صحيت واخدت كام دقيقه كده عشان استوعب اني نمت علي الكنبه امبارح في الشقه الجديده بعد ما عملت الاكل وهاني مكلمنيش.
"هاني؟" ندهت عليه يمكن مستخبي هنا ولا هنا، قومت وحسيت ان جسمي مكسر اصل نومتي كانت مش مريحه، مشيت للأوضه بتاعته وفتحت الباب مكنش جوه.. ندهت تاني.. غار فين ده من امبارح؟
رجعت الصاله تاني وقفلت التلفزيون الي كان شغال من امبارح علي قناه الافلام واخدت تليفوني من علي الكنبه وبرضه مردش عليا لا رسايل ولا مكالمات والساعه دلوقتي سبعه الصبح.
حاولت اتصل بيه تاني بيديني مغلق، روحت وانا مضايقه للمطبخ وعملتلي كوبايه قهوه كده عشان افوقله لما اشوفه، راحت عليا نومه امبارح منغير ما اخلص صينيه المكرونه بالبشاميل ونشفت ارميها بقي.
طلعتها تاني من الزباله لما افتكرت هاني، خليه يجي يقرقش الباقي، ودخلت عشان اجهز للشغل.
"روحت فين ياهاني منك لله" قولت وانا خارجه من الاوضه رايحه الحمام اغسل وشي، كنت هنسي.. انت السبب ياهاني في كل ده..
وانا بغسل سناني بقي قعدت افكر ايه الي ممكن حصله يخليه ميردش عليا خالص، خبطه اتوبيس؟ تاه؟ سافر وسابني عشان ينفد من الجوازه؟ الشقه دي عليها اقساط؟ قابل حد يعرفه في المكتبه والوقت جري منه؟ بس اكتر حاجه مقنعه انه ممكن يكون راح حفله من حفلات الواد لوسي الصايع.. انا قلقت كده ليكون حصله حاجه؟
طلعت ولبست فستان طويل ومحطيتش ميكاب كتير عشان مليش مزاج وهاني مختفي ومش عارفه بيعمل ايه، ونزلت من البيت وعلي ما وصلت بقي ابتديت اتعصب لأن دماغي ابتدت تجيب تردد قديم الي هو بيخوني مع حد.. بيتهرب مني.. ده كان عامل زي العيل ايه الي خلاه يروح يعتمد علي نفسه ويمشي لوحده؟
واضح ان كان شكلي مضايق لأن شكل فتحي اخد باله وفضل باصصلي، او هو علي طول باصصلي كده مش عارفه.. روحت قعدت علي المكتب وابتديت شغل علي طول بس مش مركزه خالص وفضلت اعيد وازيد في نفس الصفحه لحد ما حفظتها.
والصبح عدي ولاقيت حد داخل بجلابيه، افتكرته هاني بس طلع فتحي داخل اوضتنا وجه عند مكتبي "ازيك؟"
"الحمد لله؟"
"انا كنت نازل اجيب غدا و.. جي اشوفك لو عايزه حاجه؟"
بصراحه كنت هرفض طلبه بس انا مش هقعد افكر كتير في غياب هاني وتركيزي كده كده رايح فهشغله بالأكل.
"ماشي، رايح فين؟"
"الشبراوي..."
"انا جايه معاك!" قولت واخدت شنطتي مع اني مش طايقه حد من ريحه هاني بس لازم افك عن نفسي هفرقع.
نزلنا ومشينا من عند مطعم الشاورما الي هاني وداهوني اول يوم شغل ليا هنا واكلنا شاورما كتير وكنت زعلانه اوي ان هاني مش معانا.
YOU ARE READING
AFTER (بالمصري)
Romanceتيسير هونج، فتاه جامعية عندها 18 سنه درجاتها عاليه وحبيبها زي الفل، علي طول بتخطط للمستقبل لحد ما قابلت الفتي الصعيدي ابن الكلب الي اسمه هاني عبفغور البرعي عنده كوليكشن سواطير وسكاكين كتيره دمرلها الخطط الي حطتها. تحذير- الكتاب ده بيضم تفاصيل مضحكه...
