كمّال الآيّار

الحَلقة السادس والثلاثون

#كمال الايار
#رُسُل الكاتب

محدش بيموت من الزعل ،
بس الزعل كفيل إن يموت شغلات حلوة جوانا ..

- ابتسم وفزز ابتسامته اتصاله اللي اجاه فتح خط يحچي وية المتصل ثواني بس وانگلبت كل معاني وجهه وعيونه گامت تذب جمر .

باوعتله بقلق :- شبيك كمال شصاير ؟

غمض عيونه بتعب :- صار عندي شغل ضروري لازم اروح من ارجع نحچي تمام

هزيت راسي وهو راح عالكنتور فتح القاصة اخذ فلوس كمية وطلع من البيت بقى بالي يمه وخايفة ادري صاير شي بس شنو مديجي ببالي اي شي ..

لبست الصاية فوگ ملابسي والشال لبين مخابرني غيث طلعتله سلمت عليه وصعدت وصلني وراح طبيت لبيت جدو لگيتها الامة مگلوبة صار گدامي رامي واگف وسنمار وادم وليث سلمت عليهم ودخلت جو خالو وخالة وجدو وبيبي گاعدين رحت يمهم سلمت عليهم توني كملت وطلعت امي ومرت خالي من شافتني ضحكت ولمعت عيونها ركضت عليها حضنتها وابوس بيها وعلى مرت خالو بهالاثناء وطبوا الولد من برة رامي بأيده دمبك وليث بأيده دف ويدگون بيها ماحسيت الا البنات كلها طلعت والولد يرگصون وخالة طبت ترگص بالنص وتغني

:- فَرحانة يا امي اليوم فرحانة
    فَرحانة الحبايب كلها ويانا
   
    ويا اهل القوط ذبوا القوط
     اڤوني لبس قاطه

واگفة تغني والولد يرگصون والبنات كلنا نرگص بعدين رِتاج تذكرت السماعة گبل راحت ربطتها وشغلت اغنية

أول القول ذكر الله والشياطـــين نغزيها
دق الفنجـــان بالدله للمعـــازيم واسقيها
يا بي يا بي يا بييه حمولي الكف شوية
اللي فرح لــــينا يـــوقـــف ويهــنــيــنا
غندرة مشــــي العــــرايــــــس غندرة

هي چانت تميل للدبكة وكلنا ندبك وياها ونرگص بحيث گمنا نلهث من التعب لحد ما صار الوكت گالوا يلا گمنا عدلنا مكياجتنا وطلعنا سيارات تطلع تقريبا بالـ١١ سيارة صارت گعدتنا اني وادم ولينا ومي وليث وسيارة اللخ امي وابوية وبيبيتي وخالتي وجدو وسيارتين بيها بقية الشباب وسيارة لخوالي ونسوانهم والبقية اقارب كل احد جاي بسيارته ..

الطريق كله گلبناه گلب بالرگص والاغاني اللي يشوفنا يگول عرس ورايحين زَفة مو خطوبة وتالي يشحتونا من الباب ومينطونا

وصلنا لبيت جُمانة چانوا اخوانها واگفين بالباب البرة يسلمون عالزلم واحنا دخلنا جوة للبيت استقبلتنا امها وخالاتها وعماتها وگرايبهم وبعد بنات اعرفهم بالاسماء بس ما عندي علاقة بيهم عفتهم ورحت لجُمانة اللي طالعة ملاك بفستانها الوردي الفاتح وخصلات شعرها الناعمة النازلة على وجهها وتسريحتها المفتوحة برفعة بسيطة ومكياجها الوردي النازك من صدُگ طالعة اميرة ..

سلمت عليها وهي ايديها تهتز من الرهبة بقيت اطمنها وبنفس الوقت اعرفها عالموجودين هي تعرفهم بس الگرايب لا فگعدت اعرفها عليهم ..