Days of Counting Camellia (Hiatus)

[15]' Colours of Ash '

Check Zawgyi version below ⬇️

#Unicode

ဆယ့်နှစ်လရာသီ တစ်နှစ်ပတ်လုံးနီးပါး နှင်းမြူတွေ ကြွေတာမို့ ‌Xavia ဟာ လောက၌ အဖြူရောင်ဒေသအဖြစ်တွင်သည် ။ တစ်နိုင်ငံလုံး ခြုံကြည့်လိုက်ရင် ဖွေးဖွေးဖြူပြီး ရဲရဲတောက်ရာက ဖယောင်းပန်းနီတွေသာရှိ၏ ။

သို့သော် ရာဇဝင်တွင်အကြီးမားဆုံး သွေးချောင်းစီးရာမြေမှာ Xaviaပြည်သာဖြစ်သည် ။ အေးစိမ့်တဲ့မြေမှာနေထိုင်တဲ့လူသားတွေမို့ သွေးအေးကြလေသလားမပြောတတ် ... Xavia ရဲ့ရှင်ဘုရင်များသည် သွေးရေချိုးပြီးမှ နန်းတက်လေ့ရှိကြသည် ။

Xavia ၏တည်ထောင်သူ ပထမမင်းကြီး
Xavia Arcite သည် နဂါးတစ်ပိုင်းဟု အယူရှိတာကြောင့် နိုင်ငံ့ကိုယ်စားပြုအမှတ်အသားမှာ အနက်ရောင်နဂါးကြီးတစ်ကောင်ဖြစ်ရခြင်းဖြစ်သည် ။ နဂါးတစ်ကောင်၏သွေးပါတာကြောင့် Xavia မျိုးရိုးတို့သည် စိတ်ဆတ်ကာအငြိုးအလွန်ကြီးကြသည် လို့လဲနာမည်ကြီး၏ ။ ထိုအချက်ကတော့ မေးခွန်းထုတ်စရာမရှိ ။

ဗီဇလားပဲလား ကျိန်စာပဲလား မပြောတတ်ပါ ။ Xavia Ash ဆိုတဲ့ ဧကရာဇ်ဟာ လူမဆန်အောင် ရက်စက်ကြမ်းကြုတ်တတ်တာက‌တော့ ပုံပြင်မဟုတ် ။

Xavia နန်းတော်ထဲက တစ္ဆေသရဲများပင်ကြောက်လန့်ကာ ပုန်းရှောင်ထွက်ပြေးခဲ့ကြရသော ဆောင်းနေ့လေးက ဒီလိုစသည် .....

နံနက်စောစော ထူးဆန်းသောအမိန့်တစ်ခုကိုသယ်ဆောင်ကာ ဌာနအသီးသီးသို့ တော်ဝင်သက်တော်စောင့်များရောက်လာခဲ့သည် ။

" အရှင့်အမိန့်တော် ...!!!
အားလုံး အခုချက်ချင်း အတွင်းဆောင်ရဲ့ရင်ပြင်မှာ စုဝေးကြ ! "

ထိုညွှန်ကြားချက်အရ အတွင်းဆောင်ရှေ့ နှင်းတွေဖုံးနေသော ရင်ပြင်ကျယ်ကြီးတွင် အစေခံများအားလုံး သွားစုကြသည် ။ ထောင်ချီသောအစေခံများထဲ နန်းတွင်းဆေးဌာနနှင့် စာပေဌာနတို့နှစ်ခုသာလွတ်မြောက်၏ ။

နှင်းမိုးထဲ ပူပန်စွာရပ်စောင့်နေကြရင်း တစ်ယောက်မျက်နှာ တစ်ယောက်ကြည့်ကာခေါင်းတခါခါ လုပ်နေကြသော နန်းတွင်းသူ၊ နန်းတွင်းသားတို့သည် ပြဿနာ၏အလေးချိန်ကို မသိခဲ့ကြ ။