انتبهت الجزء يلي قبل مافي هيدي الصورة يلي كنت عم احكي عنا ف ضروري اكتبلك جزء جديد و تشوف الصورة كتير مهمة و كتير ارتاح بالي بش شفتا من كم يوم. انا كتير محظوظة فيك و بحبك و مبسوطة فيك مش مصدقة عندي هيك شخص بحياتي دخيل قلبك شو بحبك. ملاحظ كل ما نحكي منطول كتير؟ مبارح تقريبًا ٤ ساعات و كل مرة منحكي منطول كتير و ما منشبع من بعض الوقت بيمشي بسرعة كتير سبحان الله. انت أغلى شخص عندي بكل الكون، وجودك شي أساسي بحياتي و اذا ما كنت موجود انا ما عندي سبب ظل عايشة. انت كل كلمات الكون يلي بتعبر عن الحب قليلة عليك لأنك بتستاهل اكتر و لأنك مميز لازم الكلمات يكونو جداد و ما حدا يستعملن غيري و يكونو بس الك. انا ما بتخيل ممكن يكون في حدا يحبك قدي و الحب يلي بحبك ياه ما رح يصير في متلو ٢ بهل عالم لأنو حب كتير صادق و حلو ما في ولا ١٪ مصلحة او تمثيل. و انا كتير بلاحظ و خاصةً على البنات انو كل همن هل فترة شخص عندو اسم و غني و عندو املاك و الا ما بتقبل حتى تحكي معو و بدا تستغلو حتى لو حبتو بدا شي بالمقابل و قليل يلي عم يدورو على شخص طبيعي و راكز و واعي و فاهم و قوي.. و كمان في شباب بيدورو على بنت حلوة و بس ما بدو شي اهم من هيك و ممكن حتى ما يرتبط معا يعني بس يتسلى و يروح و ممكن لما يتزوجو يخونا مع وحدة احلى بنظرو.. فكرمال هيك انا بخاف يكون مصيري بشع مع حدا مش منيح و بدو يستغلني و سبحان الله الي فترة مافي حدا بحياتي غيرك و انت كتير منيح و ما استغليتني ولا اذيتني و حسستني انك الشخص المناسب يلي انا عم دور عليه و بدي ياه. انا من زمان كنت حاطة ببالي من ٤ سنين تقريبًا انو ما بدي احكي شباب او فوت بعلاقات سخيفة و مؤقتة لأنو كبرت و سمعتي كتير مهمة كبنت ما بيصير كون مع مين ما كان و العالم ما بترحم ولا بتنسى ف اخدت هل قرار و مشيت في لما تعرفنا و شفت ظروفك و مشاكلك تراجعت عن قراري لأنو بدي كون معك بأي طريقة ما بدي ضيعك من ايدي و اندم و قررت كون صبورة و شوف الايام وين رح توصلنا. انت كتير مأثر على حياتي لدرجة كتير غيرت فيها كرمالك و كرمال نبقى سوا و صرت بس خطط لأي شي بحياتي للمستقبل تكون انت معي بكلشي، ولا مرة تخيلت او خططت شي بلاك دايمًا بحسب حساب وجودك معي و كيف لازم زبط حياتي بطريقة تناسبك. بتعرف كمان كيف كنت بنق و عنيدة و نكدية و بعمل مشاكل و كرمالك تغيرت و كمان صرت بفكر بطريقة ايجابية و غيرت طريقة لبسي و موضوع سوشل ميديا و هيك. انت الك فضل كبير عليي و غيرتني للأحسن و انا بحب هل شي فيك و متأكدة طول ما نحن سوا انا عم اتغير للأحسن و الله رح يرضى عليي و عليك لأنك السبب بهل تغير. الله يخليلي ياك و ما يحرمني منك و يحفظك يا قلبي انا ما بقدر عيش بلاك صدقني، كرمال هيك بقلك حياتي سودا بلاك و ما عاد في لزوم عيش اذا انت مش موجود لأنو انت خططت لكلشي يكون معك طول هل سنتين و ما بقدر فجأة كفي حياتي بلاك. انت كتير مهم بالنسبة الي و كتيررر بتعنيلي و انا كتير بحبك اكتر من ما انت بتحبني و مشتاقتلك قد الكووون كلو و حابة شوفك و كون حدك. انا باخد منك القوة لأنك قوي و قد حالك و بتعرف تتصرف و بتعرف شو تحكي و شو ما تحكي، يعني كتير واعي و راكز و هل شي كتير حلو فيك و انا بس احكي معك دغري بنعدا منك و بصير اخد منك هل صفات. مش يعني انا كتير ضعيفة بس انا بحاول قد ما فيي كون قوية اوقات بتزبط اوقات لا، لما كون معك بصير قوية و عندي امل بالحياة و بالي مرتاح و كلشي بيصير حلو و سهل. الله يوفقك بكلشي عم تعملو و ينصرك و يحميك و يسهل امورك و يرتاح بالك توصل لكلشي بدك ياه و بتمنى كون حدك بكل خطوة. انا ما توقعت لاقي الشخص المناسب بهل عمر او بفترة قصيرة اكتشف انو فيك كلشي انا بدي ياه، و تعلقت فيك كتير و تمسكت فيك لدرجة ما عاد بدي غيرك و ما بتقبل فكرة شب تاني يجي ياخد مطرحك انت بتستاهل تكون معي لأنك منيح و ما بتستغلني و بتخاف عليي و بتحبني و بتهتم فيي و بتخليني ارتاح و حس ب امان و كون على طبيعتي معك. مستحيل اقبل كون مع حدا غيرك و يجي يقرب عليي. بحبك انت و بس و انا الك انت و بس ممنوع حدا غيرك يقرب عليي او يحبني بدي بس انت تحبني. حبك اغلى و احلى هدية من الله و اعظم انجاز.
