كمّال الآيّار

الحَلقة العاشرة

#كمال الايار
#رُسُل الكاتب

كعدت وانتظره يحجي بقى ساكت خمس دقايق و وراها نزل نظارته وهو يباوع علية وبدا يحجي...

:- لسة ببالي من طلعت الدكتورة وگالتلي اجتك بنية والثانية مراضية تطلع مبينة عناد بوكتها ابتسمت على حچايتها وردتج صدك تطلعين عناد وتعاندين وكتج وتحققين كل احلامج تمنيتج تكونين شخصية قوية وصلبة ما تخاف من بشر ولمن طلعتِ وشلتچ بذني ايدية حسيت ملكت الدنيا والبيها وحدة على يميني والثانية على يساري ولمن امج اختارت اسمائكم صفنت على عيونج الگوة مبينة وشلون ملونة گلت هاية صدگ مثل شهر ايار ومثل الوانه الشتوية والصيفية وسميتچ ايار واختج سميناها ميار وكبرتي واني كل يوم احلامي بيجن تكبر اتذكر لمن دخلتن مدرسة اول يوم دوام اختج الله يرحمها خايفة وتبجي وانتِ حاضنتها وتسكتين بيها عبالك تكبريها بسنين فرحتي بيومها ما انطيها لبشر وبيوم اللي جيتيني ناجحات الاوائل اباوع تركضن حسيت هذا النجاح نجاح تعبي بيجن الدنيا ما وسعت فرحتي بيجن واتذكر بيوم اللي راحت اختج بي .. حچاها واختنگ بعبرته

اباوع عليه وعيوني تجري وامي ويانا تبچي سكت شوية وكمل :- بيومها انتِ مثل المضيع حاجة عزيزة تفترين منا ومنا تدورين عليها وكل شوية تجيني تگولين بابا بابا ميار ما گالت حتروح لمكان ليش راحت وما اخذتني وياها لمن گلتيها حضنتچ ودموعي تجري وانتِ عبالچ زعلتيني اباوع عليچ تحضنين بية وتبوسين بوجهي وتگولين :- بابا لا تبچي اني يمك اني احبك وما زعلانة من ميار ومن تجي العب وياها ومنتعارك .. چنتِ بالعمر صغيرة بس بالعقل تكبرين عمرج سنين وسنين ..

وبيوم اللي دخلتِ كلية چن روحي وديتها هناك اباوع عليچ وانتِ متحمسة لدوامچ من يمي افرح لفرحتچ چنت دائما اتخيلج بكل لحظاتج السعيدة بس لمن تجي ببالي اللحظة اللي انتِ بيها عروس گبل ابعدها وما افكر بيها لان تخمش گلبي هاي الفكرة ولمن اندگ بابي وصارت صدگ بهاليوم حسيت صدگ انخمش گلبي رديت الجواب من غير لا اسالج واني متاكد انتِ بعدج صغيرة بس لمن ما ملوا وظلوا يا رايحين يا راجعين حسيت اني حرام علية اظلمج وما اسالج وانتِ هاي حياتج وهذا واقعنا اذا مو اليوم باجر يجي اللي ياخذج مني وترحين وياه .. گالها وحط ايده على وجهه يضم دموعه وعبرته اللي بينت بنبرته ..

رحت اركض عليه ابوس بي من راسه وايديه و وجهه وابچي وياه بشهگة :- يولي كل شي يولي بابا والله كل شي بهذا العالم مستعدة اعوفه علمودك فدوة لوجهك بابا لتبچي تموتني دموعك .. حضنته بكل قوتي وهو يشدد علية ..

اباوع على امي منتهية وهي تباوع علينا ركضت حضنتنا وتبچي ويانا ..

بعز بچينا ودخل علينا ادم يباوع علينا والقلق مرسوم بملامحه اجة يركض :- شبيكم يمعودين شصاير ،، يابة شبيك ليش تبجي يوم ايار شصاير لا تخبلوني ..

مسح عيونه بابا ويباوع عليه گاله بعبرة :- جوي خطابة على ايار

اباوع على ادم بهت وجهه وهو عيونه علينا حچة:- صدگ تحچون ؟