පහුවෙනිදා උදේ ධනුර්ව නැගිටලා වොෂ් දාලා කාමරෙන් එලියට යද්දි දැක්කේ ඕපන් ඒරියා එකට වෙලා පොත ලියන ගමන් හිටපු තෙධාෂව. මූණේ ඇඳිලා තිබුණ හිනාව එක්ක පහලට නැවිලා තිබුණ දිග ඇහිපිය තෙධාෂ දිහා පැය ගාණක් වුණත් බලන් ඉන්න පුලුවන් තත්වයක් ධනුර්වට උදා කරලා දීලා තිබුණා. එහෙම බලන් ඉද්දි කලින් දවසේ බදා ගත්තු එක, ඔලුවට දුන්න කිස් එක, ඒ හැමදෙයක් ම ධනුර්වට ආයෙම ආයෙම මතක් වුණා. ඒත් එක්කම ධනුර්වට මතක් වුණේ කලින් දවසක ධනුර්වගේ ගෙදර අය ඇවිල්ලා ආපහු යද්දි අප්පච්චි තෙධාෂට කියලා ගියපු එක.
'තමුන් මෙහේ ඉඳන් නාඩගමක් නටලා තිබුණොත් තමුසේ ආයේම නුවර එන්න බලාගෙන හිටියොත් හොඳයි!!! තමුන් මෙහෙ මොන හොඳ රස්සාව කලත් අදාල නෑ මට!!'
ධනුර්වට ඒ ටික හොඳටම ඇහෙන තැනක එයා හිටියත් අප්පච්චිවත් ,තෙධාෂවත් , වෙන කිසිම කෙනෙක්වත් ධනුර්ව ව දැක්කේ නැහැ එයා බිත්තියට මුවා වෙලා හිටපු නිසා. ධනුර්වගේ පවුලේ අයට ඒ තර්ජනය ඇහුණේ නැහැ එයාලා වෙන තැනක හිටපු නිසා. ඒ නිසා තෙධාෂත් විශ්වාස කරලා හිතුවා ධනුර්වටත් මේක ඇහෙන්න නැතුව ඇති කියලා. තෙධාෂගේ අම්මාටවත් අයියලටවත් අප්පච්චිව නවත්තන්න හැකියාවක් නැතුව සද්ද නැතුව අසරණව ඉද්දි ධනුර්වට තමන්ගෙම පවුල ඉබේටම මතක් වුණා. කොහොමහරි තාත්තගෙන් තමන්ව තෙධාෂ පරිස්සම් කරන්න හේතුවත් මේකම වෙන්න ඇති කියලා ධනුර්ව හිතද්දි ධනුර්වට ගෙදර අය කතා කරනවා ඇහිලා ධනුර්ව දැන් ආවේ වගේ දුවගෙන ආවා.
ඒ විදිහට තෙධාෂගේ අප්පච්චි කියපු දේවල් ආයෙම මතක් කරද්දි පොත ලිය ලිය හිටපු තෙධාෂ එයා දිහා කන්න වගේ බලන් ඉන්න ධනුර්වගේ ඇස් දෙක දිහා ඔලුව උස්සලා කෙලින් බැලුවා.
'මූ ළඟදී ඉඳන් ඇස් දිහා කෙලින් බලන්නේ මොකද?? වෙනදට නං ඇස් පිල්ලම් වේගෙන් ගහලා අහක බලනවනේ!'
තෙධාෂ ධනුර්ව දිහා බලලා ඔලුවෙන් 'ඇයි?' කියලා ඇහුවම ධනුර්ව මුකුත් නැහැ කියන්න ඔලුව දෙපැත්තට වැනුවා. ධනුර්ව තෙධාෂට හිනා වෙලා පහලට ගියේ ලොකු අක්කව හම්බවෙන්න කියලා හිතාගෙන. දොරට තට්ටු කරපු ගමන්ම ලොකු අක්කා කාමරේ ඇතුලට එන්න කියලා ධනුර්වට අඬ ගහපු නිසා ධනුර්ව දොර ඇරගෙන කාමරේ ඇතුලට ගිහින් අක්කගේ ඇඳ උඩින් වාඩි වුණා. ලොකු අක්කත් නාලා කොණ්ඩේ පිහිදාන ගමන් හිටපු ටවල් එක එල්ලලා ධනුර්වගේ එහා පැත්තෙන් ඉඳගත්තා. ලොකු අක්කගේ ඉන ගාවට දිග ලස්සන කොණ්ඩේ ධනුර්ව කවදත් ආස කරපු එකක්. ලොකු අක්කා හිනා වෙද්දි හරිම ලස්සනයි. මහ ලොකු සුදුවක් නොතිබ්බට ඕනම කෙනෙක් දෙපාරක් තුන්පාරක් වුණත් හැරිලා බලන ලස්සනක් අක්කට තිබුණා.
YOU ARE READING
කටුපිටපත| KATUPITAPATHA
Romanceමේ යනු..නුවර වැස්සේ තෙමුණු, කොළඹ පහන් එළි වලින් නැහැවුණු, පොත් සුවඳ අතරින් ගලා හැලෙන ඔවුන්ගේ ආදරයයි.... Started: 11/03/2024 කිසිම පාසලක් හෝ සත්ය සිදුවීමක් පාදක කොට නැති බව කරුණාවෙන් සලකන්න