يا عمري انا يلي بيسأل عني و بيهتم فيي دخيل قلبك شو بحبك. بشكرك كتير كتير على اهتمامك بنص انشغالك و مشاكلك يا روحي انت، ما بتتخيل شو انبسطت فيك و حسيت براحة انو في حدا مهتم و بيحبني و بيخاف عليي. انا كتير كتير محظوظة فيك، نيالي ١٠٠ مرة. من قبل ما تحكيني و انا طول وقت عم فكر فيك و كنت عم اتذكر تفاصيل كل مرة شفتك فيها و اتخيل حالي بالماضي و عم ارجع عيد لحظة لحظة معك. انا ما غلطت لما حبيتك انا ما بندم على شي معك و بتمنى لو بعرفك من قبل كرمال يكون عندنا ذكريات اكتر و نكون بحياة بعض مدة اطول. صح نحن علاقتنا مش مستقرة بتجي ايام ما منحكي و مافي شي مضمون و اوقات بزعل كتير بسبب يلي عم يصير بس مع هيدا كلو انا ما بندم على شي و بحب نظل هيك و تظل بحياتي و بحن الك بس تكون بعيد عني و بحب نكون قراب دايمًا. من اول مرة حكينا انا ما قدرت طلعك من راسي و تركت فيي اثر كبير كنت انطر نرجع نحكي مرة تانية و بدي اعترف بشي يمكن اول مرة بخبرك ياه انو اوقات كنت نزل اشيا قصد كرمال نرجع نحكي متل صوري و انطر تشوف او تعلق بشي كرمال نحكي. بعدين اذا لاحظت بس صرنا نحكي و قراب بطلت نزل شي ما عاد يعنيلي لأنو عم ابعتلك ياهن الك و انت اهم شخص عندي و عم تشوفن و تحبن. و لما كنت نزل اشيا اخر فترة مش يعني بدي الفت نظر حدا بس كمان بحب تشوف انت و ممكن امحي اي شي انت مش عاجبك. بدي اعترف بشي كمان، اوقات ما كنت حب ابعتلك الصور يلي كتير مزبطة حالي فيهن و مبين شخصيتي غير لأنو بفضل ابعتلك صور عادية انا و على طبيعتي يلي هي شخصيتي الحقيقية لما اضحك او بلا ما اعمل حركات. كتير بحب كون على طبيعتي معك و بعرف انت بتحب هيك كمان و انا اكيد صوري على انستا ما بتمثلني لأنو انا مش شخص جدي و هيك يعني انت وحيد بتعرف شخصيتي كيف و حركاتي العادية بالصور.. انا هل شي ما بفرجي لحدا ابدًا و ما برتاح بحس في شي غلط بس معك انت بقدر كون على راحتي و متل طفلة ما بخاف تحكم عليي او تستغلني او تنزعج مني. انت اصلاً كنت دايمًا تبسط الطفلة يلي جواتي و بتحسسني براحة و فرح و امان و كل المشاعر الحلوة يلي كنت بحاجة الها لما كنت صغيرة. و بعرف انك ما بتقصر و بدك ياني عيش الاشيا يلي ما قدرت اشبع منا او حس فيا و بدك تساعدني و تغنجني و تهتم فيي و تريح قلبي. شفت ليش انا بحبك؟ هيدا سبب صغير من الاسباب يا قلبي. الله زرع فيي مشاعر الحب تجاهك بشكل سريع و مفاجئ و غريب و انا لهلق بحبك متل قبل و اكتر و بعدني بحس بلهفة تجاهك و بحب نحكي و بحب اخبارك و بحب شوفك و بحب اتقرب منك اكتر و اكتر. فيك اشيا كتير كتير مميزة انا متأكدة مش الكل بيعرف بهل اشيا لو هيك كانو كل العالم تقاتلو عليك بهيك وقت صعب حدا يلاقي شخص متلك. حنون، مهضوم، قلبك طيب، قوي، طموح، حلو من جوا و من برا، عندك ثقة بنفسك، واعي، ذكي، ربع رومانسي، صريح، بتخاف الله و بعد كتيرررر اشيا بتخليك مميز عن باقي شباب. بتعرف حتى انو و تعبانة ما بقدر اغفى بلا ما ادعيلك؟ ما الي قلب نام قبل ما ادعيلك من قلبي، بحس شي غلط و مسوؤلية و لازم اعطيك حقك انت و غايب عني. انا اصلاً بحس حالي مقصرة معك و بحب اعمل اكتر حتى فرجيك حبي الك. بعرف انك بتعرف، بس كتير بحب عبرلك و احكي و شبعك اهتمام و حب مني. انت حبيبي و احلى و احسن حبيب بالكون كلو و انت اغلى شخص بالنسبة الي، حياتي بلاك بلا معنى. بحب كون معك دايمًا و نكبر سوا و نساعد بعض و نسند بعض. بدي نكبر و نتزوج و نجيب ولاد حلوين و نقعد سوا نحكي كيف تعرفنا و بشو مرقنا و كيف كلشي كان صعب بس بقوة الله و صبرنا قدرنا نتخطى كلشي سوا و وصلنا لهل لحظة الحلوة سوا. بدي كل العالم يشهدو و يشوفو نحن شو منحب بعض لدرجة بقينا سنين سوا و وصلنا لمرحلة حلوة من الحياة بعد تعب طويل. و اذا بعيد شر ما صار نصيب و ما مشي حالنا سوا بدي تعرف انو انا كان كتير كتير كتير عبالي كون مرتك و ام ولادك و شريكة حياتك بكل الاوقات و على المرة قبل الحلوة و عيشك احلى حياة و ابسطك و نسيك تعب سنين و ربي الولاد احلى تربية الكل يحكي عنن بالمنيح و كيف انت اب منيح.. و بغيرك للاحسن كرمال الله يرضى عليك و عليي و يباركلنا بحياتنا و يرزقنا.. و بدي تعرف انا بحبك كتير و مش رح انساك رح تظل بقلبي طول العمر صدقني ما رح تجي لحظة الا و انا عم اتمناك حدي و ادعيلك بالخير و بدي تعرف مستحيل تجي بنت تحبك قدي و انا اكتر بنت حبتك و ما تنساني ابدًا و تعرف انا كنت الوحيدة يلي بستحق و بستاهل تعطيني مشاعر و تكون معي و تتزوجني و نكفي حياتنا سوا، انا و بس يعني انا وبس. بحبك بحبك بحبك بحبك بحبك بحبك بحبك، ان شاء الله ما يصير الا كل الخير معنا و ما نفترق ابدًا و الله يكتبلنا احلى حياة سوا. انا ما بقدر اتخيل حياتي بلاك بس اكتب هيك اشيا دغري بدمع و بدي ابكي ما بدي يجي نهار نبعد عن بعض و اخسرك بدي ياك معي طول العمر و بدي ظل عم حبك و اهتم فيك كل وقتي و كل حياتي، بدي يجي نهار نكون ببيت واحد و بنفس تخت اعبطك و اغفى و اتصبح بوجك و عيونك الحلوين و قوم اعملك اكل و طعميك بايدي و دللك و اعملك كلشي بدك ياه خلي كل دني يحسدوك عندك بنت بتموت فيك و بتهتم فيك صبح و ليل و عايشة حياتها كرمالك. الله يخليلي ياك و ما يحرمني منك ابدًا ابدًا يا كل الدني انت يا روحي يا عمري يا حياتي يا كلشي بالنسبة الي يا غالي انت، سبب سعادتي و قوتي و راحتي يا حبي انت يا غرامي يا عيوني و سندي و حبيبي. بحبك لتخلص الدني.
