AFTER (بالمصري)

Chapter 16

قاعده فالمحاضره حاطه ايدي علي خدي وباص علي دماغ هاني الي قاعد قدامي.. نفسي اخبطه بس قولت استني بعد المحاضره..

" هااااني؟ قوم قول انا كنت بقول ايه دلوقتي؟"

زعق الدكتور لهاني عشان كان قاعد سرحان.. ضحكت لوهله وقام هاني قال..

" كنت بتشرح الدرس يا مستر.. في مشكله؟"

قال هاني من هنا والقاعه كلها قعدو يضحكو.. وقال..

" مستر دي لما كنت فالمدرسه يا روح امك، قوم قول انا كنت بقول ايه!"

زعق تاني وقام قال..

" حضرتك زعقت وقولت جمله (مستر دي لما كنت فالمدرسه) مع نظرات شر وحقد علي جلالتي"

قال هاني وهو مربع ايده والمستر مستغرب.. مستر ايه بس أتيسير، وقال..

" خلي جلالتك واقف، تيسير.. قومي اني جاوبي"

قالي الدكتور وهاني بص عليا بصه حقد، بصيت عليه بصه انتصار وقومت..

" ايه.. اه.. من قصه حياه قرد يتيم من غابات السفانا الاستوائيه ، هحكيلكم نبذه منها.."

قولت ولقيت الدكتور استغرب شويه واداني الاذن واتكلمت.. هرويلهم نبذه من قصه بجد اثرت فيا وخلتني عيزه اكمل تعليم..

" وانا صغير زمان امي كانت رايحه المكتبه لأسباب معرفهاش، دخلت مخزن كتب وقعدت افتح الكتب واتفرج عالصور الي فيهم لحد ما في كتاب لفت نظري اوي، حبيت اخده لأني كان عندي فضول عجيب اني احتفظ بيه.. الكتاب اسمه يوميات حياه قرد يتيم في غابات السفانا الاستوائيه.. اسمه غريب ويضحك بس القصه بجد حزينه.."

" انجزي وحيات امك ورانا شغل.."

قالي هاني بصوت عالي.. احرجني الكلب.. المهم اتكلمت..

" زمان كان في عيله بسيطه جميله، اب وام وابن.. وكانو افضل عيله في سلاله القرود كلها.. لأنهم كانو طيبين جدا.. وكانو عايشين في شجره كبيره اوي في الغابه.. وفي يوم من الايام، جم الاعداء بتوعهم من البشر وقطعو الشجره بتاعتهم ومات الاب والام اما الابن فاهو هرب.. وزعل القرد جدا علي باباه ومامته..."

" اكنك بتتكلمي عني.. انا حزين زي القرد ده بالظبط.. اهئ"

سمعت زيدان بيقول كده، ضحكت لوهله، التويته بتاعته عالتويتر كمان بتدل علي الحزن الي هو فيه.. كملت القصه..

" وهرب القرد ده وهو بيعيط ومش عارف هو رايح فين، ومشي في الضلمه وكان في قرود بتضايقه كتير بس فضل صامد لحد ما وصل للشمس..."

" مشي لحد الشمس؟ ازاي!"

سمعت سؤال هاني الغبي بس طنشته وكملت..

" وصل لضوء الشمس واترمي محدش عايز ينقذه بموزه، واكتشف مع الوقت انه وصل غابات السفانا، وقرر انه ياكل عشب السافانا عشان يسد جوعه علي ما يلاقي موز.."