The Heiress and the Hoodlum

Sa Ilalim ng Buwan

Chapter Twenty-Nine

"HUWAG niyo ng masyadong painumin 'yang si Jethro. Kita niyo, o, pulang-pula na ang mukha," ani May Azon habang magkakasalo silang naghahapunan sa baybayin.

Simple lang ang ulam nila kumpara noong pananghalian ngunit maganang kumain ang lahat. Masaya ang kuwentuhan at biruan. Ang mga kabataan ay nangaka-paikot sa bonfire habang kumakain, hindi nakikisalo sa usapan ng matatanda.

"Ganyan talaga ang mestizo, 'Ma," ani Pay Abel sa asawa. "Kaya pa 'yan, di ba, 'Noy?"

"Parang umiikot na nga yata ang paningin ko, Pay," tugon naman ni Jethro na bahagya pang sumandal sa katabing nobya. Pero ang totoo ay ayaw na talaga niyang uminom. Tuba kasi ang tinitira ng mga ito, hindi niya masyadong gusto ang lasa.

"Huu, nagdadahilan ka lang yata, eh," kantiyaw ng isa nilang pinsan.

"Sosyal na kasi ang panlasa niyang si pinsan," ani Manoy Dison. "Hindi na sanay sa tuba."

Nagkatawanan ang mga ito.

"Hindi naman sa gano'n, Manoy. Nakakapanibago lang. Matagal-tagal na rin muna nang huling masayaran ng tuba ang lalamunan ko."

Kung saan-saan pa nadako ang magaang na kuwentuhan. At naisip ni Jethro, ilang taon man ang lumipas hindi nagkaroon ng pagbabago ang magandang pagtanggap ng pamilya sa kanya. Minalas man siya sa totoong pamilya na dapat ay kumupkop sa kanya, masuwerte naman siya sa angkan ng napangasawa ng Tiyo Narding niya.

"Siyanga pala, Boogie. Sasama ka ba mamaya?" untag ng isang pinsan sa lalaki.

"Oo naman, 'tol. Baka ito na ang pagkakataon ko para magka-lablayp."

"Malamang. Sa galing mong mag-gitara, baka mapa-oo nang wala sa oras si Agnes."

"Manghaharana kayo?" tanong niya sa mga ito.

"Oo. Pagkakataon ko na 'to, Jet, para magka-lablayp."

"Ay, marumduman ko, nabanggit na rin lang ang paghaharana. Nagpasabi palan si Pading Igme na kung puwede ilusyonan ining satuyang mga bisitang daraga," ani May Azon.

Nabulunan si Pay Abel sa sinabi ng maybahay nito. Nagtawanan ang mga kasalo nila, lalo na ang mga anak ng tiyuhin.

"Sino ba 'yon?" tanong ni Jethro sa katabing si Manoy Dison.

"Dating kapitan dito," tugon ng pinsan. "At sino naman ang balak niyang akyatin ng ligaw?"

Ang tanong ay idinirekta ng lalaki sa ina.

"Sinu-sino ba ang bisita nating dalaga?" sagot naman ng ginang.

Napatingin ang lahat sa magkatabing sina Andeng at Marcy.

"Sina Andeng at Marcy?" 

"Oo. Alangan namang si Chantal?" may panunudyong ngumiti si May Azon.

Mahigpit namang iniyapos ni Jethro ang isang braso sa beywang ni Chantal. Basa pa ito dahil hindi pa natatagalang umahon sa dagat ang kasintahan nang tawagin niya ito para kumain ng hapunan. Kaagad niya itong binalot ng sarong dahil puti ang kamisetang suot nito, bakat ang bra at katawan. Kahit gusto niyang sitahin iyon ay hindi na lamang niya ginawa. Ang importante'y hindi nito isinuot ang two piece na binili nito noong mamili sila. At iyon ang kabilin-bilinan niya kina Marcy at Andeng nang ipasundo ito sa kubo. Aniya ay magwawala siya kapag nakita itong naka-swimsuit na kaparis ng dalawa. Mabuti naman at sinunod ng mga ito ang bilin niya.

"Hindi na 'to puwedeng ligawan, May. Akin na 'to."

"Kaya nga, di ba?"

"Ilang taon naman 'yon si Kap? Baka uugod-ugod na?" aniya pa.