Days of Counting Camellia (Hiatus)

[41] A drop of poison

Scroll down ⬇️ Zawgyi version is below .

#Unicode

အသက်ရောခန္ဓာပါ ပေး၍ တစ်သက်လုံး ခစားရမည်ဟူသော အရှင်သခင်အလောင်းလျာလေးအား ပထမဆုံး မျက်မြင်တွေ့စဉ်က Bentleyရဲ့ အိပ်မက်တွေ အစိတ်စိတ်အမွှာမွှာ ပြိုပျက်ခဲ့ရသည် ။

ပါးစပ်အဟောင်းသားဖြင့် အံ့ဩကာ ရပ်နေသော Bentley အား ‌မျက်စိရှေ့မှ ခပ်ပိန်ပိန်ကောင်လေးက ရယ်ပြနေလေ၏ ။

" မင်းက ကွန်မန်ဒါ Raymondရဲ့သား , Bentley မလား ? "

" Ben , ဒူးထောက်ပြီး အရိုအသေပေးလေ ! ဒါ Archduke နဲ့ သခင်လေး Kain ပဲ "

သူ့ကျောကို ပုတ်ကာ ဒူးထောက်ခိုင်းနေသော ဖခင်၏စကားကြောင့် Bentley ပို၍ ကြောင်အမ်းသွားရသည် ။ ယခုအခြေအနေသည် Ben.အတွက် အကြီးအကျယ် တုန်လှုပ်မှုကြီးပင် ။

အနှီကျစ်သေးပိန်လှီ‌နေသော ကောက်ရိုးရုပ်နှယ် ကောင်ကလေးသည် သူ‌တစ်ချိန်လုံး စောင့်စားခဲ့ရသည့် 'အရှင်သခင်' ဖြစ်သည်တဲ့လား ?

သစ်သားဓားကလေးကို ခါးကြားမှာထိုးကာ သူရဲကောင်းကြီးပုံဖမ်းနေတဲ့ ‌Bentley သည် ထိုစဉ်က အသက်ခုနှစ်နှစ်သာ ရှိပါသေး၏ ။ သူ စိတ်ပျက်သွားတဲ့ အမူအရာကို မထိန်းနိုင် ။

" Ben ! "

" ရတယ် ကွန်မန်ဒါ Raymond , ကျွန်တော်နဲ့ Ben က အခုကစပြီး သူငယ်ချင်းတွေ ဖြစ်တော့မှာပဲလေ "

ကြက်သေသေနေသော Bentley ၏ ပုခုံးထပ်သို့ လက်ဖြူဖြူသေးသေးလေး လာတင်ကာ ထိုကောင်လေး လေကြီးလေကျယ်ဆို၏ ။ Bentley မှာ အလိုမကျ ... မျက်နှာကြီးပုပ်လျက် ... ။

ထိုတွေ့ဆုံမှုအပြီး Ben သည် Kain ဆိုသော အထက်လူကြီးလေးအား အမြဲလိုလိုတွေ့ရပါလေတော့သည် ။ စံအိမ်အထိ အလည်လာကာ Bentley ဘာလုပ်လုပ် အနောက်မှတကောက်ကောက်လိုက်သည် ။ သူ့အပေါ် သစ္စာတောင် မခံရသေးသော Bentley အပေါ် ထိုတည်းက ဆရာကြီးလုပ်ကာ အမိန့်တွေပေးတတ်သည် ။

စစချင်းတွင် လွန်စွာစိတ်ရှုပ်ခဲ့ရသော်လည်း နောက်ပိုင်း ထိုကောင်လေး၏ စိတ်ထားကို Ben မြင်လာခဲ့၏ ။

" ဟင့် အီးဟီး ... Ben , မင်း သေတော့မှာလား ? "

" ကျွတ် , မသေဘူးကွ !
ဒါ ဓားခြစ်ရာလေးပဲကို ... ဒါနဲ့ မင်းက ဘာလို့ငိုနေတာလဲ ပျော့စိ‌ပျော့ဖတ်နဲ့ ။ ဒဏ်ရာရတဲ့လူက ငါလေ ! "