كمّال الآيّار

الحَلقة التاسعة

#كمال الايار
#رُسُل الكاتب

وگف گدامي ونظراته تبث حقدها الي :- ايڤان شعنده جاي وياكم؟

والله عبالي عنده سالفة صدگ طلع جايبني مناك لهنا علمود ايفان :- شيخصك؟

:- انتِ وكل شي راجع الچ يخصني .. حچاها ببرود مستفز

:- غلطان لا اني ولا اي شي يخصني الك دخل بي

ابتسم ابتسامة غريبة وركز بعيونه على شعري واردف:- حلوة گصة شعرچ

خزرته بغضب ودرت وجهي اريد ارجع بس استوقفني صوته اللي احيا كل شي اندفن من سنين :- هيچ هنت عليچ وما جربتي حتى تسالين علية ؟

انداريت بعصبية مكبوتة طلعت كل شي چنت ضامته بداخلي :- اسال ؟ ، اسال واني مكتشفة انت عندك علاقة قبلي ومحاچيلي عنها وفوگاها تدير ظهرك وبالچذب متحاول تشرحلي وتفهمني ؟؟

:- انتِ لو حمار لو حمار ماكو حل وسط

:- ليش بلا

:- زعلانة لان عندي علاقة قبلج ؟ تحجين صدك انتِ يعني هي قبلج وراحت لو موجودة جان حبيت عليها برايج ؟

..بقيت اهز برجلي بعصبية بدون ما احچي شي

كمل هو :- شلون بيج يابة ولج وينها هي وينها انتِ ليش تتحيونين

باوعتله بحقد وحجيت:- ليش عفتني سنتين كاملات

شو هذا گعد عالمسطبة من الضحك انوب استفزني فوگ ما هو مستفزني :- ترة محچيت نكتة تضحك

مسح على وجهه وكل شوي يسكت ويرجع يتذكر ويضحك واني احس الدخان گام يطلع من راسي من وراه

گام وگف گدامي ويباوعلي بنظرات هايمة تخلي الحجَر يلين واني اشح بنظري عنه حتى ما انفضح گدامه ..

نبهني صوته وهو يگول:-ابد ما عفتج بكل ذيج السنين ولا تفكرين بيوم اني اعوفج اني مثل خيالج مايغيب عنج ولو لحظة بالظلمة وياج ومن تطلع شمسج هم وياج بس عفتج كل هالسنين لغاية في نفس يعقوب

:- وشنو هالغاية

:- غاية وبس انسي وكافي بُعد ،، كل هالسنين وانتِ ماكو خلينا نرجع مابية بعد حيل فراگ

:-لا والله

:- اي والله

:- ماريد

:- لا حبابة ليش .. حچاها باستعباط

:- شنو تستعبط حضرتك ؟

:- اخسي استعبط بيج

:- ديلا خوش

:- خل نتزوج

شهگت بصدمة ونسيت كل شي ما احس الا عطت :- شنو

خزرني وظل يباوع منا ومنا لا احد يشوفنا :- صوتج افندية كل العالم راح يدري من ورة عيطتج