كيفك يا روحي؟ بعتذر على كلشي صار من يومين و بعتذر لأنو زدت هموم على همومك و عصبتك و خليتك تفكر انو انا مش حاسة فيك ولا فاهمة عليك. انا مقدرة ضروفك و بعرف كلشي صعب، انا ما قصدي قلل من قيمة الموضوع او أهميته او حسسك انا بغير عالم و همي هدفي و بس. ما رح ارجع عيد حكيي ١٠٠ مرة ولا رح ارجع فكر او احكي و ضايقك بهدفي، انا كنت بحاجة شوي وعي لأنو لما واحد يتفائل زايدة عن لزوم رح ينصدم و ينأذى. بتعرف شو عبالي (شي انت ما بتعملو ابدًا لأنك مش متعود و بتفكر رح اتعلق اذا حكيتو او بتفكر رح اتأمل) عبالي تقلي "خليكي معي" و تقلي بتحبني منك لوحدك بدون مقدمات و عبالي تقلي شي متل "كتير حابب نكون سوا بالمستقبل و تكوني الي و مرتي" حتى لو هل شي ما صار او مستحيل يصير مش يعني اذا عبرت عن مشاعرك بهل مواضيع يعني انا رح انأذى او مدري شو يصيرلي. بحب تحكي بمشاعرك بحب تعبر شو بتحس بدي اعرف من حقي اعرف هل اشيا الحلوة و انبسط فيهن، و انت من حقك تحكي بمشاعرك تجاهي و تعبرلي بغض النظر انو نحن يمكن ما نكون سوا بالمستقبل. وين الغلط اذا عبرنا لبعض و شبعنا من بعض؟ اذا بعيد شر طولت غيبتك عني او ما رجعت ابدًا مش احسن تكون استغليت الوقت المناسب حتى تعبر عن حبك الي؟ انا من زمان من وقت تعرفنا و عرفت في اشيا صعبة و بتخوف بحياتك قررت استغل كل فرصة عبر عن حبي و مشاعري و اهتم فيك لأنو حسيت وقتي قصير معك و بدي اعطيك حقك و الشي يلي بتستاهلو و عبر عن كلشي انت بحاجة الو و كشخص متلك متل اي حدا بتحب تسمع حكي حلو و مشاعر و اهتمام و حب.. حبيت اعطيك بدون ما اتوقع شي بالمقابل و على امل انك تحبني متل ما انا عم حبك، و الحمدلله وصلت للشي يلي بدي ياه و بتمنى الله يجمعني فيك بالمستقبل كمان و يحقق كلشي بدنا ياه. انا اسفة كتير انو زدتا عليك والله مش قصدي و ما قصدي نكون سوا بالمستقبل القريب لأنو الوضع صعب و حتى انا مش جاهزة يعني مافي شي زابط، ندمت انو نفتح هيك موضوع بس بنفس الوقت بحس كان ضروري حتى فيق من الوهم يلي عايشة في. انا عنجد بحبك من كل قلبي و بدي ياك تكون زوجي لأنو فيك كل الصفات يلي انا بدي ياها بالشخص و انا شخص واعي مش همي المظاهر و المصاري ولا السمعة ولا اي شي تافهة ممكن يزول فجأة انا بهمني كون مع رجال واعي و قوي و ذكي و شاطر و محترم و بيخاف الله و حنون و محب و بريء و قد الثقة و ... بدي شخص اقدر حس معو براحة و امان و حب و اقدر اعتمد عليه بكلشي يهتم فيي و يعطيني من قوتو و يسندني و نساعد بعض و نتعلم من بعض و نعمل كلشي سوا.. انا اول ما تعرفت عليك لقيت فيك هل صفات و فوق كل هيدا حلو و مهضوم و بتنحب و دمك خفيف يعني كامل مكمل، تخيل لاقي حدا في كلشي انا بدي ياه و اتخلى عنو؟؟ بهيك ايام كتير كتير صعب بنت تلاقي حدا منيح ف انا ما بدي ضيع وقتي مع حدا تاتي و فوت بتجارب فاشلة و خرب سمعتي و حياتي بس كرمال لاقي شخص "صح" و مناسب. و على فكرة، كتير متير بكره لما تقلي شوفي حياتك و احكي مع شب و تعرفي و مدري شو! كيف الك قلب تسلمني لحدا غيرك انت و بتحبني؟ مش زابطة ابدًا!! بفضل تعبر عن غيرتك و تقلي ما بتحمل شوفك مع حدا غيري. انا حياتي بلاك سودا والله، كل وقت حاسة حالي مخنوقة لأنو في احتمال ما نكون سوا. من يومين بالليل جنيت على الاخر، يمكن ما بيهمك انو بكيت كتير لأنك ما بتحب البكا و ما بتفهم شو سببو بس انا من وقتا مش على بعضي و حاسة خلص انتهى كلشي و انتهت حياتي و راح اهم هدف عندي. الصراحة تمنيت موت و لاقي طريقة تخلص حياتي بسرعة كرمال ما بقى اتعذب و اتجنب عيش حياتي بلاك.. الحمدلله هديت شوي و راحو هل افكار السيئة من راسي بس كرهانة حياتي و عم حاول لاقي سبب يخليني ارجع اقوى و كفي حياتي طبيعي. يمكن انا مجنونة و بحاجة علاج و يمكن انا شخص طبيعي و بيحب من قلبو و الظروف الصعبة ولا شي عندي لأنو الهدف اهم. انا عم حاول قد ما فيي حارب و واجه كلشي بوجي بس كرمال نكون سوا. ياريت انت متلي كمان، عادةً الشب يلي بيكون هيك عنيد و بيعمل المستحيل كرمال يكون مع حبيبتو.. شكلي انا اخده دور الشب بالعلاقة بس بش مشكلة انا هيك مرتاحة. حبك بيعطيني القوة و بيحلي حياتي و بيعطيني الامل.. اوف شو بحبك، الله يخليلي ياك و يحفظلي ياك. انا ما بزعل منك ابدًا ابدًا و بقدر ظروفك. الله يعطيك القوة و ينصرك و توصل لكلشي بدك ياه. بحبك كتير.
