صار الجزء ال٦٠ و تقريبًا اكتر من تلت ارباع من الاجزاء كتبتن خلال هل ٣ شهور يلي نحن بعاد فيهن بما انو مش قادرين نحكي سوا. قبل بتذكر اول فترة عبرت عن حبي بكم جزء اول ما بلشت الكتاب ب ٢٠٢٢ و ب ٢٠٢٣ كتبت بس كم مرة بما انو كنا عم نحكي عادي و كلو طبيعي و هلق اكتر الاجزاء ب هيدي سنة ٢٠٢٤. شايف الوقت كيف بيمرق بسرعة؟ انت كنت متخيل ابقى معك مل هل سنين؟ و انو كون هلقد متعلقة و مصرة انو نتعرف و نتقرب؟ يمكن فكرت فترة و انا بزهق و بتخلص القصة.. بس انا مش هيك ابدًا انا شخص عنيد و ما بضيع من ايدي فرص خاصةً اذا شفت حدا مميز متلك، كيف فيي اتركو و روح؟ شو انا مجنونة؟ بتعرف هل اسبوع كل يوم عم احلم فيك و بحسك معي عنجد، كتير بيكون حلم واقعي و واضح بس المشكلة بس فيق ما عاد اتذكر شي منو. انا شخص ما بحب عبر عن حبي على فكرة و كتير بخاف احكي بمشاعري لأنو لما كنت صغيرة ما كان حدا يتصرف معي هيك و كنت حس اذا حكيت شي غلط و ما رح يجيب نتيجة (بأبسط الأمور).. شوي شوي كنت حاول مع البنات يلي بعرفن و كل وحدة بدون استثناء اذتني و ستغلتني بس لأنو فرجيت شوية حب و اهتمام.. كيف اذا بحاول اكتر؟ او كيف اذا عبرت لفظيًا؟ بتعرف حتى اخر بنت بالجامعة تغيرت عليي و جنت كمان؟ يعني وين ما بروح نفس سيناريو و انا كنت مفكرة المشكلة مني طلع لا.. المشكلة من العالم بس يشوفو ١٪ مشاعر حقيقية بيستغلوها. و انا كرمال هيك صارلي كل هل سنين وحيدة و ماعندي حدا و الشباب يلي دخلو على حياتي كانو اسوأ. ولا مرة بتذكر حالي حاولت عبر او فرجي بتصرفاتي حبي لشب، كتير كان صعب و حس بخوف و يمكن ما وصلت لمرحلة قوية بلش عبر و احكي و هيك. يمكن انت كنت تفكرني شخص غريب انو وحيدة و ما بحب قرب من حدا بس لو تعرف تفاصيل مملة لأشيا مرقت فيها يمكن انت لوحدك تقلي ما بقى تهتمي لحدا و خليكي وحيدة. هل شي كتير بيقهر على فكرة. لما تعرفنا كنت كتير ملهوفة عليك و حابة نتقرب بس ما كنت اعرف عبر صح و كنت خاف و اتجنب هل شي.. حتى انو لما تصر عليي احكي و جرب اكتب شي و اعترف دغري بقعد ببكي و بختنق. كنت خايفة عبر و ما لاقي نتيجة بكون خسرت كلشي تعذبت حتى عبر عنو و هيدا شعورر كتير بشغ و بيأذي. انا كنت بعرف ما بدك تستغلني و واضح و صريح من الاول بس كنت خاف انك ما تتأثر معي و تظل تشوفني بنت عادية مع كلشي عم اعملو كرمالك و ما نوصل للشي يلي كان بدي ياه. بتعرف اوقات بحس عليي شي لعنة او حالة غريبة بتخلي العالم تتركني فجأة او تستغلني و ما يكون الي حظ مع حدا؟ هيك اوقات بقعد بفكر ليش كل مرة نفس الشي ماعندي حظ مع اي حدا، ما بلحق انبسط بشخص الا ما يختفي عني او يتغير. و انا بعرف حالي بنت كتير منيحة و فيي كل الصفات المهمة بالعلاقات و الكل بيقول هيك بس ليش بيصير معي هل اشيا؟ حتى نحن ما صدقت تقربنا و صرت تحبني و علاقتنا حلوة كتير كتير بعدوك ظروفك عني و انا قاعدة مشغول بالي صبح ليل خايفة عليك و عم ادعيلك. الحمدلله الله نعم عليي بكتيرر اشيا غيري بيتمناها بهل زمن و بيحسدوني عليا و ما بنكر هل شي بس كمان بحاجة لأنسان بحياتي متلي متل اي شخص طبيعي.. اسفة حبيبي يمكن وجعتلك راسك، انا اليوم نهاري طويل عندي كتير شغل و عندي موعد دكتور عيون مراجعة و ما معي وقت غير هلق الصبح عم اكتبلك و حاسة حالي مقصرة معك. كتير كتير كتير كتير مشتاقتلك و اكبر دليل انك بأحلامي دايمًا قد ما بفكر فيك. الله يحفظك يا عمري، بحبك انا.
