مبارح المغرب تقريبًا كنت عم شوف إنستغرام الشغل و لأنو مربوط بالفيسبوك حاطين صورتك و صورة كم شخص فريند عندي و مكتوب join now هيك شي ف انتبهت انو الصورة غير رجعت نزلت الفيسبوك لقيت الصورة الجديدة اول شي رجعلي كتير ذكريات هيدي الصورة اساس كلشي مشاعر تجاهك و انعجبت فيك وقت شفتا، المهم انا كتير بحب هي الصورة كتير طالع حلو فيها بتجنن. شفت كمان انت شو منزل الصراحة تضايقت شوي لأنو كتير بخاف عليك و مابدي تتعقد الامور انا اكيد بفهمك و ما بلومك بس بدي تنتبه منيح و تحسب حساب كلشي. بغض النظر عن كلشي، شو هل جمال كلو؟ يؤبرني شو طالع حلو يؤبرني حركاتك و نظراتك و حكيك يؤبرني كلشي فيك. يا عمري انا شو مشتاقتلك و مشتاقة لكلشي فيك و لصوتك اهم شي، دخيل صوتك شو حلو. عم تدعي و تصلي؟ انا من ناحيتي اكيد و عندي اهم شي بنهاري ادعيلك و خاصةً لما صلي حتى الله يسمعلي و يغير الاقدار. مش بإيدي لما خاف و فكر عم حاول قد مافيي لهي حالي و استغل الوقت للدعاء بدل الافكار السلبية بس والله كتير صعب. ما بعرف شو عم يصير معي يلي بعرفو انو ضايعة و راسي مش معي كلو بسببك و بسبب حبك بس بدي اعرف انت شو عامل فيي حتى ما عم اقدر انساك.. لو عاملي سحر مش هيك! سبحان الله يلي زرع مشاعر الحب فيي تجاهك، شي مش طبيعي. نيالك بهل حب كلو و نيالك انو عندك بنت بتموت فيك و ما بتنساك و متمسكة فيك.. نيالك عندك بنت ما بتفقد الامل و بتخاف عليك و بتدعيلك و بتفكر فيك و بتقعد كل يوم تكتبلك جرايد. نيالك انو شو ما عملت هي ما بتركك و ما بتشوف غير المنيح يلي فيك. عنجد نيالك بكلشي انا بحسدك على حالي لأنو انا بتمنى حدا يحبني هيك و مش عم استهون بمشاعرك او شي و بعرف رح تقول شب غير البنت و ظروفك و حياتك ما بتسمح تركز على الحب و المشاعر، بس انا مش عم سمع حكي او عم قارن انا عم كون صريحة معك شو كانو احلامي او توقعاتي من شخص بيحبني. يعني كلشي انا بعملو بتمنى يلي بيحبني يعملو و اكتر كمان، هيك انا بكون مرتاحة و مبسوطة من قلبي.. مع هيدا انا ولا مرة كان عندي مشكلة بأسلوبك او طريقة حبك الي. انا انظلمت طول حياتي من اقرب الناس الي ولا مرة حدا عبرلي و حسسني انا مهمة كرمال هيك انبسط قد الدني بس تهتم فيي و تعبرلي. انا حتى رفقة ما عندي ماعندي حدا قريب ما عندي حدا بيهمو زعلي ماعندي حدا حاطني اولوية. مش عم قول اهلي ما بيحبوني بس انا شخص انهملت بأهم فترة من حياتي و من وقتا ولا مرة حسيت عكس هيك فكتير اوقات بتمنى من كل قلبي لاقي حدا يعوضني عن الإهمال يلي مرقت في و بتمنى كتير اشيا ان شاء الله الله بيعوضني كلشي بعرف الله ما بينسى حدا. انا ما قصدي شي بهل حكي عم فضفضلك بس. من كم يوم لما كنت بالجامعة و بمكتب الدكتورة و في شبابيك كبار و كانت كابسة شتي مش طبيعي و صوت رعد قوي قالتلي انتِ شكلك ما بتحسي بالأمان ابدًا و واضح انو كلشي بيوترك فقلت صح انا من زمان هيك و سألتني اذا لقيت حل قلت لا و هي قالت يمكن هيدا شي من وقت كنت صغيرة و كبر معي.. قلتلا انو حاولت لاقي حلول بس ما لقيت نتيجة و حكيت عن الدكتورة النفسية يلي رحت عندا فهي دغري قالت انت مشكلتك ما بتحكي لحدا اذا تعودتي تحكي رح تفرغي المشاعر السلبية و ترتاحي يمكن تبطلي تتوتري من ابسط الامور متل الشتي و صوت الرعد. هلق اكيد تغيرت كتير اشيا متل انو عم ظل بالجامعة لوحدي عادي و عم اكل و عم حاول اتعرف على عالم و كون اجتماعية و عيش حياة طبيعية بس بيظل في شوية توتر صار جزء مني مافيي اخلص منو على الاخر بس اكيد فيي حاول اتأقلم معو و ما خلي يأثر فيي بطريقة سلبية. آسفة حكيت كتير عن حالي و انا مفروض كون بس عم اكتبلك الك و عبرلك عن مشاعري و بس. حطيتلك اغنية كمان بتعبر عن مشاعري تجاهك سمعها منيح.. الله يحميلي ياك و يحفظلي ياك و ما يحرمني منك ابدًا، بحبك كتيرررر كتيررر حبيبي.
