មួយខែក្រោយមក
បន្ទាប់ពីមានរឿងនៅថ្ងៃនោះមក ក៏គ្មានអ្វីកើតឡើងទៀត គ្រប់យ៉ាងគឺដូចធម្មតាសម្រាប់ ឈីន យ៉ូឈីង នាងតូចរស់នៅតាមធម្មតាតាមបែបផែនរបស់ខ្លួន អាចនិយាយបានថាព្រោះនាងមិនបានខ្វល់ខ្វាយជាមួយ ទើបជីវិតរស់នៅធម្មតាបែបនេះ។
មួយរយៈនេះនាងត្រូវមើលមេរៀនដើម្បីប្រលងនៅអាទិត្យក្រោយ ដែលជាថ្ងៃប្រលងចុងក្រោយរបស់នាង ទើបមិនសូវបានចាប់អារម្មណ៍អ្វីច្រើន។
«ឈីងឈីង...»
«សិស្សច្បង...»យ៉ូឈីង ងាកទៅរកអ្នកហៅដោយចោលស្នាមញញឹមយ៉ាងស្រស់ស្អាតដាក់
យ៉ូឈីង អាចចាត់ទុកថាជាស្រីស្អាតម្នាក់បានយ៉ាងងាយ ព្រោះតែមុខមាត់តូចច្រមិចៗនេះ។កែវភ្នែកស្អាតខ្មៅនិលខុសប្លែកពីជនជាតិអាស៊ីមួយចំនួន ច្រមុះស្រួចតូចសមនិងបបូរមាត់ក្លែបក្រូច ក្រហមព្រឿងៗរបស់នាងយ៉ាងខ្លាំង សក់រំសាយវែងត្រឹមខ្នងតូចនោះ មិនធ្លាប់ទម្លាក់ចុះ នាងតែងតែលើកចងវាខ្ពស់ៗដើម្បីអោយស្រឡះមុខមាត់ ដូចជាពេលនេះអ៊ីចឹង
«ខានជួបគ្នាមួយរយៈមកហើយ តើសិស្សច្បងបាត់ទៅណា?»នាងតូចសួរនាំ ព្រោះតាំងពីថ្ងៃនោះមកនាងមិនដែរឃើញ ក្វាង ម៉ងកាន ទៀតឡើយមិនដឹងថាបាត់ទៅណា ពេលសួរនាំពីអ្នករៀនជាមួយគេ ក៏មានត្រឹមតែអ្នកប្រាប់ថាគេត្រូវប្រចាំការនៅពេទ្យរយៈពេលមួយខែពេញ ដោយគ្មានមូលហេតុទៅវិញ
«បងថាយើងទៅនិយាយគ្នានៅកន្លែងផ្សេងទៅ»ម៉ងកាន សម្លឹងមើលជុំវិញខ្លួនបន្តិច ក៏អូសនាងក្រមុំចេញពីរបងសាលាទៅរកហាងកាហ្វេតូចមួយនៅក្បែរនោះ
«ហេតុអីចាំបាច់រកកន្លែងនិយាយគ្នាស្ងាត់ៗដែរ?»យ៉ូឈីង ធ្វើមុខឆ្ងល់សម្លឹងមើលជុំវិញហាងដែលគ្មានភ្ញៀវសោះ មានត្រឹមតែបុគ្គលិកពីរនាក់ប៉ុណ្ណោះ
«គឺគ្រាន់តែចង់រកកន្លែងស្ងាត់និយាយគ្នាទើបវាស្រួលបន្តិច»
«មានអ្វីកើតឡើងឬអត់ ហេតុអីតាំងពីថ្ងៃនោះមកខ្ញុំមិនដែរឃើញសិស្សច្បងត្រលប់មកបន្ទប់វិញបែបនេះ?»
«គឺវាវែងឆ្ងាយខ្លាំងណាស់ តែបងគ្រាន់តែចង់ផ្ដាំថាមួយរយៈនេះ ឈីងឈីង ប្រយ័ត្នខ្លួនខ្លះក៏ល្អណា»
«សិស្សច្បងចង់មានន័យថាម៉េចទៅ?»
«ចាំបានមនុស្សប្រុសម្នាក់ដែរ ឈីងឈីង បានជួយនៅថ្ងៃនោះទេ?»
«ចាស ចាំបានតើ តែពេលនេះគេយ៉ាងម៉េចហើយ នៅរស់ឬអត់?»ពេលគិតដល់មនុស្សម្នាក់នោះ នាងក៏មានទឹកមុខមិនល្អភ្លាមព្រោះនៅចាំបានច្បាស់ ថ្ងៃនោះពេលនាងអោយ ម៉ងកាន យកគេទៅមន្ទីរពេទ្យបាត់ស្អែកឡើងក៏មានមនុស្សប្រុសប្លែកមុខមួយក្រុមធ្វើខ្លួនដូចពួកអ្នកលេង មកដើរមើលនៅម្ដុំកន្លែងស្នាក់របស់ពួកនាង មួយអាទិត្យជាប់គ្នាតែម្ដង ដោយខាងសាលាមិនបានហាមប្រាមអ្វី អោយពួកគេចេញចូលតាមចិត្ត នៅមានការតាមឆែកមើលតាមបន្ទប់ទៀតផង សូម្បីតែបន្ទប់របស់នាងក៏ពួកនោះចូលមកឆែកឆេដែរ តែពួកវារកអ្វីមិនឃើញក៏ត្រលប់ទៅវិញអស់ទៅ
«គេរួចផុតពីគ្រោះថ្នាក់ហើយ»
«វ៉ាវ...ធូរចិត្តបន្តិចដែរគេមិនអី»
«តែបងថាវាចម្លែកៗយ៉ាងម៉េចក៏មិនដឹងទេណា...»
«សិស្សច្បងចង់មានន័យថាម៉េច? »
«គឺប្រុសម្នាក់នោះ ពេលសម្រាកនៅពេលតែបីថ្ងៃប៉ុណ្ណោះ ក៏បាត់ខ្លួនទៅដោយគ្មានស្លាកស្នាមអ្វីសោះ ហើយបន្ទាប់ពីគេបាត់ខ្លួនមិនបានប៉ុន្មានម៉ោងផង ក៏មានពួកអ្នកលេងចូលមកមន្ទីរពេទ្យ តាមរកអ្នកជម្ងឺម្នាក់ដែលមានរបួសដោយត្រូវកាំបិតចាក់ ប្រាប់ថាជាបក្សពួកជាមួយពួកគេនោះទៀតផង»
«មែនឬ ពិតជាប្លែកមែនទេតើ ព្រោះនៅសាលារបស់យើង សូម្បីតែកន្លែងស្នាក់ក៏មានពួកអ្នកលេងទៅបង្ហាញខ្លួននៅទីនោះដែរ មានការចូលឆែកឆេទៀតផង»
«មែនឬ?»ម៉ងកាន បើកភ្នែកធំៗដោយការភ្ញាក់ផ្អើល សូម្បីតែមាត់ក៏ចំហធ្លុងដែរ
«ចាស តែពួកគេរកមិនឃើញស្អីទេក៏ចេញទៅអស់វិញទៅ»
«ឈីងឈីង ដឹងទេថាពួកនោះវាមករកអី? »
«មិនដឹងទេព្រោះគ្មានឮនរណានិយាយអីទេ ម្នាក់ៗខ្លាចពួកនោះឡើងរួញខ្លួនទៅហើយ»
«ចុះពួកវាមានចូលទៅបន្ទប់របស់ ឈីងឈីង ទេ?»
«ចូលទេតើ តែកុំភ័យអីពួកគេរកមិនឃើញស្អីទេ ខ្ញុំធ្វើតាមសិស្សច្បងប្រាប់អស់ហើយ ពួកគេរកម៉េចនឹងឃើញទៅ»
«បែបនេះធូរទ្រូងបន្តិច»
«ចុះសិស្សច្បងវិញបាត់ទៅណាដែរ?»
«មិនបានបាត់ទៅណាទេ គឺខាងមន្ទីរពេទ្យសុខៗក៏ស្រាប់តែអោយបងត្រេននៅទីនោះពេញមួយខែដោយមិនបាច់ប្រលងចេញ ហើយនៅអោយអាហារូបករណ៍ចេញទៅរៀននៅក្រៅប្រទេសទៀតផង គិតថាវាចម្លែកដែរទេ?»
«វាក៏ប្លែក តែហេតុអីសិស្សច្បងធ្វើមុខដូចជាមិនសប្បាយចិត្តសោះអ៊ីចឹង?»យ៉ូឈីង សើចញឹមៗពេលឃើញ ម៉ងកាន ធ្វើមុខដូចជិតស្លាប់
«គឺវាចម្លែកហ្នឹងណា»
«ចម្លែក?ឬថាសិស្សច្បងមិនចង់បានអាហារូបកណ៍នេះទេ?»
«ក្មេងឆ្កួតអ្នកណាមិនចង់បានអាហារូបករណ៍រៀនមិនអស់លុយទៅ»
«ចុះមកធ្វើមុខដូចមនុស្សជិតស្លាប់ធ្វើអី?»
«គឺបងឆ្ងល់ហ្នឹងណា សាកគិតលោមើលទៅមើល ហេតុអីសុខៗក៏ខាងមន្ទីរពេទ្យដែលបងចុះត្រេនស្រាប់តែអោយអាហារូបករណ៍ មកងាយៗម្ល៉េះ ឬថាមានអ្វីលាក់បាំងពីខាងក្រោយ?»
«សិស្សច្បងមិនគួររៀនខាងពេទ្យសោះ...»
«នាងច្រម៉ក់និយាយឆ្កួតស្អីហ្នឹង...»
«គឺបងពូកែសង្ស័យច្រើនគួរតែចូលខាងប៉ូលីសស៊ើបអង្កេតប្រហែលជាសមជាងណា»
«ក្មេងឆ្កួត»ម៉ងកាន អស់សំណើចជាសម្ដីនាងតូចនៅចំពោះមុខ
«ចុះអាហារូបករណ៍របស់សិស្សច្បងត្រូវចេញទៅពេលណា?»
«អាទិត្យក្រោយនេះ»
«ចំថ្ងៃខ្ញុំប្រលងចេញល្មម មើលទៅមិនបានទៅជួនដំណើរសិស្សច្បងទេ»
«ពិតមែនឬ ពិតជាគួរអោយស្ដាយមែន បងគិតថាយ៉ាងហោចណាស់ក៏មាន ឈីងឈីង មួយទៅជូនដំណើរដែរទេតើ»ចម្លើយរបស់នាងធ្វើអោយ ម៉ងកាន សើចលេងសមទើបបានតែដកដង្ហើមធំជំនួសវិញ
«ក៏សិស្សច្បងមានមិត្តភក្ដិទៅជូនដំណើរដែរទេតើ?»ព្រោះដឹងថាគេក៏គ្មានគ្រួសារដូចជានាងដែរ ទើបជ្រើសរើសនិយាយលើកទឹកចិត្តដោយវិធីបែបនេះ មិនមែនថានាងមិនចង់ទៅជូនដំណើរគេទេ តែព្រោះថាវាជាថ្ងៃដែលនាងត្រូវប្រលងចេញ មិនអាចចេញទៅបានឡើយ នាងសង្ឃឹមថាគេនឹងយល់ពីរឿងនេះមិនខឹងឬអន់ចិត្ត
«តែវាមិនដូចគ្នាទេ ឈីងឈីង »
«អឺ...សិស្សច្បង»ពេលត្រូវគេសម្លឹងមើលដោយក្រសែភ្នែកប្លែកៗ នាងក៏ធ្វើខ្លួនមិនត្រូវព្រោះដឹងថាគេគិតមកលើខ្លួនបែបណា ហើយនាងក៏មិនបានស្អប់ខខ្ពើមគេដូចគ្នា ពេលត្រូវសម្លឹងមុខដោយអារម្មណ៍ជ្រាលជ្រៅបែបនេះហើយ នាងក៏មានអារម្មណ៍ញាប់ញ័រដោយប្រាប់មិនត្រូវដូចគ្នា
«បងដឹងថា ឈីងឈីង ដឹងថាបងគិតបែបណាចំពោះ ឈីងឈីង...»ម៉ងកាន ស្រវាចាប់ដៃតូចមកច្របាច់ណែន ភ្នែកក៏សម្លឹងមុខនាងមិនដាក់
«ខ្ញុំ...គឺខ្ញុំ...»
«ដូច្នេះហើយបងមិនបានសុំអ្វីច្រើនទេ អាចទេ...រងចាំបងបីឆ្នាំសិន បីឆ្នាំក្រោយបងនឹងត្រលប់មកវិញ ត្រលប់មកសាងអនាគតជាមួយគ្នា...»
«សិស្សច្បង...»
«បានទេ ឈីងឈីង?»
«គឺ...គឺសុំពេលគិតសិនតើបានទេ?»
«បានបងអោយពេលគិតបីឆ្នាំ តែបីឆ្នាំក្រោយមកត្រូវតែព្រមធ្វើជាកូនក្រមុំរបស់បង»
«បែបនេះខ្សែលើគ្នាហើយណា»
«បងមិនបានខ្សែលើទេ»
«ឆឺស!»
YOU ARE READING
ទណ្ឌកម្មបេះដូង(ចប់)
Short Storyឈីន យ៉ូឈីង ក្មេងកំព្រាដែលរស់នៅក្នុងមណ្ឌលតូចមួយ មានសំណាងបានមករៀនបន្តនៅក្នុងក្រុងដើម្បីផ្លាស់ប្ដូរអនាគត នឹងបានជួយក្មេងៗដទៃទៀតអោយមានអនាគតល្អ តែអ្នកណាទៅដឹងថាការផ្លាស់មករៀនបន្តរបស់នាង បែរជាមកជួបរឿងដែលច្របូកច្របល់ដល់ថ្នាក់នេះទៅ? ត្រូវពួកសង្គមងងឹតចាប់យកទៅល...