كيفك؟ انا الصراحة تعبانة و زعلانة كتير منك لأن رغم بعدك عم وكلشي عم يصير بقعد بكتب جرايد و بعبرلك و صار شي روتيني اكتب كتير حتى تقرا و تحس بعدنا متل قبل و غرقك غزل و حب و اهتمام بما انو مش قادرين نحكي، متل لما اول ما تعرفنا صرت حاول عبر و انت ما تعطيني ردة فعل قوية. هلق نفس الشي و بعرف عندك ظروف، بس انا ما عندي مشاعر؟ بتعرف مرق عيد ميلادي من يومين توقعت تتذكر و تحكيني؟ كان بيهمني بس كلمة وحدة منك حس انك متذكرني و مهتم فيي حتى حس كمل يومي و في حدا بيحبني و ظليت ناطرة قلت مستحيل يروح هيدا نهار و ما يعايدني و ما عايدتني ولا قبل بنهار ولا بنفس نهار ولا بعد نهار. بتعرف شو بيقهر هيدا شي؟ انت ما بيهمك هيك تفاصيل بس بتعرف انا بيهمني و بحب الاهتمام و حس انا مهمة و متذكرني. معقول انت نفس الشخص يلي حكينا سنتين؟ اخر مرة شفتك و كان بدك تستعمل تليفوني شفتك تذكرت الباسورد (يلي هو عيد ميلادي) بصعوبة بس المهم تذكرتو و مفروض ما تنساه.. اعتبر انك نسيت و مشغول، ليش لقيت انك فاتح انستا و شايف كلشي نزلتو و ما تذكرت تحكيني؟ ولا هيدا مش انت؟ بهيك مواقف كتير بحس حالي غلط، ليش انا دايمًا بكل المواقف لازم عبر و اكتب و اهتم و انت لا؟ ليش ولا مرة فكرت تعمل متلي؟ اكيد قبل غير و لازم من قبل تعمل و هلق صعب، بس هلق شو؟ انا بتعب هيك بس ظل اعطي و ما لاقي كلمة بالمقابل. انا بعرف يلي بيحب ما بينسى و اذا صارت بالغلط بيعوض شخص بعدين لما يتذكر، معقول ما تذكرت؟ ما حسستني انك متذكر او مهتم ابدًا، حطيت احتمال ما كنت قادر تحكي، بس لأيمتا هيك؟ انا يوم عن يوم عم اتعب اكتر، صارلي سنة و ١١ شهر بحكي معك و كل هل فترة صبرت عليك و تأملت فيك و توقعت نوصل لشي سوا و ما قدرت و سكتت قلت عادي المهم قربو بس هلق لأيمتا بدي انطر؟ هل مرة انا مش ناطرة متل قبل علاقة او شي بس ناطرة على الاقل شوفك مرتاح و قادر تحكيني تطمني عنك كل فترة و فترة. ممكن كون انا بورطة؟ ورطت حالي مع شخص مش الي؟ و هلق بدي ادفع ثمن كل هل وقت يلي حكينا في و تعلقي و حبي الك لوحدي. انا بهيك مواقف ما بفهمك لأنك مش حاكيلي قبل كيف بتفكر او شو بدك بالضبط، كل يلي بعرفو انك حذرتني ١٠٠ مرة و وضحتلي انو مافيك تكون معي و قلت حاسس ما رح يكون في نصيب بيناتنا و انو ممكن يكون بدك كتير اشيا بس مش قادر. شو بعمل انا بمخي السميك و قلبي يلي بحبك؟ بدي شيلن من مطرحن و ظل ادعس فيهن و أضربن بالسكين حتى يتعلمو كيف يتصرفو بقى. بعرف كلشي بيصير لسبب و انو ممكن في درس او عبرة توضحلي ليش تعرفنا و حكينا كل هل مدة، بس لهلق ما لقيت! و ما بعرف ليش انا كل علاقاتي الفاشلة قبل كانت تنتهي بسرعة لما يكون شخص مافي خير معو او مافي نصيب، ليش نحن بعدنا على تواصل ؟ كرمال انت تنجبر تبعد و انا ظل معلقة و ناطرة او شو؟ في كتير اشيا مش عم افهما و انا ضايعة و ما بعرف شو اعمل بحالي و كيف اتصرف و يمكن عم احكي هيك من قهري لأنك ما عايدتني و صارلي يومين على هل حالة كرمال هيك ما قدرت اكتب شي قبل و يمكن (يمكن) انت استغربت انو طولت حتى نزلت شي جديد. بتمنى فيق لاقي كل هيدا حلم، انا ما بدي قول انو ندمت على كلشي صار معنا سوا، انا مش ندمانة ابدًا بس زعلانة على حالي كتيرررر انو عم اتحمل كلشي لوحدي ومافي شي بيحفز حتى كفي. انا حياتي كله ما كان فيها شي بيحفز حتى ظل عايشة قبل ما نحكي، فكرك هلق كيف؟ بحاول لهي حالي بحاول اعمل انجازات بحاول اصبر بحاول انسى كلشي سيء و بحاول اتذكر انو مافي انسان بيخلق بلا سبب و بس الله بيقرر ايمتا صار وقت اترك الدني مش انا اذا تضايقت قرر ما بقى بدي كفي. انا شخص ضعيف صح، حاولت و عم ظل حاول كون قوية بس في اشيا الواحد ما قادر يتحملا. بعرف انت وضعك اصعب و كلشي غير عني و يمكن انا عايشة بجنة بالنسبة يلي انت عم تعيشو و بقدر هل شي و بخاف عليك و بزعل عليك و بحط حالي محلك كرمال افهمك، بدي انت تفهمني كمان. يمكن كان معك حق انو انا شخص ضعيف ما لازم كون مع حدا متلك لأنو انت حياتك غير عني و انا صعب اتأقلم او اتحمل. المشكلة قد ما قلبي طيب بحس حكيي قاسي و عم ابكي انا و عم اكتب خايفة خيب املك و زعلك مني، انا مشكلتي بحط راحة غيري قبل راحتي و كرمال هيك عم ظل انصدم و اتعب بحياتي. بدي ركز على حالي بدي يصير معي شي يحببني بحياتي متل فترة يلي كنا فيها سوا بدي حدا يساعدني و يفهمني بدي ارتاح و لاقي يلي انت بستحقو.. بدي كلشي بعطي من قلبي يرجعلي ما بحب انا اعطي و غيري لا. انا ما طلبت تكتب جرايد ولا طلبت تحكي كل يوم و لا طلبت منك شي بيكفي كان تعايدني و ما توصلني لدرجة فكر هيك بسلبية و اقعد ابكي. انا تحملت كتير اشيا كرمالك، قبل ما نتعرف كان غرامي و نقطة ضعفي شب يحكيني دايمًا و يهتم و يحبني اكتر ما انا بحبو و يتذكر تفاصيلي.. بعدين معك صرت مرة عم مرة اتقبل القليل يلي عطيتني ياه و اقنع حالي انو انت هيك طبعك و عادي و كل واحد عندو طريقة تعبير.. بس انا بالنهاية ما عم يوصلني يلي بستحقو و بدي ياه، عطيتني اقل ما انا بعطيك بكتيررررو قلت يمكن لأنو انا بحبو اكتر و هو بس معجب، بعدين تطلعت انت كمان بتحبني بس بطريقتك الخاصة. لمحتلك اكتر من مرة بدي تكتبلي بحبك ما كتبت، قلتلك اذا فيك تعمل اكاونت هون و تجاوبني (اكيد وقت فراغك) ما عملت هيك... انا بعرف و بقدر ظروفك بس متل ماعندك وقت فراغ تقرا كلشي ليش ما عندك وقت تعبرلي، تردلي شوي من يلي انا عطيتك ياه؟ ما بدي ١٠٠٠ كلمة، بدي كم كلمة حلوين بعرف بيكونو من قلبك و بيعوضو عن كلشي و انا برضى بسرعة و بنسى. في كتير غيرك صدموني انو انا دايمًا بعايدن و بهتم لهيك تفاصيل شافو و عرفو (ياريت تذكرو) انو عيد ميلادي و ما حدا حكي، ما زعلت لأنو مش مهم.. كان المهم انت يلي تتذكر و تحكيني. انا قلت لماما انو زعلانة قالتلي حرام عندو ظروف.. يمكن هلق تفكر انا مكبرة الموضوع و تافهة و عقلي صغير بس انا عنجد اثر فيي الموضوع كتير و يمكن كان ناقص يصير هل شي و انفجر و احكي كلشي بقلبي. معقول انا بلا احساس و انانية لأنو كان بدي معايدة حتى انبسط و يصير عندي امل كفي بالحياة بسبب شي حلو؟ يا رب الله يعوضني عن كلشي كان بدي ياه و ما صار و انسى كلشي زعلني بهل دني. ما تفكر اذا زعلت ببطل ادعيلك، انا كل يوم عم ادعيلك متل العادة و بعدني خايفة عليك و بحبك و مشتاقتلك. ان شاء الله ارجع ارضى لوحدي و اقدر اكتب شي احلى من هيدا. بعتذز اذا دايقك شي من يلي كتبتو و ما بدي تفكر انو بدي منك تحكيني او تكتبلي شي معين بعيد يلي قريتو، عادي شي و مرق. و اكيد مش يعني تخليت عنك او شي، انا بعدني موجودة و ان شاء الله دايمًا اقدر كون حدك و ناطرتك. الله يحفظك و يسهل امرك.
