Days of Counting Camellia (Hiatus)

[45] She is the God's Weakness '

Scroll down ⬇️ Zawgyi version is below.

#Unicode

နှစ်ပေါင်းများစွာ ပိုးအိမ်တွေဖြင့် ပိတ်နေခဲ့သည့် နှင်းရည်သောက်နန်းရဲ့ မီးဖိုချောင်ထဲမှ မီးခိုးခေါင်းတိုင်လေးသည် ယနေ့မှာမူ အငွေ့တလူလူနှင့်... ။ တစ်မနက်လုံး အိုးခွက်အသံဗလံများဖြင့် အသက်ဝင်လို့နေသည် ။

" လိုင်လာ ၊ မီယာ ၊ နီယာ ၊ ... အဆင်သင့်ဖြစ်ပြီလား ? "

Afa ခေါ်လိုက်သည်နှင့် နန်းတွင်းသူလေးသုံးဦးတို့မှာ သူမတို့အား တာဝန်ယူခိုင်းထားသော ခွက်အသီးသီးကိုမကာ ခေါင်းညိတ်ပြ၏ ။ Afa က အဖြူမှုန့်များ ထည့်ထားသော ဇလုံကြီးတစ်လုံးကို လက်ညှိုးထိုးပြလိုက်သည် ။

" ဒီထဲထည့်ပေး "

မီယာက ခေါက်ထားသော ကြက်ဥအနှစ် ၊ နီယာက ခေါက်ထားသော ကြက်ဥအကာ ၊ လိုင်လာက အရည်ဖျော်ထားသော ထောပတ် စသည်တို့ကို ဇလုံထဲ တစ်လှည့်ဆီ လောင်းထည့်ကြသည် ။ ပြီးတာနဲ့ Afa ဂျုံ၊ သကြားနှင့် ထည့်လိုက်တဲ့ပါဝင်ပစ္စည်းများ ရောသမသွားစေရန် လက်ဖြင့် စနယ်ပါတော့သည် ။ ဂျုံက တအိုးကြီးဖြစ်၍ လူပါ လက်အံသေလောက်၏ ။ ဒါပေမယ့် Afa. မျက်နှာတွင် အပြုံးမပျက် ... ။

နန်းတွင်းသူလေးသုံးယောက်တို့ကမူ Afa အားကြိုးမာန်တက် အလုပ်လုပ်နေသည်ကို ဘေးနားမှ စောင့်ကြည့်နေကြသည် ။ တချိန်လုံး အသက်မဲ့စွာ နေနေခဲ့တဲ့ ကောင်မလေးကို အခုလိုတက်တက်ကြွကြွ မြင်ရတော့ သူမတို့လည်း ဝမ်းသာရ၏ ။

" ပင်ပန်းရင် ကျွန်မ နယ်ပေးမယ် ။ သခင်မလေးက နေမကောင်းသေးတာမို့ အိပ်ယာထဲ သွားပြန်လှဲနေလိုက်ပါ "

ဂျုံနယ်နေရင်း ဟောဟဲလိုက်ကာ ၊ နှဖူးစပ်မှာ ချွေးစို့လာ‌ပြီဖြစ်တဲ့ Afaရဲ့ ပုံစံကို ကြည့်နေရင်း ၊ နန်းတွင်းသူလေး မီယာမှ မနေနိုင်တော့ပဲ စိုးရိမ်တကြီး ဆို၏ ။ Afa တစ်ယောက် မနေ့ကပဲ အကြီးအကျယ်ဖျားနေခဲ့တယ် မဟုတ်လား ။

" ရပါတယ် , Afa လုပ်နိုင်တယ် "

Afa အလျော့မပေးချင် ... ။ မျက်နှာပေါ် ဝဲကျနေတဲ့ ဆံချည်မျှင်လေးတွေကို လေဖြင့်မှုတ်ထုတ်ရင်း အားတင်းလိုက်သည် ။