وسعت ورد عينها تشوف سحر الي ابعدت تلف احد خصل شعرها : رغم ان سطام قال لي ابعدي عنها بس انا اشوفك تستولي عليه شوي شوي و سحب علي و انا حبي
قاطعتها ورد تسحب شعرها وهي ترص على اسنانها بغضب : تستهبلين صح؟
شدت شعرها اكثر تصرخ بعصبيه : يا مريضة طفل وش دخله بمشاكلكم انا و سكت بس توصل يدك لطفلي؟ اقلتك ولله اقلتك يا سحر اقتلك
صرخت سحر بألم وهي تمسك يد ورد الي بشعرها : اتركيني يا غبيه
قربتها ورد من الجدار تضرب راسها : لا تظنين اني ميته على حبيبك هذا الي ما عنده ما عند جدتي ، كلكم تافهين و اسبابكم تافهه مثلكم كان انتِ ولا حبيبك ، اسمعيني زين واذا ماسمعتي عادي نضرب راسك شوي بالجدار انا مو بنت طلال على الفاضي تربيت بوسط بيته ولي من صفاته لا تظنين اني اللطيفة المسكينه لا حبيبتي انا ممكن اكون نهايتك تسمعين؟
بكت سحر و صرخت ورد تردد : تسمعيـن !
هزت سحر راسها بإيه و اخذت ورد نفس بهدوء و ما تركتها : و الحين بسألك و تردين ولو شكيت انك كذبتي اقتلك سحر ولله
هزت سحر راسها بإيه بخوف وهي انظارها للجدار و همست ورد بهدوء قشعر جسد سحر : حاولتي تقتلين بنتي؟
نفت سحر بتوتر : لا ولله لا ، فكرت بس ما سويتها
ابتسمت ورد تهز راسها بإيه : جبانه اكيد ما تسويها
ضربتها بقوه بالجدار وهي تناظر جبين سحر الي نزف : هذا عشان فكرتي بس
و لفت لها اتجاه الباب تدفعها وهي تنفض يدها : اطلعي ولا اشوف وجهك هنا
من خرجت سحر تسكر الباب هي ابتسمت : انتِ بخير؟
لفت انظارها للباب و هي تفكر تهرب بس ما تقدر حاولت مره و من وصلت للباب شافت الحراس الثلاثه حول البيت يدورون و رجعت غرفتها بدون مشاكل
_
~بيت مسعود~
عدلت مكياجها وهي تتخذ شنطتها تهمس : اليوم موعدنا أدهم
خرجت و شافت منال تناظرها بأستغراب : على وين؟
العنود : عند صديقتي طلبتني اجيها افطر عندها
و اشرت منال على وجهّا : و حاطه ذا كله؟ ماعندك نفسية الصايم؟
نفت العنود وهي تتوجه ناحية الباب تأشر لها بـ مع السلامة تخرج نيتها بيت أدهم
_
~بيت سطام~
كان واقف وعينه تراقب البيت و رد على جواله : نعم
رماح : ابوي وينك فيه؟ كلمت شاهين يقول ماجيت المركز
هز راسه بإيه وهو يراقب البيت : مشغول ، تبي شي؟
هز رماح راسه بإيه : عمك براء ولع بيته
وسع عينه بذهول وهو يتنحنح : شلون !
رماح : ولله رجع يقول حصلت البيت كله مولع و اهلي بسيارة يزن ، طلع كفو ودخل ساعدهم و ساعد جمان تدري رجلها مكسوره
عدل جلسته بتركيز : وش صار عليهم الحين؟
رماح : ببيت ابوي عاد ابوي يافرحته الحين عندهم بالبيت ، يكلمني براء يقول ابوي مابقى شي ما سواه من هدايا و ضحك و ابتسامات يحبهم
لف انظاره للبيت من شاف سطام يطلع وهو يلبس نظارته الشمسيه : اكلمك بعدين ابوي مشغول الحين
رماح : زين استودعتك الله
_
~بيت آل بدر~
كانت تشوف فرحت جدها بس داخله كسر بسبب اختفاء ورد هو يتصنع سعادته بهاللحظة لانه يبي يكون سعيد بس مو قادر و الفتره ذي جدًا صعبه عليه و على ماهر الي من اختفاء ورد دخل المستشفى بسبب ارتفاع ضغطه المرعب
ابتسم قاسم : جوجو
رفعت انظارها له بأبتسامه: هلا
وقف على حيله و نفت : لا ولله خليك انا اجيك
نفى يمشي بعكازه ناحيتها و يجلس بجنبها : خفتي؟
ابتسمت تنفي : لا لأن دريت اكيد ربي بينجيني
تشتت ابتسامتها من نظراته لها و رجف داخلها من دخل يزن عاقد حاجبه و من شافهم وسع عينه يصد : جدي !
وقف قاسم يتوجه لـ يزن : سمّ يا يزن
مازال صاد وهو يشد على يده : ابي ارجع البيت ولله تعبت
نفى قاسم : خلك هنا اهتم فيك انا
عقد حاجبه يلف بأستغراب : وليه انت تهتم فين
قاطعه قاسم بذهول يضرب رجله بالعكاز : ورع !
صد وهو مذهول : ولله بالغلط
كتمت ضحكتها وهي تشتت نظرها و كمّل يزن : يعني انا عندي امي تهتم فيني بس ترا مايحتاج يعني حرق و انا دكتور اعرف لـ نفسي لا تشيل هم
نفى قاسم بعناد : إلا اشيل هم اجلس هنا اتطمن عليك
ابتسم يزن وهو يخرج : ابشر ما اقول لا
عقد قاسم حاجبه بأستغراب : توك تقول ما تبي
يزن : كنسلت خلاص ابي مافيني ارجع
_
~البيت القديم~
