كمّال الآيّار

الحَلقة السابع عشر

#كمال الايار
#رُسُل الكاتب

ضربته بخفة على صدره وحچيت :- صاير تحب سوالف الكيدراما هواية

ابتسم :- احبج انتِ اكثر

:- بس اني اجيت ببالك ؟

:- لا بعد شخص وياج

:- منو ؟

:- وحدة حلوة هواي وتشبهج هواي

:- يااه منو هاي تشبهني

:- جذب هو منو يشبه جمالچ

:- هسة مفتهمت يعني اي لو لا

:- لا يا محمد

سكتت وهو بعده يلعب بشعري وبحركة منه ضمني بحضنه بقوة لدرجة حتى صوت يطلع من عظامي ويهمس بأذني :- احبچ، احبچ هواي

بقى فترة حاضني ومحافظ على نفس القوة حچيت حتى ابعده شوية :- شنو رأيك اسويلك شي تاكله ؟

همس :- ما اريد ، اريد هاي اللحظة تدوم للابد

:- يعني شقصدك متريد اكلي مطيب ومحيعجبك

ابتعد مني مصدوم :- اني گلت هيچ؟

:- لا بس گلت ما اريد

:- ميخالف سويلي

گمت متحمسة انُ حخلي ياكُل نزلت جوا لگيتهم گاعدين شافتني خالة حچت بلهفة :- ها حبيبتي شفتي شلونه

:- زين خالة وهسة حسويله شي ياكله

:- الف الحمدلله ياربي اي يوم سويله بالكي ياكل من ايدچ .. واندارت على مودة گالتلها :- گومي مودة يوم وياها للمطبخ دليها بالغراض

دخلنا اني ومودة للمطبخ وخالة وامي صعدوا عليه يشوفوا وامي تسلم عليه ..

انداريت على مودة :- مودة عفية شنو اسويله اكل ميأذيه

:- والله هو اكل ميگدر ياكل فشنو رأيج بالشوربة احسن اله وهم تفيده ومو ثگيلة

:- اسويله شوفان؟

:- اي يحب الشوفان هو

:- لعد بلا زحمة عليچ عُمري طلعيلياه واذا اكو صدر دجاج هم طلعيلي

:- اي هسة حب حطلعهم الچ ..

بدت تحضرلي المواد واني اسوي بيها سلگت الدجاج واخذت المي مالته سويت عليه الشوفان والصدر قطعته ناعم وحطيته وية الشوربة وحطيتله ماجي همين حتى انكهها اله كملت وصحت لمودة تجرب طعمها :- هاا شلونها ؟

:- عاشت ايدچ حيل طيبة

:- يعني حيحبها؟

ضحكت:- لج اي يحبها شبيج مرتبكة

ابتسمت وصبيتها اله بكاسة وخاشوگة وصعدتها فوگ ابتسملي بتعب ورحت يمه حطيتها بحضنه وبدا ياكل وخالة تبسمرله :- لك عيني صاير اكلنا ميعجب احنا