كمّال الآيّار

الحَلقة الثالث والخمسون

#كمال الايار
#رُسُل الكاتب

شگد صار اعرفك
ما عرفــتك!
شگد ردت افهمك
ما فهمتـك!
اهل الهوى يشوفونا ثنين
ويجوز حسبونا سعيدين
الناس الهم نظرة العين
وانت ابعد من النجم عني
يا خوفي اضيع من المشيتين
ويا خوفي بيك يخيب ظني
لا ظرفك يشابه ظروفي
ولا حسرتي تعادل حسرتك
شگد صار اعرفك
ما عرفتك!

باوعتله بضياع وتعب
رخت ملامحه وية نظراتي
حركت اكتافي بـ"ما اعرف"
وعيوني نملت دموع
رجف فكي وغصب عني غمضت ودموعي
نزلوا مثل سيل واجة وكت فيضانه ..

گام من مكانه متحرك باتجاهي
وعيونه بيها اشكال الكلام
گعد يمي ورچى راسه عالقنفة
مكتف ايديه وصافن بعيوني

بقى على هالحال لفترة وثنينا ساكتين
لحد ما اني حچيت
:- اريد ارجع لبيتي

:- امم

:- شنو امم دريد ارجع
شنو حابسني هنا ؟؟

رفع راسه باوعلي بحقد
:- اني ما حسبتي حساب الي
زين اهلچ شلون انطاچ گلبچ عليهم؟

انعقد لساني لمن جاب اهلي
فعلاً اني چنت انانية وتجاهلت كل شي
وشردت بروحي وعفت كل شي وراية
بس والله مجبورة
اني اعرف اهلي عايشين وحياتهم ماشية
بس اني اللي حياتي انتهت وخلصت عنده
ولو هم يدرون چان هم اللي سفروني
ومابقوني دقيقة وحدة يمه ..

انداريت عليه بقهر
:- شگلتلهم

رفع حاجبه :- ويهمچ؟

:- كمال لخاطر الله لتسوي هيچ
تتصرف وكأن اني المذنبة الوحيدة بكل اللي صار
شنو نسيت حضرتك شسويت بية
دمرتني دمار و وراها جايني مصدگ نفسك تغيرت
ولازم اني اتحملك وانتظرك لما تتغير حتى نعيش حياة
سعيدة !، انتَ سويت كل شي ونسيت اللي سويته
چان كافي يقسي اكبر گلب ومبرراتك جتي متأخر
جتي بعد ما مات كل شي حلو واللهفة والشغف
كله انتهى وخلص ..

:- بس بالاخير تغيرت!!!

:- بعديش؟؟؟
بعد ما دفعت روحي وصحتي وشبابي ثمن الها

:- انتِ ليش هيچ گلبج اسود؟؟

:- لا گلبي مو اسود
گلبي تعلعل منك انطاك فرص
لما گال بس
مثل ما رب العالمين ينطي فرص التوبة
للمسلمين لحد ما يجي يوم وتنغلق باب التوبة
وبعد كل شي ما ينفعلهم
چنت تگدر تصلح حالك وتصلح علاقتنا
بس انتَ اللي تماهلت و وصلتنا لطريق مسدود
لتجي بعدين تگول گلبچ اسود
انتَ اللي تصرفاتك وافعالك سودة ومتنحچي

:- ايار بيناتنا طفلة لا تنسين شترديها تعيش؟
متلطلطة بيني وبينچ ؟؟

:- جدا عادي اني وانتَ مسؤولين عليها
مو شرط يجمعنا بيت واحد ويلمنا كلنا بي
نگدر نربيها واحنا بعيدين على بعض .