The Heiress and the Hoodlum

Videoke

sa lahat po ng mga naapektuhan at dinaanan ng nangyaring pagsabog ng Bulkang Taal, ang chapter pong ito ay isang munting handog. sana po kahit papaano makaaliw sa inyo ang pagbabasa ng chapter na ito. stay safe, everyone. love lots and God bless you all.

.

Chapter Seven

"ALAM ko na." Napapitik ng daliri si Andeng na parang biglang na-excite sa ideyang naisip nito.

Nagtataka namang napatingin dito sina Marcy at Chantal, hinihintay na sabihin ng babae ang ideyang pumasok sa isip nito.

"Mag-videoke tayo para mahasa ang dila mo."

"Videoke?" parang bigla namang na-excite si Marcy sa suggestion ni Andeng. "Sige, sige. Bet ko 'yan."

"Hindi para sa'yo, para sa kanya," pambabasag ni Andeng sa excitement na biglang naramdaman ni Marcy.

"Ang bait mo naman talaga sa akin. Sana kunin ka na ni Lord."

"Inuuna raw ni Lord 'yong mas mababait," nakangising sagot dito ni Andeng. Pagkuwa'y binalingan si Chantal. "Ano, Chan-chan? Videoke tayo?"

"Videoke? You mean, like Karaoke?"

"Tsk. Videoke nga kasi hindi karaoke. 'Yong kakanta ka habang nagbabasa ng lyrics sa tv."

Napahalakhak si Marcy.

"'Anyare sa'yo, teh? Nakasagap ka ng masamang hangin?"

"Malamang. Kasi kanina ka pa dakdak nang dakdak, biglang nagkaroon ng imburnal flavor ang oxygen na nalalanghap namin."

Napabuga ito ng hininga sa bibig, pagkuwa'y sininghot-singhot iyon. "Hindi, 'no? Amoy-Surf kaya."

"Surf ang brand ng gamit mong toothpaste?"

"Oo. Kaya nga isa-suggest kong gano'n na rin ang gamitin mo para umayos ang tabas ng dila mo."

"Hindi ko kailangan 'yon dahil maayos ang tabas ng dila ko. At para na rin sa kaalaman mo, karaoke ang tawag nila sa mga kilalang bar na may mga private rooms kung saan kayo puwedeng kumanta kasama ng mga kaibigan mo. 'Yon ang alam niyang videoke."

"Mga sosyalin naman kasi ang alam niyang kaibigan mo. Pero maalala ko lang, magkaibigan ba talaga kayo? Ang tingin ko kasi sa inyong dalawa, mag-amo. At obvious na obvious naman kung sino sa inyo ang amo."

"Amo? Hindi, ah. Hindi kami mag-amo, we're friends, right? We're very, very good friends."

"Yes, we're friends," nakangiting sang-ayon ni Chantal.

"Para ko na kasi siyang bunsong kapatid kaya ganon na lang ang pag-aalaga ko sa kanya," dahilan pa ni Marcy.

"Ah," tumango-tango si Andeng habang palipat-lipat ang tingin sa kanilang dalawa.

Mukhang duda pa rin ito.

"O, simulan na para makarami," ani Marcy.

"Sige. Sandali at kukunin ko lang ang aking Magic Sing," tumalikod na si Andeng para kunin ang gamit na kakailanganin nila sa silid nito.

"You missed going to karaoke," aniya kay Marcy.

"Alam mo, tatak na ng pagiging isang purong Pinoy ang pagkahilig sa videoke. At tama si Andeng, para matuwid 'yang baluktot mong dila bumirit ka ng mga kanta ng Aegis at ni Regine Velasquez."

"Bakultot?"

"Baa-look-thought."

"Baloktowt?"

"Yown, nakana mo, batang-bata."

"What's baloktowt?"

"It's curved, bent--in short, not straight."