The Heiress and the Hoodlum

Alapaap

Chapter Thirty-Four

KAYSA bumalik pa sa tabing-dagat ay dumaan na lang sina Jethro at Chantal sa malaking bahay. Nang kawayan si Jethro ng mga pinsan para tumagay ay nagtatanong ang tingin na nilingon ni Jethro ang kasintahan na tila humihingi ng permiso. Nakangiting tumango naman si Chantal. Wala rin naman silang mapupuntahan dahil may nagaganap na pribadong bagay malapit sa kubo. Nakipaghuntahan na rin ang dalaga sa mga naroroong kababaihan kasama si May Azon. 

Wala roon si Andeng at ayon sa tiyahin ay kasama na raw ito nina Manoy Dison at Marcy na lumipat sa kubo. Si Boogie naman ay kasama na naman sa kung saang harana. Napagtagni-tagni ni Chantal na kaya marahil sa labas gumawa ng milagro sina Marcy at Dison ay dahil nasa loob ng kubo si Andeng at malamang na gising pa. May kanipisan pa naman ang mga dingding, ang sahig lang ang concrete. Kung may gagawin ang mga ito sa loob ay tiyak na maririnig ni Andeng ang lahat. Ang lakas pa naman ng radar ng babae.

Mayamaya lamang ay nakita nila ang paparating na si Manoy Dison. Hindi niya ito magawang tingnan kaya nilingon niya ang kasintahan. Poker face si Jethro.

"Tagay, Manoy," anito.

"Saro lang. Papalaot ako mamayang madaling-araw."

"Ah, kaya pala meron kang baon."

"Baon?" tila nako-conscious itong nagpunas ng bibig.

"Kape. Narinig ko si May Azon na nag-utos magpalaga ng kape. Pambaon mo pala mamaya," kaswal na kaswal lamang ang pagkakasabi ni Jethro.

Namumula ang mukhang inabot ng lalaki ang basong may tagay na alak atsaka ininom.

Si Chantal ay napayuko na lamang at kunwari'y nag-check ng message sa cellphone para maikubli ang ngiti sa mga labi. Loko-loko talaga itong nobyo niya. Sa kanya naman ay balewala lang iyon. Pero naisip niya ang eskandalo kina Marcy at Dison kung nagkataong may ibang taong nakakita sa mga ito. Probinsya ang lugar na iyon at sinauna ang isip ng mga tao.

"Baka gusto mong sumama?" sabi nito kay Jet.

"Huwag na. Baka butanding ang mahuli natin."

Nagkatawanan ang mga ito sa tila isang joke na sila-sila lamang ang nakakaalam.

"Alam mo ba Chan-chan na 'yang si Jet ay may balat sa puwet?" tila lasing na pagbibida ni Pay Abel.

"Ibig niyang sabihin ay birthmark," paliwanag sa kanya ng nobyo.

"Birthmark in your butt?" hindi siya sigurado kung meron. Pero nunal ay alam niyang meron, malapit sa ulo ni Womb Raider.

"Kasabihan na kasi 'yon ng matatanda na kapag may balat sa puwet, malas sa mga lakad," natatawang paliwanag ni May Azon.

"Wala naman talagang balat 'yan sa puwet, nunal sa pisot igwa," 'ika ni Manoy Dison.

Naghalakhakan na naman ang mga ito.

"Ay iyo palan, ano?" ani Pay Abel.

Dahil nag-switch na sa dialect ng mga ito ang kanyang mga kausap, napapatanga na lang si Chantal. Nangingiti kahit walang masyadong naiintindihan. Tinakpan ni Jethro ang kanyang tenga habang iling nang iling ito sa mga kausap. May sinasabi kasi si Pay Abel na tila ayaw iparinig sa kanya ng nobyo. At nahulaan niyang kuwento iyon ng kabataan ni Jethro. Sa huli ay sinabi ni Manoy Dison na magkakasabay tinulian ang mga ito ng namayapang abuelo. Kaya sila-silang magpipinsan ay alam diumano ang pagkakaroon ng nunal ni Jethro sa pribadong parte ng katawan nito.

Pulang-pula ang mukha ni Jethro habang nagkakatudyuhan. Masaya talaga ang mga ganoong pagtitipon sa isang pamilya kahit maraming asaran.

Nang lumalalim na ang gabi ay kusa ng itinaboy ni May Azon ang mga pamangkin at mga anak na magsitulog. Sila ni Jethro ay nagpaalam na rin. Akbay-akbay siya ng nobyo habang naglalakad. Banayad pa itong humihimig ng kinanta kanina at manaka-nakang hinahagkan ang ibabaw ng kanyang ulo. Pagkatapos ay banayad siyang pinaikot nito at isinayaw. Napahalakhak siya. Kaya malakas ang loob nitong gawin iyon ay dahil wala ng tao sa paligid. They can dance like two fools in love and without a care in the world.