كمّال الآيّار

الحَلقة ثلاثون

#كمال الايار
#رُسُل الكاتب

:- وعندج الموت ولا تبقين على ذمتي؟؟؟

:- اهون علية بالف مرة

جر نفس بتنهيدة مشتعلة ورد بصوت متشحرج:- هاهيَ بس صيري زينة واللي ترديه يجرالچ .

حبست الغصة بصدري ورديت :- هاهيَ هذا اللازم يصير

هز براسه وگام طلع من الغُرفة ..

حبست دموعي وامنعهن ينزلن هذا اللي ردته وهذا اللي اختاريته حُب وطلع فاشل وهذا اللي لازم يصير محد يموت ورة احد ..

دخلت علية امي بس ماحچت شي الظاهر حاچين وياه برة ..

لليل طلعنا من المستشفى للبيت ..

ثاني يوم العصر دگ موبايلي سحبته من يم راسي چانت رُبى اللي دتتصل تجاهلته وما رديت مو هم نفسهم اللي تعاونوا وياه ضدي ويتسترن عليه ومرادني اعرف خلص اذن لا اريدهم ولا اريد اسمعهم حتى ..

سويته صامت ورجعته عالميز حتى ميزعجني شوية ودخلت امي للغرفة لملمت كم حاجة بالگاع و وگفت تعدل بالبردة وتردد :- هاي افتحيها شوية تفوتلچ شمس رايحة مظلمتها عليچ راح تتخبلين

عرفت عندها سالفة فصرت اقوى منها وگلتلها :- گولي امي شنو السالفة اللي تردين تحچين بيها

عافت البردة وجتي گعدت يمي :- خابرتني وسناء تريد تجي هي وبنتها وچنتها عليچ يحچون وياچ اني گلتلها اذا تردون تحاچوها على كمال فشغلته محسومة ترى ودنمشي باجراءات الطلاگ گالت لا والله ما النا دخل بكمال احنا جايين على ايار وبعد استحيت منهم گلتلهم هلا بيكم ادري بيچ انتِ مقهورة وضايجة بس ميخالف امي خطار ببيتنا بعد هذا عيب علينا نطرده اللي اريده منچ بس تگعدين يمهم واقسملچ بالله اذا جابوا طاري كمال اني اتصرف وياهم ..

:- صدگ تحچين ماما ؟؟؟؟ اگوللها بكل صلافة اسمع صوته اريد افوت وثنينهن مانعاتني لو من رحتلهم وجوههم گلهم تگلبت صدك تحچين ذولي اكعد وياهم ؟؟؟؟؟ گلبهم على گلب ابنهم بعز غلطه ما انطوا بي ترديني اگابلهم واگعد يمهم والله لو اعرف اگعد يم عدوي وما اگعد يمهم ..

:- لچ والله اعرف يا امي بس عيب خطار ببيتنا هم

:- اي خطار عليچ انتِ گعدي وياهم واذا سألوچ علية گوليلهم بهذي العبارة ما تگعد يم منافقين خوش؟؟؟

:- انوب تريد تخزينا وما تدري شلون

:- شو ما تخزوا من سواية ابنهم وبكل صلافة جايين واني ادري كلش زين من يجون حيبرروله؟؟؟؟؟ اني شكو دا استحي منهم؟؟؟ اخش بعيونهم وانغزها همين اللي ما استحى مني ما استحي منه

صفگت ايد يأيد محتارة وطلعت برة ادري بيها استحت ترفض استقبالهم وبنفس الوقت عاذرتني متريد تجبرني على شي ما اريده ..