كمّال الآيّار

الحَلقة الثالث والاربعون

#كمال الايار
#رُسُل الكاتب

رفعت عيوني عليه باوعتله بحقارة ودرت وجهي منه
بقى گاعد ثواني وفجر القنبلة بوجهي مثل عادته
وراح

:- راح نطلع لتركيا ما نبقى بالعراق بعد.

:- دتشاقى؟

:- لا صدگ

:- وكليتي ؟

:- اشوفلچ طريقة اجيبج للعراق بس على گد ما تمتحنين وترجعين

:- كمال هاي اسمها سخافة والله مو كل يوم ساحل بية من مكان لمكان ترة بشر اني

:- وشمسويلچ قابل مخليچ بحديقة حواوين

خزرته ودرت وجهي عنه ..

مرت فترة هو يلح بهاي السالفة واني منطيته اذن الطرشة لحد ما يوم زهگت وقررت انهي كل شي وياه
اني مدگدر اتقبل لا عيشتي ولا وجودي يمه
انتظرته لحد ميجي وهو صارله يومين يجي هلكان من التعب ونص الليل يلا يفوت للبيت
بقيت انتظر لحد ما صارت ساعة ثنعش وشوية
سمعت صوت الباب انفتح
ثواني ودخل للصالة باوعلي بتعب واجة ديصعد
صحت استوقفه
:- كمال

اندارلي بتعب :- گولي

:- اريد احچي وياك بموضوع

:- ما يتأجل؟

:- لا ضروري

سحب نفس بأرهاق واجة گعد عالقنفة مقابيلي وعيونه علية حچة :- احچي

بلعت ريگي بتوتر وبديت احچي
:- كمال اني لهنا وخلص تعبت ومدا اگدر اتقبل العيشة وياك لان مشفت شي منك يستحق ابقالك عليه
وموضوع ميار اني ساكتة عنه بس لان اعرف اذا رجع انفتح هالموضوع خسارتي حتصير حتمية اهلي وادم اللي حيدخل بمشاكل الها اول ما الها اخر
ضميت اللي صار بگلبي وشلته وحدي بس حتى
ما اخسر احد ثاني
وهذا مو معناه اني راضية وخلص هاهيَ
مستحيل اني داعيش اقسى ايام حياتي وياك
كل شي اخاف منه عيشتنياه
والله اليعلم بقائي وياك شنو حيجيبلي بعد
لهنا واگدر اگول الك احنا انتهينا
واللي ما گدرت اسويه قبل
صار وكته هسة
ولازم اسويه
كل اللي شفته منك محفور بية
ومثل مدخلت لحياتي بالطيب
تطلع منها بالطيب وننهي كل شي!.

طول ما اني احچي ممخلية عيوني بعينه
لحد ما كملت يلا وجهت نظري اله
يباوعلي بنظرات خاوية تعبانة التمست بيهم شي من الندم او قبيله بس ما اجزم

كمال :- يعني شنو

:- يعني هايهيَ

گام من مكانه :- الظاهر نعسانة مثلي روحي نامي تروح هاي الخرابيط منچ

:- كمال مدخربط اني دا احچي جد

:- ايار تتوقعين اني اتركچ؟

صفنت بوجهه ثواني ورجع حچة :- مستحيل مثل ما انتِ عارفة الاجابة وسكتي وتعرفين كلش زين مستحيل
الكلام اللي سمعته راح اعتبر نفسي ما سمعته
وانتِ اتصرفي على هالاساس