Your Majesty is annoying (Myanmar Translation)

အပိုင်း (၅၆)

{Unicode}

"သူတို့ပြောတာက အရမ်းလုပ်လွန်းရင်လဲ ကလေးရဖို့ မလွယ်ဘူးတဲ့"

လိုင်လ် ဒေါသတကြီး အစွယ်သွေးနေလိုက်သည်။ ဒီစကားမျိုး ဘုရင်မနားထဲ ရောက်အောင် ပို့တဲ့သူကိုသာ မိကြည့် အရှင်မထားဘူးဟု ကျိန်းဝါးနေလေသည်။

သူ သူမကို သွေးဆောင်ဖြားယောင်းတာတောင် မယ်ဒီရာက သူမဆံပင်မွှေးတပင်ကိုတောင်မှ သူ့ကို ထိခွင့်မပေးချေ။ ဒေါသထွက် စိတ်တိုရလွန်းလို့ လိုင်လ့် အတွင်းကလီစာတွေတောင် ပြာကျမတတ်ပင်။

လိုင်လ် သမားတော်တစ်ယောက် ခေါ်ပြီး ဖြေရှင်းဖို့ ကြိုးစားတဲ့အခါကျ မယ်ဒီရာက နောက်ဆင်ခြေတမျိုး ပေးပြန်သည်။

"ပြီးခဲ့တဲ့တခေါက် အတူနေတာကနေ ကလေးရတာမျိုး ဖြစ်နိုင်လို့ ကျွန်မ ပိုဆင်ခြင်ရမယ်"

ကိုယ်ဝန်စရှိကာစ ပထမပတ်များတွင် ကိုယ်လက်မနှီးနှောသင့်တာက အမှန်မို့ သမားတော်က မှန်ကန်ကြောင်း ခေါင်းညိတ်ထောက်ခံတဲ့အခါမှာတော့ လိုင်လ့်ရဲ့ ကြောက်စရာ့အကြည့်နဲ့ ပက်ပင်းတိုးသွားရ၏။

"မယ်ဒီရာရော ကိုယ်တော်ပါ ငယ်ရွယ်ပြီး ကျန်းမာပေမဲ့ အခုထိ ကလေးမရသေးဘူး၊ အုံးစက်ရာနွှဲပွဲနေ့တွေက သိပ်မများလို့များ ဖြစ်နေမလား? မင်းပြောစမ်း၊ ကိုယ်တော်တို့ ရက်တွေ ထပ်တိုးသင့်မလား?"

လိုင်လ်က သမားတော်ကို တက်ကြွတဲ့အကြည့်နဲ့ ဖိအားပေးလိုက်တဲ့နောက် သမားတော်က ချွေးသံတရွှဲရွှဲနဲ့ ခေါင်းညိတ် ထောက်ခံလိုက်သည်။

"အင်း.. ကျွန်တော်မျိုး အဲ့လို ထင်ပါတယ် ဘုရား.. အရှင် မှန်ပါတယ်"

အမှန်ကတော့ အုံးစက်ရာနွှဲပွဲ ပထမနေ့ သတ်မှတ်ပြီးတဲ့အခါ၌ သမားတော်က သုံးရက်ဆက်တိုက် ရက်သတ်မှတ်ပေးချင်ခဲ့သည်။ မယ်ဒီရာ့ရဲ့ ရာသီစက်ဝန်းအရ ကိုယ်ဝန်ရနိုင်ခြေများဖို့ သုံးရက်ဆက်တိုက် အတူနေဖို့ တိုက်တွန်းလိုခဲ့ခြင်းဖြစ်သည်။

မယ်ဒီရာက အရင်ဘဝမှာကတည်းက လိင်ပညာပေးအတန်းမှာ မျိုးဥကြွေမကြွေတွက်နည်းကို သင်ယူခဲ့ရပြီးလေပြီ။