Days of Counting Camellia (Hiatus)

[4] Dominant Sadist

#Unicode

ယနေ့၌ Xavia ပြည်၏ညီလာခံ တံခါးမကြီးသည် ဟာလာဟင်းလင်း ဖွင့်ထားလေ၏ ။

ဆောင်းလေတဖြူးဖြူးနှင့် ရောပါလာသော နှင်းစက်များကြောင့် မီးတွေဘယ်လောက်ပြင်းအောင်မွှေးမွှေး အသုံးမဝင်တော့ ။
ညီလာခံခန်းမကြီးတစ်ခုလုံးသည် အေးခဲလျက် ။
တက်ရောက်လာသော အမတ်ကြီးများသည် ညီလာခံထဲ နှင်းမှုန်တိုင်းမိနိုင်သည်လို့ ဘယ်တော့မှမထင်ခဲ့တာမို့ လုံလောက်စွာနွေးအောင် မဝတ်ခဲ့ကြ ။
သူတို့သည် ‌နွေးထွေးသောအိမ်တော်များမှ အအေးလုံသောရထားလုံးများဖြင့် ညီလာခံသို့လာရောက်ကြတာမို့ ဆောင်း၏ကြမ်းတမ်းမှုကို ဘယ်တော့မှ မခံစားဖူးပင် ။
ထို့ကြောင့် ရာထူးအလိုက်ဝတ်စုံပေါ်မှတံဆိပ်များကို ဖုံးကွယ်စေသော သားမွှေးဝတ်ရုံထူများကို တကူးတကမဝတ်ကြ ။
အမြဲတမ်း မိမိတို့၏ရာထူးကို ထုတ်ဖော်ကြွားဝါကာ ညီလာခံကိုတက်ရောက်လေ့ရှိကြသည်။
လိုရာမယ်ရာ အပိုလေးတောင် မသယ်လာကြတာဖြစ်သည် ။
ယနေ့တော့ ထိုဆုံးဖြတ်ချက်သည် လွန်စွာမှားယွင်းကြောင်း သိကြရပြီ ။
ပုလ္လင်ပေါ်၌ သားမွှေးဖြူဝတ်ရုံရှည်ဖြင့်အေး‌ဆေးစွာထိုင်နေသော ရှင်ဘုရင်မှလွဲ၍ ကျန်လူများမှာ ခိုက်ခိုက်တုန်နေလေပြီ ။

Xavia ၏ ဧကရာဇ်မင်းသည် တပါးသူ၏နာကျင်မှုအပေါ် မွေ့လျော်သာယာသည့် စိတ်သဘောရှိသည်( Sadist )ဟု ကြားဖူးကြတာကြောင့် ထိုသည်မှာအမှန်ဖြစ်မည် ။
သူ၏ အိပ်ဆောင်၌ ကျားသစ်နက်တစ်ကောင်ကိုမွေးမြူထားကာ ထိုကျားသစ်နက်ကို ဘယ်အ‌စေခံမှအစာကျွေးဖို့မလို ။အဘယ်ကြောင့်ဆိုသော် သူ၏ရန်သူတွေရဲ့အသားကိုသာ ကျွေး‌သည်ဟု ကြားဖူးနားဝရှိသည် ။
အတော် ပက်စက်သောဝါသနာပင် ။
ဒါကြောင့်ပဲ လက်အောက်ငယ်သားတွေကို ညီလာခံထဲပိတ်ပြီး နှိပ်စက်‌တာနေမည် ။
ခုလဲကြည့် ကျေနပ်အားရစွာ ပြုံးနေလေရဲ့. . . လို့ တချို့ကတွေးထင်ကြမည် ။
ဒါပေမယ့် ထိုအချက်များသည် အကုန် ဝက်ဝက်စင်အောင်မှား၏ ။
ဧကရာဇ်သည် သည်လောက်တော့ မရက်စက်ပါလေ ။

ညီလာခံ ခန်းမကြီး၏တံခါးဖွင့်ထားရခြင်းအကြောင်းအရင်းမှာ သူ၏ပုလ္လင်ပေါ်မှလှမ်းကြည့်လျှင် ညီလာခံရှေ့မှာခြေပစ်လက်ပစ်ထိုင်ကာ ဖယောင်းပန်းနီတွေကို တစူးတစိုက်ရေတွက်နေသော ကျွန်မလေးတစ်ယောက်ကို တန်းမြင်နေရလို့ပဲဖြစ်သည် ။
နှင်းဖြူတွေကြားထဲ နီရဲရဲပန်းပုံကြီးအလယ်က‌ ကောင်မလေးတစ်ယောက်ကို နှိပ်စက်ရတဲ့အရသာကိုသာ သူသည် နှစ်ချိုက်ခြင်းဖြစ်သည် ။
လှပစွာကွေးညွှတ်နေသောနှုတ်ခမ်းတို့သည် အရည်တလဲ့လဲ့မျက်ဝန်းနက်များကို သစ္စာမဖောက် ။
သတိထားကြည့်လျှင် လူတိုင်းမြင်နိုင်၏ ။ ဧကရာဇ်၏ထိုပုံစံသည် အမြင်စူးရှသူတချို့၏ မျက်လုံးအောက်ကမလွတ် ။