كمّال الآيّار

الحَلقة واحد وعشرون

#كمال الايار
#رُسُل الكاتب

شوية وصارت هوسة برة طلعوا خالة والبقية يركضون واحنا وراهم اباوع عمام كمال وسراج وخواله واگفين كلهم واكو ناس ما اعرفهم بس اللي لفت انتباهي واحد واگف يم كمال وكمال حاط ايديه على چتفه وبيده جنطة ملابس باوع عالكل وحچة :- غيث من اليوم راح يعيش هنا

بقيت اباوع مصدومة منو هذا وليش حتى يعيش هنا واللي زاد الوضع سوء خوال كمال اللي گبوا بوجهه ويصيحون واحد منهم حچة بصياح :- رجال غريب تفوته لبيتكم وتگعده بين امك واختك ونسوانكم تخبلت انتَ

جاوبه كمال بنبرة هادئة عكس النيران المشتعلة :- هذا الرجال الغريب اخوية

رجع ردله :- وان يكن اخوك شتعرفون عنه كل شوفاتكم اله مرتين تلاثة هسة صار اخوكم

كمال:- صار ماصار ترضى ما ترضى هو اخونا وغصبا ما على راسنا يعيش ويانا ونحطه بعيوننا لان مثل ما النا اله اذا انتَ متعود تاكل حق اخوتك فا اسمحلي اني لو على گطع رگبتي ما اسويها

هو حچة هيچ لو خاله تخبل كلامهم مبهم وبي الغاز وشفرات بس هم يفهموها بس الصدمني من هذا كله شلون اخوهم اني من سألته گال اخ واخت عندي هذا منين اجة ماكو غير بس انُ يكون من غير ام ..

ورة صراعات هواي تدخلوا بيها عمامه وگالولهم البيت بيت اخونا وذولي ولده واحنا عمامهم نحلها بيناتنا وانلصموا اكثر لمن خالة گالتلتهم بيت ابو ما الي اي حق امنعه انُ يعيش ببيت ابو ..

انسدت السالفة وخواله طلعوا من البيت وبقوا عمامه دخلوا للاستقبال كلهم حتى مودة بس اني افتر برة استحي افوت بس بعدين گلت لا عبالهم هسة بية توحد وعازلة روحي دخلت للاستقبال باوعت كمال گاعد بصف اخو ومن جهته الثانية گاعد عمه واكو مكان احد يكعد بي بس استحي اكعد يم عمه من شافني شاور اخو شوية واخو گام گعد بينه وبين عمه واشرلي اجي اكعد يمه من الجهة الثانية ..

گعدت يمه وهم يحچون بالسالفة وانسدت كلها اخر شي عمهم حب يلطف الجو گال للولد :- يلا عمي هم ايدك واستقر حتى نلگالك مرة نريد نفرح بيك

هو ابتسم بس وحسيته مماخذ عالجو بعده او مستحي منهم وحقه يعني بين ليلة وثناها يجي لعائلة ويگولوله هاي اختك وهاي اخوانك وعيش وياهم وهو اي شي ما يعرف عنهم ..

المغرب جوي ديطلعون بس ما خلوهم چلبوا بيهم عالعشة گمنا للمطبخ نحضر اشياء خفيفة لان هم وصوا من المطعم شوية وجابوا مشاوي ومندي صواني حضرناهم وسوينا مقبلات نقلوا كله للصالة وراحوا كلهم للصالة بقيت اني بالمطبخ وياية مودة دنطلع قواطي بالصواني حتى نوديهم للصالة كملناهم ورحنا جيت دا انزل اوزع بس كمال اشر لسراج وغيث گاموا اخذوا الصواني من عندنا و وزعوها عالسفرة وگعدنا ناكل ..

ورة العشا وكفنا اني ومودة ورُبى بالمطبخ نلم بي من الهوسة راحوا عمامهم واحنا بعدنا ممكملين لان صار الشغل لكل البيت حدود الساعة عشرة ونص يلا كملنا و وگعنا على صفحة من التعب كل وحدة بينا راحت لغرفتها اول ما صعدت لگيته متمدد عالسرير وبيده اللابتوب رفع راسه وهو مضيق عيونه :- چنتِ طالعة عمالة گلبي