كمّال الآيّار

الحَلقة الثامن والثلاثون

#كمال الايار
#رُسُل الكاتب

گمت من مكاني توجهت الهم وبديت اتلمس بيهم لثواني هم ما بيهم اي اشكال عبارة عن هيكل بس بي ملامح وبنفس الوقت مبهومة مو ملامح بشر واضحة وصريحة ..

رجعته لمكانه وانداريت دا ارجع صار گدامي كمال واگف وعيونه علية تباوعلي بنظرات غريبة اول مرة اشوفهم

بلعت ريگ من الرَهبة،،
الضوة طافي وبس ضوا واحد صاير عليه وعاكس صورته ونظراته المُميتة تصوب اللابس درع..

اقترب مني وعيونه بعيوني وعلى نفس نظراته وگف وايديه بجيوبه :- مصرة تنبشين

ثولتها :- ها

ابتسم ابتسامة حقيرة :- اذا نبشتي و وصلتي فحتسهلين علية هواية اشياء اولها تنزال الاقنعة

:- مدا افتهم عليك يصير توضح بدون حچي الالغاز هذا

:- ابدا ليبقى ببالج بس استمري .. حچاها وطلع برة ما ادري وين بهالوقت هذا ..

صعدت فوگ وكلامه يرن باذني حاولت اربط بي بس ما اكدر اوصل لأي شي بكل جملة حچاها حلقات مگطوعة مو حلقة وحدة

انتبهت على نفسي جسمي كله يرجف من رعب قبل شوية والله على هالقهر والخوف الا تخلص بسكر لو ضغط واحتمال حتى جلطة

بقيت افكر لحد ما غفيت واني راسي صاير بگد الطبل ..

جمانة ..

گاعدة ودا انتظر ايڤان يجيني حتى نطلع نأثث شقتنا چان تدگ علية ايار فتحت خط

:- لچ ها زمالة مدا تداومين گلت هاي ماتت واندثرت

:- يمعودة خلي احافظ على روحي اول بعدين دوامي

عقدت حواجبي باستغراب :- شكو شصاير ليش

:- گولي شنو مصاير

:- اي دحچي وفضيني عاد

:- اني مو ببغداد

:- عزةة لعد وين

:- باربيل

:- صخام بعينج شو لا حس ولا نفس غير تگولين تحچين

:- اي مو عساس هو اني اللي چنت ادري

:- شصاير ايار احچيلي

بدت تحچيلي كل شي صار وياها وختمتها بموقف التماثيل و وية كل حجاية تحجيها احس شعر راسي يوكف من الصدمة

:- ايار تحجين صدُگ لو دتتشاقين؟

:- بشرفج هي بيها مجال للشقة .. ايمااااا تعالي يلا سويتلج نمنم

:- خيرررررر خيررررر فوگ صخام وجهه كاعدة تربين بنت صديقه عساس شلون يستاهل هو

:- شعليها بي هي طفلة قابل احقر وياها من وراه

:- لا بس شمريها عليه هو خلي يحير بيها مو هو الجابها

:- دنجبي جمانة عفتي هو اساس المشكلة واجيتي عالطفلة المسكينة