد و يمكن نوصل لحل يرضي الطرفين و يمكن لا بس على الاقل كون عارفة انك منيح و مرتاح و بطل في شي. الواحد ما بيحس بقيمة الشي الحلو الا ما يخسرو و هلق كل شوي عم دمع لأنو في ذكريات كتير حلوة بيناتنا هلق حسيت فيهن، دخيل اسلوبك شو كان حلو و حببني فيك اكتر و اكتر، معقول كنت تعمل كلشي بحبو قصد كرمال حبك و نتقرب؟ ياريت لو انت من نوع بتحكيلي هيك تفاصيل.. على كل حال انا بعدين بكفي بهل مواضيع لأنو حاسة حغيب عن الوعي و لازم نام. تصبح على خير عمري. الله يحفظك.
