Days of Counting Camellia (Hiatus)

[9] Emperor wants a cage

Check Zawgyi version below ⬇️

#Unicode

" သေဘေးကို တစ်ကြိမ်ရှောင်နိုင်တာဟာ တိုက်ဆိုင်မှုလို့ဆိုနိုင်ပေမယ့် ၊ ဒုတိယအကြိမ်ကတော့ ကံကြမ္မာပဲ "

အဖိုးအိုက ထိုသို့ဆိုလေသည် ။
နွမ်းပါးသောအဝတ်ကြမ်းကို ခန္ဓာကိုယ်၌ ဝတ်ဆင်ထားသော်လည်း အဖိုးအိုသည် နှုတ်မှပညာရှိစကားကိုဆိုသည် ။
အသက်အရွယ်ကြောင့် မျက်နှာမှအရေပြားတို့သည် တွန့်ရွဲနေပြီဖြစ်သော်လည်း ကြည့်မကောင်းနေခြင်းမဟုတ်ပဲ ၊ နက်နဲမှုနဲ့ ရင့်ကျက်ခြင်းတို့ကို ဖော်ကျူးနေ၏ ။
ထိုအဖိုးအိုသည် အခြားမဟုတ် ၊ Raven အင်ပါယာ၏ သစ္စာရှိပရောဟိတ်ကြီးပင်ဖြစ်သည် ။

" ဒါပေမယ့် နှစ်ကြိမ်စလုံး နဂါးနက်ရဲ့ကယ်တင်ခြင်းကိုခံခဲ့ရတယ်ဆိုတဲ့အချက်ဟာ သတိပြုစရာပဲ . . . . .
ဘာအကြောင်းကြောင့်ပဲဖြစ်စေ အသက်သခင်လဲဖြစ် အဆင်းလဲလှတဲ့ယောင်္ကျား‌တစ်ယောက်အပေါ် ငယ်သူတို့ရဲ့သဘောသဘာဝအရ စိတ်ယိုင်မိရင်လဲအပြစ်မဟုတ်ပါဘူး "

ထိုစကားကိုကြားတော့ ကုတင်ပေါ်မှာ နှုတ်ဆိတ်ကာလှဲနေတဲ့ Afa တစ်ယောက် တုန်လှုပ်သွားရသည် ။
ဤလောက၌ နဂါးနက်ဆိုတာဟာ Xavia ရဲ့ ဘုရင်တွေကို တင်စားတဲ့အခေါ်အဝေါ်ဖြစ်ကြောင်း လူသားတိုင်းသိသည် ။

Afa က ထိုသူကို . . . ?
ပရောဟိတ်ကြီးက ဘာကြောင့် Afa ကို ဒီလိုစကားပြောရတာလဲ ?
ဘာအဓိပ္ပါယ်လဲ ?

အဆင်းလှတဲ့ယောင်္ကျားဆိုတဲ့ အသုံးအနှုန်းသည် မျက်လုံးထဲမြင်ယောင်မိလိုက်သော လူသား၏အလှတရားအတွက် မလုံလောက် ။
ဒါပေမယ့် Afa ဟာ အဲဒီယောင်္ကျားအပေါ် စိတ်ကူးထဲမှာတောင် ရင်ခုန်မိဖို့မရဲတာဖြစ်သည် ။
ထိတွေ့ခံစားကြည့်ရုံနဲ့ သေတန်တဲ့အလှမို့ ။
အခုလိုအတွေးဝင်မိတာကိုက မတန်တရာ ။
Afa ဟာ ထိုသူရဲ့ မျက်လုံးထဲမှာ စူးနေတဲ့ဖုန်တစလိုပဲ ၊ အနှိပ်စက်ခံ ကျွန်မလေးတစ်ယောက်သက်သက်သာ ။

နေရောင်အောက် ရွှေအိုရောင်များယှက်ပြေးနေသကဲ့သို့ အရည်လဲ့သောမျက်ဝန်းညိုလေးများသည် အတွေးနယ်ထဲ ထွေပြားသွား၏ ။
ပါးလျသောနှုတ်ခမ်းလေးများ ဖြေးညှင်းစွာ ပွင့်ဟသွား‌ပေမယ့် ခွန်းတုံ့ပြန်လာခြင်းမရှိ ။
မြင်သာသည်က မျက်နှာ‌ပေါ်မှ အားငယ်မှုတို့ဖြစ်သည် ။