كتير كتير مشتاقتلك و عم فكر فيك و زعلانة لأنو ماعندي طاقة اكتب و مقصرة بحقك بس انا كتير تعبانة و مشغولة، و شكلك انت كمان مشغول. هيدي الاغنية بتذكرني فيك و لما قلك عبالي حبك، كتير بحب حبك و عبرلك عن حبي. انت الوحيد يلي بتستاهل حبي و كل مشاعري. اسمع الكلمات منيح و شوف شو بحسلك انا، يا ريت فيي حبك اكتر و اكتر و اغرق بحبك و دوب بحبك و ما اعمل شي بحياتي غير حبك. كل وقتي عم ادعيلك، بالي فيك من صبح لليل. اوقات بطلع صورتك يلي حد راسي و ببوسا بحس كأنك حدي و برتاح. يا ريت فيي اسرقك اخطفك خبيك بقلبي و اهتم فيك و بوسك و اعبطك و شمك و اشبع منك. انا بعدني ما شبعت منك و ما رح اشبع ابدًا. على فكرة، بعد ١٠ ايام بكون صارلنا سنتين من وقت ما بلشنا نحكي واتس اب و نتقرب من بعض. هيدا التاريخ كتير مهم عندي و غيرلي حياتي و كان احلى شي صار معي. يعني رح يصيرلي سنتين بحكي معك و بدي ياك. و تقريبا اقل بشوي عم حبك و موت بحبك.. بتذكر كيف كنا نحكي دايمًا و قلبي يدق بسرعة بحس رح يطلع من مطرحو لأنك عم تحكيني و كيف كنت ابكي لأنو عم حبك و اتعلق و خاف عليك و ما بدي تحس على شي.. بس ما قدرت خبي فترة طويلة و اذا بتتذكر بيوم عيد ميلادك اعترفت اعتراف بسيط انو عم بلش حبك و اكيد كنت حاسس و بتعرف لأنو انا بفضح حالي. حبيت دايمًا عبر عن حبي و اكتبلك اشيا حلوة و اهتم فيك قد ما بقدر حتى ما اندم بعدين انو ما عطيتك يلي انت بتستحقو.. انا ما بعتبر المشاكل يلي عم تصير هلق نهايتنا لأنو عندي امل كلشي ينحل و نرجع نحكي متل قبل و نكفي محل ما وقفنا. بعرف رح يجي نهار الله يسمعلي و ينحل كلشي و ترتاح و انا كون حدك كل الوقت. عندي امل تخلص من كلشي و تكفي احلامك و ادعمك انا و كون فخورة فيك. انا من هلق فخورة فيك اصلاً لأنك انسان قوي و طموح و ذكي و شاطر و بتفهم بكلشي.. كل مرة بتذكر كيف كنت انا افقد امل و بيطلع على بالي افكار سلبية و انت تظلك تحكيني و تعطيني نصايح و دعم كرمال ما اخرب حياتي و الحمدلله انو سمعتلك و تغيرت و عم حاول قد ما بقدر كفي لقدام و اتطور. انا بحبك كتير كتير و ما بقدر ابعد عنك ولا فكر بهل شي و بخاف كفي حياتي بلاك لأن انت كل حياتي. اكيد رح تفكر انو كيف هيك و انا هلق عايشة طبيعي او كنت عايشة طبيعي قبل ما نتعرف.. انت مش قاعد بقلبي و بعقلي حتى تشوف شو عم يصير معي. و قبل ما نتعرف كنت انا انسانة ضايعة و تعيسة و كتير غير.. انت فتت على حياتي غيرت كلشي و غيرتني للاحسن و حسيت معك بالسعادة و القوة و الامان و الحب.. كيف بدك اتصرف بعد ما كان ناقصني كل هول و انت جيت عبيت كل النقص و حليت حياتي و صرت قطعة مني و تعلقت فيك و حبيتك و تعودت عليك؟؟ صعب كتير الواحد يفقد شخص غالي عليه هيك و يرجع ينحرم من يلي كان ناقصو و محروم منو سنين. انت الوحيد عرفت كيف تتصرف معي و كيف تكون الي قوة و سند و سعادة و راحة و امان و كلشي حلو بالدني. مستحيل اعرف كفي حياتي بلاك، وجودك لوحدو بيكفيني. انا اذا بشوف صورة عيونك و بسمع صوتك الحلو بكتفي و برتاح. شايف انت شو عامل فيي؟ انا عنجد بحس حالي مهوسة فيك و متعلقة كتير لدرجة عم اصبر معك على اشيا ولا مرة بحياتي توقعت ممكن اصبر عليا او امرق فيها. عم حاول كون قوية كرمال اقدر ظل حدك و انطرك. مرق سنتين و الباقي هين ان شاء الله، انا على امل كبير و الله ما رح يخذلني. رح نرجع سوا و كلشي رح ينحل يا قلبي، الله يخليلي ياك و يحفظك. ان شاء الله تكون بخير و الله يعطيك الصبر و القوة. بعشقك انا.
