كتير اوقات بس ازعل من شي بتذكرك و بشتاق لسؤالك عني و حنيتك عليي كيف بتظلك تسألني شو في كرمال احكيلك و تهون عليي كلشي بغض النظر انو اكتر الاشيا يلي بتزعلني بسيطة بس بحب انك توضحلي انو عنجد كلشي بسيط. و لما انبسط من شي بتذكرك و بشتاق اجي خبرك كرمال تنبسط معي او تنبسطلي لو شي صغير و بسيط. بحب شاركك انجازاتي و خبرك انو دايمًا عم اتغير للأحسن بتصرفاتي بتفكيري و عم طور من حالي بكلشي و خاصةً بالدرس و بحب تكون مبسوط مني و فخور فيي. بنص كلشي عم يصير و بعدك عني بعدني عم حاول اعطي افضل ما عندي بالدرس كرمال ما اخسر كلشي وصلتلو و عم ادرس حتى لما تكون الدمعة بعيني و مشتاقتلك. الحمدلله على كلشي و الحمدلله انك بخير و بتمنى تكون دايمًا بخير و مرتاح و ما ناقصك شي حتى انا كمان كون مرتاحة. الحمدلله كمان انو انا عندي جامعة و درس و الا كنت غرقت بزعلي و ظليت فكر بأشيا سلبية حتى اتعب على الاخر، عم اكره ايام العطلة و اتمنى يمرقو بسرعة كرمال روح على الجامعة و ادرس و التهي. كتير كتير مشتاقتلك و عم حن الك و بالي فيك كل وقت، كلشي بيذكرني فيك يعني اذا مرق ربع ثانية ما فكرت فيك بيطلع شي بوجي يذكرني فيك. بدعي كن الله بهل ايام المباركة يفرجها عليك و ينصرك و ان شاء الله ينحل كلشي و تكون مرتاح كل وقت. الإحساس يلي بحسو معك مافي انسان بالدني قادر يحسسني نفس الشي لو شو ما عمل ما بيهز مشاعري ولا شوي الا انت اذا بعتت قلب او كتبتلي كلمة حلوة بضعف قدامك دغري. انت نقطة ضعفي و حبي و اهم شخص عندي، كلشي منك غير و كلشي بتقبل منك و كلشي منك بشوفو حلو. انت احلى شب بالدني و احسن شب بالدني وفيك كل الصفات الحلو، شفت ليش بغار عليك؟ لأنك حلو من جوا و من برا بخاف تجي وحدة تسرقك مني بس انا متطمنة وجودي بغطي على الكل و صعب تجي وحدة توصل لربع يلي انا وصلتلو و تاخذ مطرحي و صعب وحدة تحبك قدي. بدي منك تتذكرني بكل وقت كمان و ما تنساني لو شو ما صار، نحن منظل قراب كتير و ما بيصير تلتهي عني و تنساني و لازم تتذكر دايمًا قد ما طالت الفترة انا موجودة حدك كل الوقت. ما بدي كل مرة عيد هل حكي بدي تعرف لوحدك انو هي البنت موجودة بحياتي و ما لازم انساها. ان شاء الله كلشي عم اكتبو عم يعجبك و تحس فيي و بمشاعري بكل كلمة و تفهمني اكتر و تشتقلي و تتحمس تقرا اكتر و تنطر جزء جزء حتى نزلو و تقراه. مش دايماً حيكون عندي حكي كتير قولو متل اليوم انا كتير تعبانة و رح فوت نام بعد شوي و عطلانة هم امتحانات اسبوع الجاي و درس و ضغط قوي عليي غير شغل البيت و الترتيب كلشي عم يتراكم عليي. ادعيلي اقدر ركز و انجح و حافط على علاماتي حتى اقدر اتخرج بكير و ان شاء الله اقدر كفي من بعدا سنة رخصة تعليم و مدري شو بركي بتفيدني للمستقبل. الله يخليلي ياك و يحفظك و يسعدك و يرزقك و يبارك فيك و يغفرلك و ينصرك و يفرجها عليك و يحقق امنياتك و يريحك و يصبرك و يطول بعمرك و يسهل امرك، الله لا يحرمني منك و الله لا يضرني فيك. بحبك بحبك بحبك.
