كمّال الآيّار

الحَلقة السابع والثلاثون

#كمال الايار
#رُسُل الكاتب

وكأني ساعِي البريد لا شيء مما حمَلته كان لي .

:- بعد يومين طالعين لاربيل

حجيت بدون نفس:- براحتك

:- كلنا

انداريت عليه :- مفتهمت

:- نستقر هناك

:- ودوامي؟

:- انتِ اللي ضحيتي بي حچاها ورفع حاجبه

صفنت بوجهه ثواني استوعب اللي حچاه احاول المح بوجهه ضحك او شقى بس چانت ملامحة مرسومة بكل جدية احاولت اني اهزئ الموضوع واحچي بضحكة مستهزئة

:- ههه يعني اني اضحكلك هسة لو شنو

:- اضحكي عاللي ينتظرچ

صفنت بوجهه وعلى شكله الجاد :- اذا چنت تقصد بالكلام السخرية لو الضحك فكُلش ما الها داعي واذا انتَ چنت جدي باللي دتحچي فافضل تنهي الموضوع لان مستحيل اروح وياك نهائياً

:- ليش اني گلت تجين؟

:- شنو!

:- اخذت رأيچ وگلت تجين

:- لعد شنو بالله

:- شي مفروض عليچ اساسا ما تقررين اني قررت وخلص

:- ليش ان شاء الله اني لعبة بأيدك ما عندي قرار وتحركني من ايدك هاي لايدك هاي

:- تمام عندج خيارين اختاري يا دوامج يا جيتج وياية

بلعت ريگي واحس دمي يفور لو شوية الزمه انتفه والنبي عطت بصوت شبه عالي :- انتَ من صدُگ تخبلتتتت لك شفت الموت بعيني يلا گدرت اطلع المعدل بألف يا الله يلا گدرت اوصل للي اني بي هسة وتريدني ابطل ؟؟؟ وعلمود منو ؟؟؟؟ علمودك ؟؟!!!! تسوى انتَ ابطل علمودك ؟؟؟؟؟ ينشد بيك الظهر ؟؟؟؟ احچي باوعلي گول انتَ مثال ينشد بيك الظهر ؟؟؟؟؟!!!! مو انتَ نفسك الغدرتني بالخطوبة وتممت زواجك مني حتى تضمني ؟؟؟ مو انتَ نفسك اللي بسهو مني عفتني سنين مثل الحيوانة وراك لا سألت عني ولا گلت ؟؟؟؟؟؟ مو انتَ نفسك اللي خنتني بحجة رد الجميل؟؟؟؟؟ فهمني انتَ لو مو انتَ واني دا اتبلى عليك !!!! ، اني كل يوم اموت بي الف موتة لمن اتذكر سوايتك واصبر نفسي تغيرت رغم ما اعرف كلش زين بأي فرصة اغلط بيها انتَ بالمرصاد ومتفوتها وتعديها سلام لو اطخ براسي للسما فهمني من بعد هذا كله انتَ تستحق اشد ظهري بيك ؟؟؟؟؟؟ والله لو تنجمع العرب والعجم على انُ اترك شهادتي اموتهم كلهم وما انولهم اللي يردوا جايني هسة تريدني اعوفها الك

حچيت ربع اللي بگلبي وانهاريت بالبچي صرت اشهگ بالنفس واحتار وين اروح صعبت علية نفسي اللي ساكتة ومتحملة اللي ديصير كله وهاي اني ما عندي طفل لو عندي چان سحل بية امة اللا اله الا الله ..

عفت الغرفة بكبرها وطلعت بدون ما اسمعه شنو يگول طلعت بالبلكونة حتى ذاك خوفي راح ونسيته كافي بية حرگة گلبي ..