မောင်ထူးနဲ့ပေါင်းပြီး ကျွန်တော်ပါထူးသွားတယ် ( Completed)

extra_7(uni)

အဖေရယ်၊ အမေရယ်၊ ညီလေးရယ် သုံးယောက်လုံး ပြည်ပကို ခရီးရက်ရှည်ထွက်သွားကြတယ်။ အဲ့တော့ ဒီအိမ်ကြီးထဲမှာ ကျွန်တော်နဲ့ထူးအောင် နှစ်ယောက်တည်းပဲ။ အိမ်မှာ ဘယ်သူမှမရှိကြဘူးဆိုတဲ့အသိက ကျွန်တော့်စိတ်ကို ရွှင်လန်းစေတယ်။ ပြီးတော့ ဒီနေ့က ရုံးပိတ်ရက်ဖြစ်တယ်။ ရုံးပိတ်ရက်မှာ ငါးဖယ်ဖက်ထုပ်ပေါင်းလုပ်စားကြမယ်တဲ့ ထူးအောင်ကပြောထားတယ်။ လိုအပ်တာတွေအကုန်းလုံးကိုလည်း မနေ့ကတည်းက ဝယ်ထားပြီးသား။

ကျွန်တော်တို့နှစ်ယောက်လုံး အခုမီးဖိုခန်းထဲ ရောက်နေကြပြီ။ ကိုယ်ဘာကူလုပ်ရမလဲလို့ ထူးအောင်ကိုမေးလိုက်တော့ မုန်လာဥနီသုံးဥကို ဂျစ်နဲ့မျှင်မျှင်လေးတွေ ခြစ်ပေးဖို့ပြောတယ်။ ကျွန်တော်က အချက်အပြုတ်မကျွမ်းတော့ ရှယ်ကျွမ်းတဲ့ထူးအောင်ခိုင်းတဲ့အတိုင်း လိုက်လုပ်ပေးရတယ်။

ကျွန်တော်က မုန်လာဥနီခြစ်နေတုန်း ထူးအောင်က ကြက်သွန်မြိတ်နဲ့ နံနံပင်ကို သေးသေးလေးတွေဖြစ်အောင် ကက်ကြေးနဲ့ကိုက်တယ်။ ဂျင်းနဲ့ကြက်သွန်ဖြူကို အခွံခွာပြီး ညက်အောင်ထောင်းတယ်။

အားလုံးပြီးတော့ ငါးဖယ်၊ မုန်လာဥနီ၊ ကြက်သွန်မြိတ်၊ နံနံပင်၊ ဂျင်း၊ ကြက်သွန်ဖြူ၊ ဆားနဲ့အချိုမှုန့်အနည်းငယ်ထည့်ပြီး သမအောင်နယ်တယ်။ နယ်တာတော်တော်လေးနှံ့မှ အသင့်လုပ်ပြီးသား ဖက်ထုပ်ရွက်လေးတွေထဲကို ထည့်တယ်။ ပြီးတော့ ပေါင်းအိုးထဲထည့်ပြီး ပေါင်းထားလိုက်တယ်။

ပေါင်းနေတဲ့အချိန်မှာ ထူးအောင်က ဖက်ထုပ်နဲ့တို့စားဖို့ဆိုပြီး အချဉ်ရည်လုပ်ဖို့ပြင်တယ်။ အသင့်စားလို့ရတဲ့ အချဉ်ဗူးတွေဝယ်လိုက်မယ်ဆိုလဲမရဘူး။ သူကိုယ်တိုင် လုပ်တဲ့ဟာမှ စားချင်တာတဲ့လေ။

အရင်ဦးဆုံး မန်ကျည်းဆော့နဲ့ ခရမ်းချဉ်သီးဆော့ကို ခွက်တစ်ခွက်ထဲ ရောထည့်လိုက်တယ်။ ပြီးတော့ ငရုတ်သီးအစိမ်းတောင့်၊ ကြက်သွန်ဖြူနဲ့ဂျင်းကို ငရုတ်စုံနဲ့ကြေညက်အောင်ထောင်းပြီး အဲ့ဆော့ထဲကို ရောထည့်တယ်။ နံနံပင်ကို နုတ်နုတ်ကိုက်ထည့်တယ်။ ဆားနဲ့ အချိုမှုန့်ကိုနည်းနည်းစီထည့်တယ်။ ရေနည်းနည်းထည့်တယ်။ ပြီးတော့ ဇွန်းနဲ့ သမအောင်မွှေတယ်။ မကြာဘူး အချဉ်နံ့သင်းသင်းလေး ထွက်လာတယ်။