كمّال الآيّار

الحَلقة الحادي عشر

#كمال الايار
#رُسُل الكاتب

اول ما دخلت وصارت عيني عالموجودين بقيت صافنة ثواني استوعب المرة الصارت گدامي شكلها مو غريب علية احسني شايفتها قبل ملامحها وشكلها مألوف الي وكُلش همين ..

بعدت كل شي من بالي بلحظتها ما ردت اثير الانتباه ودخلت سلمت و قدمت الضيافة چانوا جايين نسوان ثنين وبنات ثنين وحدة اللي شكلها مو غريب وثانية بصفها گاعدة وبعد بنات گاعدين يمهم يعني يطلعون بعمري او اقل بسنة سنتين ..

اجاني صوت وحدة من اللي گاعدات الكبار حچت ببشاشة :- شلونج ماما ايار

رديتلها بصوت مرتبك :- الحمدلله خالة

:- شنو تدرسين حبيبتي

:- طب مرحلة ثانية .

:- حبيبتي كل التوفيق ان شاء الله ..

ابتسمتلها بلطف وسكتت بقت تحچي هي وماما واني بس صافنة واسمع مثل الهبلة لحد مگالت :- تعالي يوم يمي دا اشوفچ الكوشات حتى نجيبها ..

بقيت اباوع على امي اشرتلي روحي گمت يمها بتوتر سوتلي مجال وگعدت وهي طلعت ايباد وبدت تراويني كوشات شكلهم كلش لطيف وحلو لحد ما استقريت على وحدة تصير مُقوسة ومن فوگ شكل خواتم وكلها ورود والوان فضية وكرستال ابيض وبيها الوان متداخلة وردي شكلها كلش فيكة اشرتلها عليها وگلتلها :- خالة حسيت هاي لطيفة ؟

:- شو اشوف ..

شافتها وحچت :- صحيح شكلها فخم وحلو هسة عجبتج هذي ماما يعني اوصيها ؟

هزيت راسي بأي وهي كملت :- والتوزيعات عاجبج شي حبيبتي ؟

:- لا خالة مبالي شي ببالچ انتِ؟

:- احس اذا نسويهم علب خاصة توصاه بشكل حلقات ونخلي بنصها خاتم حلو شكل واحد  وقطعة كاكاو و ومثل شي صغير على شكل وردة نحط بيها حنة وكل واحد وعلبته

عجبتني كلش فكرتها ومبينة امه تحب الفيكات واغلب اختياراتها تميل للفخامة بس بنفس الوقت اسلوبها لطيف ..

هزيت راسي وگلتلها :- بس خاف منلحگ وهو بقى بس يومين ؟

:- خليها علية .. حچتها بأبتسامة ..

بعدها بقوا يسولفون هي وماما اقل الربع ساعة وطلعوا واني رحت اگلب بالنت على فساتين وبعد مية استشارة واستخارة يلا اسقتريت على ثنين واحد مزج لونين بدايته بالللون التُرابي الفاتح ويبدي يتدرج باللون لحد ميغمق وينتهي باللون الاسود قماش واگف بدون اكمام وبي نفشة بسيطة وقصير شكله چان حَرفيا يگطع و واحد ثاني ماروني هادئ طويل وهمين بدون اكمام بس بفتحة ساق طويلة توصل من فوگ الفخذ وتنزل ..

وصيتهم وحجزت يم مركز تجميل تقريبا كملت كل شي لان كل الصعب هم اخذوا وبقت بس الاشياء السهلة والخفيفة علية ..