كمّال الآيّار

الحَلقة الاخيرة

#كمال الايار
#رُسُل الكاتب

صحيت من شرودي وطلعت اركض من المكان
واردد بداخلي .. ماكو حب كل اللي يحبون چذابين
وهذا هم چذاب وكمال چذاب وكلها چذابة

مشيت بخطوات تايهة ما اعرف وين اروح
وشنو اسوي گلبي يوجعني والدنيا كلها بكبرها خانگتني
تايهة وتعبانة وروحي طالعة ..

توجهت لبيتي بعد ما مشيت كل هالطريق
وحدي وبدون اي سيارة ..

فتحت الاضوية وگعدت متمددة عالقنفة
مشتاقة لايما وروحي لايبة عليها
وهو مصر ميخليني اشوفها لحد هسة حارمني منها
وفوگ هذا كله الشعور اللي احس بي كل
الحياطين تاكل بروحي الوحدة فظيعة ومميتة
وتقضي عالانسان بكل تفاصيله
خلصت نفسي من وجع تفكيري بالنوم
دخلت بسباتي وية محاولاتي العقيمة بأني ما افكر ..

ثاني يوم الصبح گعدت من وكت غيرت ملابسي
وطلعت للدوام چان اكو لود قوي تعبت حيل
اكثر من ست ساعات اني على وگفة الوحدة
استأذنت منهم ورحت جبت كهوة دا اصحصح
گعدت برة شربتها واخذتني صفنة بعيدة
فززني منها صوت مدير الشعبة
وهو يعيط بصوت مليان قذارة وقبح

:- گاعدةةة هنا تتصفنييين وعايفة شغلچ؟؟؟؟؟؟؟؟ ان شاء الله ترديني اني اشتغل بمكانج بلا على شنو دا انطيج الفلوس لسواد عيونج؟؟؟؟؟؟؟

رفعت حاجبي مستنكرة
سبحان اللي خلاني اسيطر على اعصابي
:- عفوا دكتور اني من الصبح لسة دا اشتغل
و واگفة على نفس وگفتي مرتاحيت ولا دقيقة
جيت هنا دا اكعد ارتاح كم دقيقة وارجع اكمل شغلي
يعني اني ممتعاجزة ولا دا اسخت !

:- ممنووووووووووع ماكو راحة تكملين شغلج
يلا وراها ترتاحين دا انطي فلوس اني مو نوى

:- هسة هذا اللي غاثك الفلوس؟
بعدين انت مدا تتصدق علية هذا حق تعبي
لو تريد خدمة ببلاش انت؟

:- وتردييييييين جواب بوجهييييي؟؟؟؟؟؟؟
انتِ فعلا انسانة ممحترمة ومن هسة اعتبري نفسج مفصولة و وجهج ما اريد اشوفه هنا بعد

:- اساسا اني اللي محبقى دقيقة هنا
واشتغل وية انسان سخيف منحط ما عنده ذرة احترام

اعصابه جمرت وكعد يلغي ويعد ويصف
عفته ورجعت جبت جنطتي وطلعت من المستشفى
ميهمني الشغل اني ممقهورة لان طردني
اني مقهورة لان هانني وصيح علية گدام الكل
سواني هالگدني گدام العالم صح مسكتت ورديته
بس بداخلي متت من القهر ..

الطريق كله جريته مشي ودموعي تجري
وتوگف واتذكر اللي صار وارجع ابچي
وصلت ليم حديقة وفقدت طاقتي بعد ما عندي
اي قدرة اكمل دخلت بيها گعدت وروحي رايحة
تعبت من الوحدة محتاجة كتف اسند عليه راسي
يخفف عني يسمعني يمسح علية
الموقف اللي صار اليوم ما ابلعه واگف
ببلعومي ويجرح بية..