كمّال الآيّار

الحَلقة الثامن والاربعون

#كمال الايار
#رُسُل الكاتب

انـا اول ابنادم
گلبه ما يبرد
انا المبيوع سَد بسَد
انا الخلص حياته
يگول
چا وحد؟

كملت اخر امتحان ورجعت بيومها اتنفس تعب
وصلت للبيت محد چان موجود لا كمال ولا
ايما طبيت سبحت وبدلت وطلعت
طلبتلهم اكل من التعب ما بية اوگف
عالطباخ واسوي شي ..

رحت للغرفة بقيت اگلب بالتلفون
لحد مخابرني ابو التوصيل
طلعت استلمته ورجعت للغرفة
طفيت الاضوية ونمت من التعب

حسيت على ايدين ناعمة تمشي على وجهي
فتحت عيوني بتعب صارت گدامي
ايما ابتسمت الها بحب وحضنتها
:- شوكت جيتي ماماتي

:- اسة

:- بابا وين

:- اث ووم

حضنتها مگزگزة عليها
:- اروح فدوة لليگول باث روم

ضحكت بصوت عالي واني ادغدغ بيها
بهالاثناء طلع كمال من الحمام باوعلنا
ابتسم :- صح النوم

:- هلوو شوكت جيتوا لعد

:- قبل شوية ما صار هواي

:- هممم ،، يلا ماما تعالي دا ابدلچ

اخذتها غسلت وغسلتلها وبدلت ملابسها
لملابس بيت وطلعت حضرت الاكل
لحد ما كمل كمال واجة
للمطبخ چنت مخليته عالميز
وگاعدين ننتظره
سحب كرسيه وگعدنا ناكل ..

مرت فترة وخلصت عطلتي وبلشت الكورس الثاني
وعلاقتي بكمال زادت اكثر وكله حسب الخطة ماشي
وعلاقتي بايما اكثر صارت
تعلقي بيها زاد
صرت ما اشوفها الا بنتي
وحُبها ؟ حبها اكثر من روحي ..

خلصت المرحلة الرابعة ونجحت للخامسة
ببداية الدوام چان الجو حلو بداية العاشر
بدلت لايما شورت كابوي وكيمونو ابيض طالعة بطنها
وشعرها فاتحته ولابسة شحاطتها وتفتر بالبيت
قبل اسبوع صارت كدامي هويتها
عيد ميلادها ١١/١٠/٢٠١٨ صادف يوم خميس
واليوم اربعاء حجزتلها كيكة عليها صورتنا اني وياها
وكمال اخذناها چنا طالعين مرة باربيل ..
و حجزلتها ميز بواحد من مطاعم بغداد زينة كاملة
وهو ترتيب كامل كله عليهم ..
واتصلت على بيت اهله لكمال عزمتهم وعزمت اهلي
هذا كله وكمال ميعرف اليوم چنت مقررة من يرجع
احچي وياه انتظرته للعصر يلا رجع
چنت بالمطبخ
سمعت صوت خرخشة المفاتيح
وصوت ايما وعيطتها برة
طلعت يمهم
صارت گدامي حاضنها ويبوس بيها
باوعتلهم بلطف

:- هلوو

باوعلي بنظرة كلها حب :- هلو گلبي

اندار لايما :- هاي شلابسة بابا شو الكرش طالع

لفظها تحسن شوية گلتله :- دادي ماما لستنياهم

:- اويلي يابة و ماما تموت عالفساد