#قزح_107.....بارت٥٢
بقلمي: زهراء السلامي
لتنسون التصويت + التعليق بين الفقرات + متابعة لحسابي 🤍.
شما يحجون عن العينهم حلوه تجي ابالي
و اضحك من يذكرونك
اكو الحلوة
و اكو الاحلى
و اكو عيونك ♥️.
❥__________ ❥
-شلونچ إيڤ
ابتعدت عنه بسرعه وضرب ظهري بالسنك، ابتسم من شاف وضعي المخربط وكال بضحكة..
-مشتاقين جميلتي
-قطرس شجابك هنا
1
-هذا بيت جدي على ما اظن
سكتت واللتهيت انزل ببجامتي المرفوعة لفخاذي ونزلت شعري اللافته كبة ورتبت من وضعي نوعاً ما..
-تدرين شكد مشتاقلج ميت على شوفتج
-بيبي مو هنا
-ها صدك
ركز بوجهي من حچاهه توترت ماعرف ليش يمكن لان صارلي هواي مشايفته واخر لقاء بيناتنه چان عنيف..
-شبي وجهج؟
رفع حنچي بأصابعه وسحبت وجهي فوراً عنه، كرر السؤال وهو يأشر على حنچي وخدودي..
-ليش المكان ازرك؟
-هيج.. قطرس اكعد هنا اضيفك شي
صعدت الشال القطني الي لافته على رقبتي على حنچي وانطيته ظهري اشتغل اعصرله برتقال اعرفه يحب عصير البرتقال طازج..
-إيڤ شو باعيلي
-اكعد هسة اجيك
كعد الكرسي وراية مباشرة كملت العصر وحطيته بكلاص ورحت للفرن اطلع الكيكة السويتهه استوت، مانتظرتهه تبرد من الربكة گصيتهه ويطلع بخار منهه..
-على كيفج شبيچ مخبوصة انطيني اساعدج
-لا ماكو داعي اذا تحب روح كعد كارولين هي نايمة
-نايمة وتاركه الشغل كله عليج؟!
-اي عادي هي تعبانه من الحمل
-وانتِ مريضه بالقلب منو الاتعس؟!
-قطرس شبيك
-جاي يشغلج العار مو كولي احجييي
-شبيك منو يشغلني هذا بيتي ومن واجبي انظفه وارتبه
هز براسه مطنگر ورجع يكعد على الكرسي حطيت الضيافة گدامه ورجعت امسح الكاونتر..
-هسة عوفي هذا الخـ**** مو جاي اشووووفج
اللتفتت اباوعله وجهه معصب وضايج ذبيت الوصلة من ايدي وكمت وكفت بمكاني..
-قطرس: شبيچ تشردين مني شمسويلج اني
-منو كال اشرد بس مشغولة والله
-تعالي يمي لو اجيچ اني
-لا اني اكعد يمك
اخذت كرسي حطيته مقابيله ظل ياكل وعينه عليه ضجت بله لو قوس دخل وشافه هنا والله ميرحمه ولا يرحمني..
-انتِ خايفه مني؟
-اخاف منك ليش
-لعد شبيچ تبلعمين وتفركين بأيدج
-لا صدكني ماكو شي بس...
-بس شنو؟ اني ضارب الدوام واجيت اشوفج شوفي بعدني بملابس الدوام
فعلاً لابس بدلته العسكرية الي لونهه اسود والسلاح واللاسلكي بخصره هزيت راسي مبتسمة وبقيت ملتزمة الصمت..
-راح اكعد كارو هي هم مشتاقتلك اكيد
كمت اروح للصاله وجرني من ايدي ضربني بصدره، رفعت عيوني اباوعله مصدومة من تصرفاته دفرته من ناحية صدره بقوة ايدي، كال بعصبيه..
-بعده يعنفچ؟!!
-قطرس شنو هالتصرفات وخر شبيك
-جاوبينييي يكتلج!!!
-لا لا والله
-ليش تزوجتي إيڤ احجي ليشش
-قطرس هد ايدي دتأذيني
-انتِ تكرهين قوس تشوفين دم سنونج ولا تشوفي شلون قبلتي تتزوجي ولج عقلي وگفف
بقيت ساكته وادفع بأيده الى ان خليته يهدني بالقوة، عصبت من تصرفه وخزرته..
-قطرس: اجيت بحنتچ ردت اخربهه والكل وگف ضدي!! قزح تعارك وياي ومحد رضى نتكاتل واخذ حقي منه! ابوي الي هو ابوي انلصم على حلگه وگال يغضب عليه اذا رجعتله الكتله وبلعتهه وسكتت!! كعدت بالحديقه انتظرج تنزلين تكولين ما رايدته بقيت انتظرج ساعاات وانتِ ماكو ليششش
