كتير اشتقتلك انا، في اشيا عم تتعرقل بحياتي و يلي عم يبكيني مش المشكلة بس الفكرة انو انت مش موجود حتى احكيلك قتلتني. بعرف يلي فيك مكفيك و كلشي انا ممكن امرق في ولا شي بالنسبة ليلي صار معك. مشي الحال بس نمت ارتحت شوي قضيت يومي نوم حتى اهرب من كلشي و ارتاح. الوحدة كتير صعبة و خاصةً اذا جربت احكي لحدا من عيلتي و ما سمعني او فهمني، لمين بدي احكي؟ مين بدو يسمعلي و يخفف عني؟ كل واحد همو حالو و مشاكلو ما حدا بالو فيي و بمشاعري. بهيك حالات بس تسكر بوجي بتمنى موت و كون مرتاحة عند الله احسن من انو امرق بهيك وجع لوحدي لأنو بصير اتذكر الاشيا السلبية و البشعة يلي مرقت فيا لوحدي و ما حدا ساعدني. برجع بقول حرام هل حكي و انا لازم اصبر و اتحمل مش اي شي يصير انهار هيك. بقعد بتمنى لكن يجي حدا يتزوجني و عيش عندو و هو يعوضني عن كلشي و يعمل يلي بدي ياه و يفهمني و يسمعلي و ما يزعلني و يقدر كلشي بعملو و يخاف عليي و يعطيني حقي كلو مش متل عند اهلي اذا حكيت كلمة وحدة بطلع كلني على بعضي غلط و لهلق في تفرقة و اذا حكيت ليش هيك بطلع انا موهومة و ما بيصير احكي هيك. انا حتى لما كنت احكيلك ما كنت تفهمني ١٠٠٪ يمكن لأن بتحس كلشي بسيط و ما بتنصح ظل عايشة بالماضي بس المشكلة الماضي عم يتجدد بكتير اشيا و انا ما بستاهل حدا يعاملني هيك و يقلل من قيمتي، لشو الله خلقني مع عالم ولا واحد بيعرف قيمتي؟ لو بغيب يوم واحد عن البيت الكل بيضيع، ضروري غيب حتى يحسو؟ ضروري انا يصيرلي شي او اختفي حتى العالم تعرف الفرق بلايي؟ انا عنجد ما الي غير الله بس اوقات الواحد بحاجة لحدا يطبطب عليه و ينصحو. بحب ظل احكي مع الله و اشكيلو همي اصلاً اكيد حاسس فيي بلا ما احكي ياريت يسمعلي و يحقق يلي ببالي. بعرف هيدا كتاب كلو تعبير الك المفروض مش حكي عن مشاكلي بس عنجد مش قادرة اتحمل بدي اعرف حدا قرا يلي كتبتو و يحس فيني شو تعبانة و ما الي حدا. الصبح كل الوقت مع كل دمعة اتذكر انت بعيد و ابكي اكتر عيوني نشفوا و ورموا و حمروا متل العادة و هلق عم يوجعوني و تعبانة كتير حتى ما كان بدي اكتب شي بس شجعت حالي لأنو لازم احكي او بظل مخنوقة. ما تفكر عم اكتب هيك لأنو بدي تحكيني او تسمعلي عادي انا المهم كتبت هيدا ما بدي منك غير تقرا. انا برتاح بس لاقي مكتوب حدا قري الجزء بحس في تواصل يومي و بدعي كل مرة اكتب تقرا فكرمال هيك بظل فوت شوف اذا قريت او لا، ان شاء الله كل مرة تقراهن و ما يبين ٠ لأنو بينشغل بالي كتير. ان شاء الله تكون بخير و احسن حال و كلشي عم يتحسن اكيد بعدني عم ادعيلك ما بنساك ابدًا و شو ما صار معي رح ظل ادعيلك و اذكرك بالخير و فكر فيك. مستحيل انساك مستحيل تطلع من قلبي و عقلي بكل حالاتي بفكر فيك و بخاف عليك. انا بستغرب ليش انت مش من نوع بتحكي لحدا شي او بتفضفض لحدا، يمكن كرمال الثقة او شي.. كنت كتير انبسط بس تحكيلي شو عملت او شي مهم عنك و استغرب انو كيف صار هيك و حكالي بعرف انك عنيد و ماسك جملة "الشب غير البنت" و ماشي فيا. انا خايفة من كتر التراكمات و بعدك عني شوي شوي انطفي و اذبل، ما بدي اتعب على الاخر بدي حاول دايمًا لهي حالي بحيلا شي حتى ما اوصل لدرجة ضعف ما حدا يقدر يساعدني هيدا اذا كان في حدا يساعد. بعدني لهلق بس شوف فيديوهات متل يلي كنت ابعتلك ياهن بنقهر لأنو عبالي ابعت بس ما بقدر ولا حتى الوقت المناسب لهيك اشيا. يارب الله يسمعلي و يحل مشاكلك ونرجع متل قبل و اقدر اتطمن عليك و ريح بالي. بتمنى من كل قلبي تنحل امورك و ترجعلي بس بخاف تكون تغيرت عليي و هل فترة تكون اثرت عليك سلبيًا كتير، انا مش متعودة على هيك شي.. بس بكل الاحوال عندي امل كلشي يتحسن لو بعد وقت طويل و اقدر احكي معك طبيعي حتى لو مش متل قبل. كيفك انت؟ ان شاء الله تكون منيح و ما ناقصك شي و كلشي عم يتحسن شوي شوي. و بتمنى بعدك عم تحبني و متعلق فيي و بدك ياني متل ما انا بعدني بحبك و متعلقة فيك و بدي ياك دايمًا و بتمنى ما تنساني مع الأيام و تبشرني بالخير و اخبارك الحلوة. الله يكون معك خطوة خطوة و ينصرك يا قلبي، انتبه على حالك و ما تنسى انا بحبك و بخاف عليك كتير.
