💞💎ياقوت💎💞 ( مكتملة )

الجزء 4

                                       🌛رمضان كريم 🌜
                   
                                     💞 💎 ياقوت 💎 💞
                                              

مينة كتغوت وترعد غير بوحدها: بعدي منو ماتحطيش عليه شلاقمك توسخيه
ابراهيم: قالت ليك الصح بعدي من دري باري منك تلسقي فيه جنابتك أجي بعدا حطت فلوس الكرا ؟؟
مينة: اييه يالاه طفات عليها الشمعة مسكينة ساليتي ونوضي حطي داكشي وعينك حسك نلقا شي فريتة ناقصة نقطعها من جنابك
ناضت ياقوت خدات داكشي من عند باها لي دفل عليها وسط وجهها ومشات لكوزينة حطات داكشي وجبدات طبسيل حطات فيه دوك دجاجات وضورات عليهم الفريت وحطات كيتشوب والموطارد والكيسان فواحد لا طابل تما فالكزينة حيت كبيرة كياكلو غير تما وهي ريوgها سايلين ليها خصوصا قربات تجيها ليغيgل كتزيدها تاهيا حتى دخلت عليها مينة كتراقب داكشي عاد خلاتها تمشي لبيتها بلا متاخد حتى فريتة وحدة بقات فخاطرها دخلات للبيت مشات للميكات لي جابت
خدات ديك درهم سنيدة ونصف لتر حليب وديك الخبزة مشات لداك لكونطوار دات معاها كرسي لبيرو جلسات خدات زلافة قطعات فيها ديك الخبزة ضغيمات وكبات عليها الحليب وزادت عليها سنيدة خلطات وبدات كتاكل بلا نفس حيت أغلب الوقت هادي هي ماكلتها لسانها ومصارنها تعودو عليها بقات كتشوف بنظرة فارغة فالحيط لي قدامها وكتاكل غير باش تعيش كملات هزات بانيو صغير كبات فيه الماء غسلات زلافة والملعقة وناضت لبيروها
حتى بانت ليها الميكة لي جابت ليها فاضمة مشات ليها فرحانة قلباتها لقات فيه نصف لتر زيت العود وآخر ديال أركان وشوية اللوز البلدي واملو فرحات قد حقها فالدنيا غاتلقا باش تفطر هاد ليامات مشات ستفاتهم فوق كونطوار
المهم نقوليكم ياقوت عمرها 22 سنة من نهار عقلات على رأسها وهي كتعرض لمعاملة قاسية من والديها يعطيوها شياطة ويقتلوها عصا كانت عندها 4 سنين فاش أمها ولدات خديجة أختها لي غير دوزات سبع ايام معاهم جات عمت باها هي لي دارت ليها سبوع وداتها لمدينة أخرى معاها هي لي رباتها عاد من بعد ولدات أسامة 12 سنة ورضا 9 سنين اما حسام 6سنين ملي دارت ياقوت 12 سنة بلغات داك نهار كلات قتلة الكلاب وتهموها من ديك ساعة بلي فاسدة وفاسقة وغاتجيب ليهم الحرام ومن داك النهار غاتزيد تقلب حياتها أمها غتبدا تخدمها فديور بدعوى أنها خاص تخلص عيشتها معاهم ولا تخدم مع باها فالمصبنة هادشي زائد القراية فمدرسة عادية كتقرا مع ولاد الشعب وديما كانت من الأوائل جابت حسن جدا فالباك ولكن والديها مبغاوهاش تكمل حلفو لا صرفو عليها قالو ليها درتي 18 سنة صرفي على راسك ومعارفاش علاش هاد التصرفات ملي شافتهم كيتصرفو مزيان مع دراري قالت غير مابغاوش البنات داكشي علاش كيتصرفو معاها خايب خرجات تخدم ولكن لي ما كانش فراسهم بلي هي دفعات وتقبلات فمدرسة ديال التجارة والتسيير وقرات خدات الإجازة وهاد العام بدأت الماستر وكتخدم فوزين ديال الخياطة فاللول كانت غير كتشطب من بعد دوزوها للمصلوح من بعد تعلمات الماكينة والفصالة كيخلصوها بربعين الف ريال 600 درهم كتعطيها ليهم والباقي تشري متاكل والحوايج والقراية وكتخبي شوية ماكتيقش فواليديها يخرجوها للزنقة
مشات ردات الكرسي لبلاصتو ومشات لناموسيتها من بعد ما طفات الضوء مشات شعلات الفيوز لي حدا رأسها وخدات الكتاب بقات كتقراه حتى داتها عينيها
       
                   💎💞💎💞💎💞💎💞💎💞💎💞💎
علاش عائلتها كيتصرفو هاك فنظركم واش كاين شي سبب ؟؟
وحتى الى كان واش غا يشفع ليهم